ភ្នំពេញ៖ អ្នកជំនាញប្រើក្បាច់កែង វង្ស ណយ ដែលទើបបានសន្លប់ក្រោមកណ្តាប់ដៃរបស់ជើងខ្លាំងទម្ងន់ធ្ងន់ កែវ រំចង់ សម្រាប់ការវិលមកជាន់សង្វៀនប្រដាល់ជាថ្មី កាលពីពេលថ្មីៗនេះ គឺនៅសប្តាហ៍នេះ គណៈកម្មការផ្គូផ្គងសង្វៀនបាយ័នបានដាក់ឱ្យប្រកួតក្នុងទម្ងន់ ៧៥ គីឡូក្រាម ជាមួយជើងខ្លាំងកំពុងល្បីឈ្មោះ ឈួន រិទ្ធី នៅថ្ងៃសៅរ៍។
បើទោះបីជា វង្ស ណយ ទើបចាញ់ កែវ រំចង់ ទឹកទី៤ ប៉ុន្តែអ្នកទស្សនាភាគច្រើនបានលើកទឹកចិត្ត និងសរសើរថា ណយ ខំវ៉ៃអស់ពីសមត្ថភាព និងជក់ចិត្ត។ ចំណែកការវិលមកសង្វៀនលើកនេះ វង្ស ណយ បានការគាំទ្រច្រើនដដែល ហើយអ្វីដែល ណយ ពេញចិត្តនោះ ពេលប្រកួតចាញ់គ្មានអ្នកជេរប្រមាថ។
អ្នកប្រដាល់លក់ងៀតក្របី វង្ស ណយ បានប្រាប់ថា៖ «ខ្ញុំពេញចិត្ត នឹងឡើងសង្វៀនវិញ ព្រោះពេលចាញ់ គ្មានអ្នកជេរ ពិសេសមានអ្នកលើកទឹកចិត្តបានធ្វើឱ្យមុខរបរលក់ងៀតក្របីខ្ញុំ លក់ដាច់ទៅវិញ។ ម៉្យាងទៀត ឈួន រិទ្ធី ទោះជាខ្លាំងក៏មិនជាឧបសគ្គធំដូច ប្រកួតជាមួយ កែវ រំចង់ ដែរ»។
វង្ស ណយ និយាយថា៖ «រិទ្ធី ជាជើងខ្លាំងជំនាន់ក្រោយ កម្លាំងនៅល្អ គឺជាឧបសគ្គធំដែរ ប៉ុន្តែក្នុងឋានៈអ្នកជើងចាស់ធ្លាប់ល្បីឈ្មោះ ១ រូប ខ្ញុំមិនចេះខ្លាចដៃគូទេ ចូលទៅដឹងតែវ៉ៃសម្រុកតែម្តង រីឯរឿងចាញ់ ឬឈ្នះ មិនទាន់ហ៊ាននិយាយមុនទេ ប៉ុន្តែសុំតែម៉្យាងទេ គឺចាញ់ ហាមចោទ និងហាមជេរ ប្រយ័ត្នខ្ញុំទ្រាំមិនបានជេរតបវិញ»។
តាមបទពិសោធ វង្ស ណយ ធ្លាប់ប្រកួតច្រើនជាង ឈួន រិទ្ធី ប្រហែល ៤ ដងនោះ ប៉ុន្តែ វង្ស ណយ ត្រូវបានគេមើលឃើញថា ចាញ់ប្រៀប រិទ្ធី ផ្នែកកម្លាំងតែល្បិចប្រយុទ្ធ ស្នៀតកែង និងការចូលបោះជង្គង់ ណយ មានប្រៀបជាង ឈួន រិទ្ធី ឆ្ងាយណាស់។
វង្ស ណយ និយាយថា៖ «ខ្ញុំចាញ់ផ្នែកកម្លាំងមែន តែបច្ចេកទេស ជង្គង់ និងកែង បើខ្ញុំវាយចូលគោលដៅធានាថា ស៊ីផុយ។ ទោះជាយ៉ាងណា ខ្ញុំមិនអាចមើលស្រាលដៃគូបានទេ សូមចាំមើលការប្រកួតជាក់ស្តែងទៅ ហើយខ្ញុំមានទំនុកចិត្តឈ្នះ ៧០ ភាគរយតែខ្ញុំសូមសំណូមពរបងប្អូនអ្នកទស្សនា បើសិនខ្ញុំចាញ់ កុំជេរអី ព្រោះខ្ញុំខឹងអ្នកជេរណាស់»។
ចំណែក ឈួន រិទ្ធី ជាកីឡាករធ្លាប់ប្រកួតល្បីល្បាញក្នុងគុនចម្រុះ MMA ហើយនៅឆ្នាំនេះ គេទទួលបានជោគជ័យនៅលើសង្វៀនថោន។ លោក ធន់ សុភា ជាគ្រូបង្វឹកប្រាប់ថា ឆ្នាំ ២០២០ នេះ ឈួន រិទ្ធី មានស្ថិតិប្រកួតល្អបំផុត គឺឈ្នះជានិច្ចពិសេស ៣ ប្រកួតចុងក្រោយនេះ ឈ្នះជាប់ៗគ្នា គឺឈ្នះ ឈឿង ល្វៃ, យ៉ាម ខេមរា និងឈ្នះ ទេស សំខាន់។
លោកបន្ថែមថា៖ «តាមខ្ញុំមើល ប៉ះ វង្ស ណយ ពិតជាលំបាកឈ្នះណាស់ ព្រោះគេជាកីឡាករជើងចាស់មានជំនាញបញ្ឆោតខ្ពស់ ចំណែក រិទ្ធី មានប្រៀបតែផ្នែកកម្លាំង និងកណ្តាប់ដៃធ្ងន់ រីឯជង្គង់ និងកែង មិនអាចប្រៀបជាមួយ វង្ស ណយ បានទេ។ ទោះជាយ៉ាងណា ឡើងប្រដាល់ត្រូវមានទំនុកចិត្តខ្ពស់ ហេតុនេះខ្ញុំរំពឹងឈ្នះ ៧០ ភាគរយ ហើយបើសិនប្រើកណ្តាប់ដៃបានល្អ វង្ស ណយ អាចសន្លប់ទៀតក៏ថាបានដែរ ព្រោះ រិទ្ធី ដៃធ្ងន់ណាស់»។
ចំណែក ឈួន រិទ្ធី និយាយថា៖ «ខ្ញុំហាត់ត្រៀមបានល្អ។ ខ្ញុំនឹងប្រឹងទប់កែងគាត់ឱ្យជាប់ និងវ៉ៃសងដោយកណ្តាប់ដៃ ហេតុនេះខ្ញុំមានទំនុកចិត្តឈ្នះ ៩០ ភាគរយ ព្រោះខ្ញុំត្រូវអូសពេលប្រកួតឱ្យដល់ទឹកទី៤ ឬទឹកទី៥ គឺពេល វង្ស ណយ ខ្សោយកម្លាំងទើបខ្ញុំសម្រុកផ្តាច់តែម្តង»៕