.jpg)
វង្ស ណយ បានទាត់ កែវ រំចង់ ក្នុងពេលប្រកួតកន្លងមក តែពេលនេះ គេឈប់ប្រដាល់ហើយ។ រូបថត sabay
ភ្នំពេញ៖ ការប្រកាសលាឈប់ពីអាជីពប្រដាល់ ហើយទៅចាប់មុខរបររកស៊ី ជាអ្នកលក់ងៀតក្របី និងកន្ធាយអប់ (ចំហុយ) តាមអនឡាញរបស់ជើងខ្លាំងធ្លាប់ឈ្នះខ្សែក្រវាត់ ៣ ស្ថាប័ន វង្ស ណយ បានធ្វើឲ្យមហាជនយល់ឃើញខុសៗគ្នា ដោយអ្នកខ្លះមានការអាណិត តែអ្នកខ្លះទៀតបានយល់ថា គ្រាន់តែជាការសម្តែង ដើម្បីទទួលបានជំនួយពីសប្បុរសជន ព្រោះកីឡាករល្បីឈ្មោះខ្លះ ដែលមានប្រាក់ចំណូលពីការប្រកួតមួយខែៗ ខ្ទង់ពាន់ដុល្លារនោះ នៅតែបង្ហោះតាមបណ្តាញសង្គមថា ក្រីក្រលំបាក ខណៈរឿងខ្លះ ផ្ទុយពីការពិត។
យ៉ាងណាក៏ដោយ ជុំវិញនឹងភាពមន្ទិលសង្ស័យនេះ វង្ស ណយ បានប្រាប់ភ្នំពេញប៉ុស្តិ៍ តាមទូរស័ព្ទថា៖ «ខ្ញុំពិតជាក្រីក្រលំបាកមែន ហើយអាយុច្រើន ប្រកួតមិនបានល្អ ក៏សម្រេចឈប់ប្រកួត គឺមិនមែនសម្តែងឲ្យគេអាណិតនោះឡើយ។ ខ្ញុំមករកស៊ីវិញ ដោយឈប់ហាត់ឡើងប្រដាល់ទៀតហើយ»។
គួររំឭកថា កាលពីពេលថ្មីៗនេះ វង្ស ណយ បានប្រកាសលាឈប់ពីអាជីពនេះ នៅលើហ្វេសប៊ុករបស់ខ្លួន ដោយបានសរសេរថា «ខ្ញុំវ៉ៃយូរណាស់ហើយ ល្បីតែឈ្មោះ អត់សល់អីទេ។ ពេលនេះខ្ញុំអស់កម្លាំងវ៉ៃទៀតហើយ ទើបខ្ញុំសម្រេចចិត្តឈប់វ៉ៃ ព្រោះខ្លាចពិការខានបានរកស៊ីចិញ្ចឹមកូន ព្រោះបើខ្ញុំពិការទៅ គ្មានអ្នកណាចិញ្ចឹមកូនខ្ញុំទេ»។
មានស្រុកកំណើត នៅខេត្តប៉ៃលិន វង្ស ណយ បានសាងភាពល្បីល្បាញ គឺឈ្នះខ្សែក្រវាត់អាស៊ីអីរ៉ុបនៅប្រទេសបារាំង ចំនួន ២ ជំនាន់ និងឈ្នះខ្សែក្រវាត់ស៊ីម៉ង់ត៍ភ្នំ នៅសង្វៀនបាយ័ន ដោយផ្តួលជើងខ្លាំង កែវ រំចង់ ឲ្យសន្លប់ បង្កភាពភ្ញាក់ផ្អើលខ្លាំង ប៉ុន្តែ វង្ស ណយ ត្រូវបានគេកត់សម្គាល់ថា មានការផ្លាស់ប្តូរក្លិបជាបន្តបន្ទាប់ ខណៈដែលគ្រូបង្វឹក និងអ្នកគ្រប់គ្រងមុនៗ បង្ហើបប្រាប់ថា ខ្សោយវិន័យ និងពិបាកគ្រប់គ្រង។
វង្ស ណយ និយាយថា៖ «ខ្ញុំសម្រេចចិត្តលាឈប់ពីអាជីពអ្នកប្រដាល់ ដោយសារក្រីក្រ កម្លាំងខ្សោយ ប្រកួតក្នុងមុខរបរនេះ គ្មានសល់អី ពិសេសជាងនេះ គឺទ្រាំទ្រនឹងការជេរប្រមាថរបស់អ្នករិះគន់មួយចំនួនតូចមិនបាន ព្រោះពេលយើងវាយឈ្នះ គេគាំទ្រថា ល្អ ដល់យើងកម្លាំងខ្សោយ វ៉ៃចាញ់ គេជេរ ចោទយើង និងមើលងាយយើង»។
កីឡាករវ័យ ៣៣ ឆ្នាំ វង្ស ណយ បានបញ្ជាក់ថា៖ «ទោះបីខ្ញុំមានចិត្តអាឡោះអាល័យចង់បន្ដអាជីព ប៉ុន្តែជីវភាព និងការប្រកួតឈឺសាច់ និងការរិះគន់ជាន់ពន្លិច ធ្វើឲ្យខ្ញុំត្រូវតែលាឈប់ប្តូរមុខរបរនេះ ខ្ញុំពិតជាឈប់ប្រាកដមែន គ្មានសម្តែងអ្វីទេ ប៉ុន្តែបើបងប្អូនអាណិតខ្ញុំ មេត្តាជួយទិញទៅ ខ្ញុំនឹងដឹកដល់ផ្ទះ គឺងៀតក្របី ១ គីឡូក្រាម ៦៥ ០០០ រៀល និងកន្ធាយចំហុយ ១ ក្បាល តម្លៃ ២៧ ដុល្លារ»។
ចំណែកប្រពន្ធរបស់ វង្ស ណយ ឈ្មោះ វ៉ាន់ គន្ធា បានប្រាប់ថា៖ «ខ្ញុំមានស្រុកកំណើតនៅខេត្តត្បូងឃ្មុំ ហើយបានជាប្តីប្រពន្ធគ្នា ១៥ ឆ្នាំមកហើយ។ សព្វថ្ងៃមានកូន ២ នាក់ ប្រុស ១ ស្រី ១ នៅក្នុងផ្ទះជួលម្តុំចោមចៅ ហើយចាប់ផ្តើមប្រកបរបរលក់ងៀតក្របី និងអាហារកុម្មង់តាមអនឡាញ ដោយប្តីខ្ញុំ ជាអ្នកដឹកជញ្ជូន។ គ្រួសារខ្ញុំ រស់ក្នុងរបរអ្នកប្រដាល់មកដល់ពេលនេះ គឺគ្មានសល់អ្វីទេ ទើបសម្រេចចិត្តចាប់អាជីពថ្មី ទើបតែបាន ៣ ខែ ដោយទទួលបានប្រាក់ចំណូល ត្រឹមម៉ារស់ លើការហូបចុកប្រចាំថ្ងៃ និងថ្លៃផ្ទះ»។
ជុំវិញការប្រកាសលាឈប់ពីប្រដាល់របស់ វង្ស ណយ ដោយអះអាងថា ប្រកួតយូរឆ្នាំ តែគ្មានសល់អ្វីនេះ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានលើកឡើងតបទៅវិញថា៖ «បញ្ហាកីឡាករប្រដាល់មាន ឬក្រ គឺមិនអាចមកពីប្រាក់ចំណូលនោះទេ ព្រោះកីឡាករលំដាប់ជួរមុខក្នុង ១ ប្រកួតខ្លះ បានរហូតខ្ទង់ ៥០០ ឬកម្មវិធីខ្លះដល់ ១ ០០០ ដុល្លារ ហើយមានកីឡាករខ្លះ ប្រកួតសឹងតែរាល់សប្តាហ៍ក៏មាន។ អ៊ីចឹងកត្តាភាពក្រីក្រខ្លះ គឺមកពីការគ្រប់គ្រងការចំណាយរបស់យើងផ្ទាល់ខ្លួន ព្រោះកីឡាករខ្លះ ហេតុអ្វីគេមានជីវភាពសមរម្យ។ ចំណែកការលាឈប់របស់ វង្ស ណយ ជាសិទ្ធិផ្ទាល់ខ្លួន ព្រោះការស្ម័គ្រចិត្តចូលវ៉ៃ ក៏ជាសិទ្ធិរបស់គេផ្ទាល់ខ្លួន»៕
