.jpg)
សកម្មភាពប្រកួតកីឡា Arnis មិត្តភាពរវាងកីឡាករកម្ពុជា និងកីឡាករហ្វីលីពីន នៅ NOCC។ រូបថត NOCC
ភ្នំពេញ៖ មន្រ្តីបច្ចេកទេសរបស់សហព័ន្ធកីឡាគុនល្បុក្កតោកម្ពុជា បានបង្ហាញពីទំនុកចិត្តកាន់តែខ្ពស់ ទៅលើក្រុមអត្តពលិករបស់ខ្លួនថា អាចនឹងដណ្តើមបានមេដាយមាស ដើម្បីបង្កើតប្រវត្តិសាស្រ្តរបស់គុនល្បុក្កតោ សម្រាប់ការចូលរួមជាលើកដំបូង ក្នុងព្រឹត្តិការណ៍កីឡាស៊ីហ្គេម លើកទី ៣០ នៅប្រទេស ហ្វីលីពីន ពីថ្ងៃទី ៣០ ខែ វិច្ឆិកា ដល់ថ្ងៃទី ១១ ខែ ធ្នូ ឆ្នាំ ២០១៩។
បើទោះបីជាការទៅចូលរួមការប្រកួតស៊ីហ្គេម ជាលើកដំបូងនេះ ក្រុមល្បុក្កតោ ត្រូវប្រកួតកីឡាបែបប្រពៃណីរបស់ម្ចាស់ផ្ទះហ្វីលីពីន ឈ្មោះថា Arnis ដែលប្រើដំបងខ្លី ក្នុងការសម្តែង និងប្រកួតគ្នា ប៉ុន្តែ លោក អ៊ូ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា បានអះអាងថា អត្តពលិក ៤ នាក់ ក្នុងចំណោមអត្តពលិក ១០ នាក់ (ស្រី ៥ នាក់) ដែលត្រូវបញ្ជូនទៅប្រកួតស៊ីហ្គេមលើកនេះ គឺមានអ្នកអាចឈានទៅដល់ការដណ្តើមបានមេដាយមាស។
លោក អ៊ូ តារា បានប្រាប់ភ្នំពេញប៉ុស្តិ៍ កាលពីអង្គារថា៖ «គោលបំណងធំរបស់យើង គឺការដណ្តើមយកមេដាយមាស ដើម្បីបង្កើតកំណត់ត្រាប្រវត្តិសាស្រ្ត សម្រាប់ការបង្ហាញខ្លួន នៅស៊ីហ្គេម លើកដំបូងនេះ ហើយតាមការវាយតម្លៃរបស់គ្រូបង្វឹកខ្មែរ និងគ្រូបង្វឹក ជនជាតិហ្វីលីពីន ដោយផ្នែកលើការប្រៀបធៀបអត្តពលិក កម្ពុជា ទៅនឹងក្រុមអត្តពលិក ហ្វីលីពីន ដែលជាម្ចាស់ផ្ទះគុន Arnis នោះ គឺអត្តពលិករបស់យើង ធ្វើបានក្នុងកម្រិតខ្ពស់ ហើយក្នុងនោះកីឡាករ ៣ នាក់ និងកីឡាការិនី ១ នាក់ របស់យើង គឺមានអ្នកអាចឈានទៅដណ្តើមបានមេដាយមាស»។
ការបង្ហាញភាពជឿជាក់ ក្នុងការដណ្តើមបានមេដាយមាសស៊ីហ្គេមលើកនេះ គឺដោយសារក្រុមល្បុក្កតោកម្ពុជា បានយល់កាន់តែច្បាស់ទៅលើបទបញ្ជាបច្ចេកទេស និងរបៀបនៃការដាក់ពិន្ទុ ក្នុងការប្រកួតកីឡា Arnis បន្ទាប់ពីពួកគេ បានចូលរួមប្រកួតមិត្តភាពជាមួយក្រុមជម្រើសជាតិហ្វីលីពីន ក្នុងវគ្គបណ្តុះបណ្តាលអាជ្ញាកណ្តាល ចៅក្រម ដែលភាគីទាំង ២ បានរួមគ្នារៀបចំឡើង នៅទីស្នាក់ការគណៈកម្មាធិការជាតិអូឡាំពិកកម្ពុជា រយៈពេល ៥ ថ្ងៃ និងទើបបានបញ្ចប់កាលពីថ្ងៃអង្គារ។
នៅក្នុងវគ្គនេះ ប្រទេស ហ្វីលីពីន បានបញ្ជូនអ្នកជំនាញ មកជួយបណ្តុះបណ្តាលផ្នែកបទបញ្ជាបច្ចេកទេស ដល់គ្រូបង្វឹកកម្ពុជា ហើយតាមរយៈការសិក្សានោះ លោក វី តារា បានជាប់ឈ្មោះជាអាជ្ញាកណ្តាលចៅក្រមអន្តរជាតិ ដែលនឹងត្រូវចូលរួមកាត់សេចក្តីលើកីឡា Arnis លើកនេះ។ ពិសេសជាងនេះ ហ្វីលីពីន បានបញ្ជូនអត្តពលិក ២០ នាក់ ឲ្យមកប្រកួតដកស្រង់បច្ចេកទេសជាមួយក្រុមល្បុក្កតោកម្ពុជា ធ្វើឲ្យពួកគេ មានសមត្ថភាពកាន់តែល្អទាំងទៅលើការសម្តែងមេគុន និងវិញ្ញាសាប្រយុទ្ធ Live Stick ដែលវិញ្ញាសាទាំង ២ នេះ កម្ពុជា ត្រូវប្រកួតនៅស៊ីហ្គេម។
លោក អ៊ូ តារា បានបន្ថែមថា៖ «កន្លងមក ទាំងការហ្វឹកហាត់ ប្រកួត និងការរៀនសូត្រលើបទបញ្ជាបច្ចេកទេសកីឡា ARNIS នេះ គឺយើងនៅមិនទាន់បានលម្អិតទៅលើវិញ្ញាសាប្រយុទ្ធ ប៉ុន្មានឡើយ ប៉ុន្តែតាមរយៈការផ្សព្វផ្សាយបទបញ្ជាបច្ចេកទេសក្នុងវគ្គនេះ បានធ្វើឲ្យអត្តពលិកយើងបានយល់ច្រើនពីលក្ខខណ្ឌផ្តល់ពិន្ទុ ថាតើការប្រើបច្ចេកទេសណា បានពិន្ទុច្រើន និងបច្ចេកទេសណា ដែលចាំបាច់ត្រូវប្រើប្រាស់ គឺគាត់យល់បានច្បាស់ អ៊ីចឹងគាត់អាចរៀបចំទម្រង់ប្រយុទ្ធរបស់ពួកគាត់បានត្រឹមត្រូវ ដោយមិនខ្ជះខ្ជាយពេលវេលា»។
អគ្គលេខាធិការវ័យក្មេងរូបនេះ បានបន្ថែមទៀតថា៖ «តាមរយៈការប្រកួតមិត្តភាពនេះ យើងក៏បានដឹងពីចំណុចខ្វះខាតរបស់យើងផងដែរ អ៊ីចឹងក្នុងរយៈពេល ១ ខែចុងក្រោយនេះ យើងនឹងហ្វឹកហាត់ទៅតាមផែនការ និងយុទ្ធសាស្រ្តថ្មី ដែលគ្រូបង្វឹកខ្មែរ និងគ្រូបង្វឹកហ្វីលីពីន បានរៀបចំទុកឲ្យ គឺធ្វើយ៉ាងណាឲ្យក្រុមអត្តពលិកយើង មានលទ្ធភាពគ្រប់គ្រាន់ ឈានទៅដណ្តើមបានមេដាយមាស តាមទិសដៅដែលសហព័ន្ធបានដាក់ចេញ»៕
