.jpg)
វង្ស វិឆ័យ ទាត់ទៅលើគូប្រកួតខ្លួនក្នុងការប្រកួតនៅសង្វៀនអាស៊ីអាគ្នេយ៍នៅព្រឹកថ្ងៃអាទិត្យ។ រូបថត សហការី
ភ្នំពេញ៖ ជំនួបប្រដាល់គុនខ្មែរមិត្តភាពអន្តរជាតិក្នុងទម្ងន់ ៦៧ គ.ក្រ នៅសង្វៀន SEATV នាព្រឹកថ្ងៃអាទិត្យក្នុងកម្មវិធី Boostrong ត្រូវបានផ្លាស់ប្តូរភ្លាមៗដោយគម្រោងនៃការប្រកួតរបស់កីឡាករ វង្ស វិឆ័យ របស់ក្លិបកងពលឆត្រយោង ៩១១ ពីដំបូងត្រូវបានដាក់ឲ្យប្រកួតជាមួយអ្នកប្រដាល់ថៃលំដាប់ខ្លាំង AO Vatan ប៉ុន្តែការប្រកួតជាក់ស្តែងត្រូវបានផ្លាស់ប្តូរដាក់ជំនួសដោយកីឡាករថៃល្បីមួយទៀតដែលធ្លាប់ឈ្នះខ្សែក្រវាត់ពីកម្ពុជា (ធ្លាប់ឈ្នះជើងខ្លាំងកម្ពុជាមាន ឡុង សុភី និង រឿងសោភ័ណ្ឌ ជាដើម) គឺកីឡាករ Thav Olan។
ទោះជាយ៉ាងណា សមត្ថភាពរបស់ Thav Olan មានក្បាច់គុនមិនក្រោមកីឡាករ AO Vatan នោះឡើយ ប៉ុន្តែលទ្ធផល គឺ វង្ស វិឆ័យ នៅតែរក្សាបានកំណត់ត្រាឈ្នះដដែលទោះជាការប្រកួតមានលក្ខណៈលំបាក និងតឹងតែងដោយសារតែកម្រិតវិជ្ជាគុនរបស់អ្នកប្រដាល់ទាំង ២ ត្រូវបានគេដឹងថា មានសមត្ថភាពល្អខ្លាំងនៅក្នុងប្រភេទទម្ងន់ធ្ងន់ដូចគ្នា។
ក្នុងស្ថានភាពប្រកួតក្រោមក្រសែភ្នែកអ្នកទស្សនាយ៉ាងច្រើនកំពុងតាមដានគូប្រដាល់ខ្លាំងដ៏កម្រនេះ វត្តមានរបស់កីឡាករថៃ Thav Olan ជំនួសកីឡាករ AO Vatan មិនបានធ្វើឲ្យអ្នកទស្សនាខកចិត្តនោះទេពីព្រោះកម្រិតវិជ្ជាគុនមានលំដាប់ល្អដូចគ្នា ហើយក៏មានអ្នកទស្សនាលាន់មាត់ថា កីឡាករថៃ Thav Olan នេះមានប្រជាប្រិយភាព និងក្បាច់គុនចង់ល្អជាង AO Vatan ទៅទៀត។
អវត្តមានរបស់ A០ Vatan ត្រូវបានគណៈកម្មការប្រាប់ថា កីឡាកររូបនេះរក្សាទម្ងន់មិនបានតាមការកំណត់ត្រឹម ៦៧ គីឡូក្រាម នោះជាមូលហេតុ។
បើនិយាយពីប្រវត្តិប្រកួត និងបទពិសោធរបស់កីឡាករថៃ Thav Olan កូនកាត់រូបនេះវិញ គឺច្រើនជាង វង្ស វិឆ័យ ប្រហែល ៣ ដងឯណោះ ប៉ុន្តែកម្លាំង និងបច្ចេកទេសវិញគឺ វង្ស វិឆ័យ ទប់ទល់បានល្អព្រមទាំងរក្សាបានកំណត់ត្រាជាប្រវត្តិឈ្នះនៅក្នុងឆ្នាំ ២០១៩ និងដើមឆ្នាំ ២០២០ នេះបន្តទៀតគួរឲ្យមានមោទនភាពបំផុត។
ក្នុងជំនួបប្រកួតដ៏ស្វិតស្វាញចំនួន ៥ ទឹកពេញនោះ គេមើលឃើញថា នៅទឹកទី ២ និង ៣ កីឡាករថៃ Thav Olan បានវាយជង្គង់ និងកែងបានល្អព្រមទាំងកាច់ឲ្យ វង្ស វិឆ័យ ដួលញឹកញាប់ និងមានពិន្ទុនាំមុខផងដែរ។ ស្ថានភាពប្រកួតកំពុងតែតានតឹង ហើយការវាយសម្រុកខ្លាំងដូចគ្នាបានធ្វើឲ្យ វង្ស វិឆ័យ ប្រឹងប្រែងស្តារបានពិន្ទុមកវិញនៅទឹកទី៤ ខណៈដែលវាយកណ្តាប់ដៃ កែង និងជង្គង់ និងរុញឲ្យ កីឡាករថៃ Thav Olan ដួលអុកគូទនៅបង្គោលសង្វៀនងើបមិនចង់រួច អាជ្ញាកណ្តាលបានរាប់កីឡាករថៃរូបនេះចំនួន ៨ ទើបបន្តការប្រកួតបានវិញ។ ការប្រកួតដែលបានបន្តរហូតចប់ទឹកទី ៥ នោះ Thav Olan អស់ថាមពលបានព្យាយាមទប់ទល់ច្រើនជាងវ៉ៃលុក ដើម្បីកំដរឲ្យចប់ទឹកទី ៥ ខណៈ វង្ស វិឆ័យ ក៏ខ្សោយថាមពលដូចគ្នារង់ចាំតែស្នូរជួងបញ្ចប់ប៉ុណ្ណោះ។
ក្រោយប្រកាសលទ្ធផលឲ្យ វង្ស វិឆ័យ ឈ្នះកីឡាករ Thav Olan និយាយថា៖ «ខ្ញុំចាញ់ដោយសាររងមួយដៃវិល និងគេបន្ថែមទាត់ទៀតធ្វើឲ្យខ្ញុំដួល។ មូលហេតុនេះខ្ញុំទទួលស្គាល់ថា វិឆ័យ ខ្លាំងគួរសមក្នុងចំណោមអ្នកដែលខ្ញុំធ្លាប់ប្រកួតជាមួយកីឡាករខ្មែរកន្លងមក ហើយមូលហេតុចាញ់ដោយសារខ្ញុំមិនបានត្រៀមខ្លួនល្អទេ គឺមកជំនួសគេប៉ុន្តែខ្ញុំចាញ់ត្រឹមពិន្ទុក្រោយអាជ្ញាកណ្តាលរាប់ប៉ុណ្ណោះ»។
Thav Olan បន្ថែមថា៖ «ប្រសិនជួបប្រកួតលើកក្រោយបានត្រៀមមុនល្អ ខ្ញុំធានាឈ្នះបានពីព្រោះកីឡាករកម្ពុជា ខ្ញុំញញើតតែកណ្តាប់ដៃ រឿង សោភ័ណ្ឌ ប៉ុណ្ណោះ»៕
