.jpg)
វង្ស វិឆ័យ ត្រូវបានគេមើលឃើញថា មានប្រៀបក្នុងការឈ្នះប្រាក់លាន នៅសប្តាហ៍ទី ៧ នេះ។ រូប សហការី
ភ្នំពេញៈ កីឡាករមានកាយសម្បទាល្អ និងមានសមត្ថភាពប្រកួតគួរឲ្យចាប់អារម្មណ៍ វង្ស វិឆ័យ ត្រូវបានគេមើលឃើញថា ទំនងជាមានប្រៀបជាងបេក្ខភាពចំនួន ៣ នាក់ទៀត មាន ពុទ្ធ ឆាយរិទ្ធី, ឆៃ សារ៉ា និង ឈឿន ល្វៃ ដែលត្រូវដាក់ឲ្យប្រកួតម៉ារ៉ាតុងដណ្តើមប្រាក់លាន ទម្ងន់ ៦៩ គីឡូក្រាម ក្នុងកម្មវិធី Mas Fight Cambodia នៅលើសង្វៀនថោននាថ្ងៃអាទិត្យនេះ។
ទោះបីសមត្ថភាព ឬបទពិសោធរបស់កីឡាករទាំង ៤ មានកម្រិតល្បីល្បាញដូចគ្នា ប៉ុន្តែគិតមកដល់ពេលនេះ កម្រិតបច្ចេកទេស និងកម្លាំងសមត្ថភាពរបស់កីឡាករ វង្ស វិឆ័យ គឺត្រូវបានគេមើលឃើញថា ល្អជាងគេដាច់តែម្តង ហើយទោះបី វង្ស វិឆ័យ ចាប់ឆ្នោតប៉ះអ្នកណានៅវគ្គជម្រុះមានត្រឹម ៣ ទឹក ក៏គេនៅមានជំនឿថា វង្ស វិឆ័យ នឹងមានលទ្ធផលឈ្នះមិនខាន ដើម្បីឡើងទៅកាន់វគ្គផ្តាច់ព្រ័ត្រ។
លោក គឹម ស្រ៊ុនកុសល នាយកគ្រប់គ្រងកម្មវិធី Mas Fight Cambodia បានប្រាប់ភ្នំពេញប៉ុស្តិ៍ ថា៖ «ការផ្គូផ្គងសម្រាប់ការប្រកួត យើងពិតជាលំបាករកកីឡាករ ឲ្យមានសមត្ថភាពបទពិសោធ ឬកម្លាំងបច្ចេកទេស ឲ្យមានប្រហាក់ប្រហែលគ្នាណាស់ គឺវាតែងតែមានចំណុចលើស ឬខ្វះគ្នាបន្តិចបន្តួចចៀសមិនផុតទេ។ ជាមួយគ្នានេះយើងក៏ត្រូវការពេលវេលាវែង ដើម្បីកក់កីឡាករទុក ព្រោះពួកគាត់មិនមែនរង់ចាំតែប្រកួតនៅក្នុងសង្វៀន Mas Fight យើងតែមួយនោះទេ»។
លោក ស្រ៊ុនកុសល បានបន្ថែមថា៖ «ក្នុងចំណោមកីឡាករ ៣ នាក់ ដែលត្រៀមចាប់ឆ្នោតប្រកួតជាមួយ វង្ស វិឆ័យ គឺ ឈឿន ល្វៃ និង ឆៃ សារ៉ា រាងខ្ចីវស្សាដូចគ្នា ប៉ុន្តែ ពុទ្ធ ឆាយរិទ្ធី មានបទពិសោធ និងចាស់វស្សាជាង គឺមិនមែនអាចថា វង្ស វិឆ័យ មានប្រៀបធានាឈ្នះបានស្រួលនោះទេ គឺអាចនឹងមានភាពប្រទាញប្រទង់គ្នាមិនខាន ហើយក្នុងបេក្ខភាពទាំង ៤ នាក់នេះ មាន ៣ នាក់ ធ្លាប់ឈ្នះខ្សែក្រវាត់មកគ្រប់គ្រងដូចគ្នា លើកលែងតែ ឈឿន ល្វៃ ប៉ុន្តែកំពុងល្អដោយធ្លាប់វ៉ៃស្មើជាមួយ វង្ស វិឆ័យ កាលពីពេលថ្មីៗនេះដែរ»។
ចំណែក លោក ធន់ សុភា គ្រូបង្វឹក ឆៃ សារ៉ា ទទួលស្គាល់ថា៖ «ក្នុងចំណោមបេក្ខភាពទាំង ៤ នាក់នេះ ឆៃ សារ៉ា ដូចជាមានកម្រិតបច្ចេកទេសនៅទាបជាង ឬក្រោមគេបន្តិច ព្រោះថាសូម្បីតែកីឡាករ ឈឿន ល្វៃ ជាជើងថ្មី ក៏ល្អជាងដែរ ចំណែក ពុទ្ធ ឆាយរិទ្ធី និង វង្ស វិឆ័យ កាន់តែល្អជាងមួយកម្រិតទៀត»។
លោកបន្តថា៖ «មួយរយៈនេះ ឆៃ សារ៉ា ហ្វឹកហាត់មិនសូវបានល្អគ្នា ព្រោះមានកូនប្រពន្ធផង កម្លាំងខ្សោយជាងមុន ប៉ុន្តែ ឆៃ សារ៉ា ចិត្តធំមានក្បាច់កែងរូសល្អ ក៏អាចមានលទ្ធភាពតតាំងបានល្អ ហើយនៅសល់រយៈពេលប៉ុន្មានថ្ងៃទៀតនេះ ខ្ញុំនឹងបង្វឹកឲ្យ សារ៉ា រឹងមាំ និងមានបច្ចេកទេសបន្ថែមក្នុងការវ៉ៃលុកល្អ កែងល្អ និងជង្គង់ល្អ គឺនឹងមានលទ្ធផលល្អ លើសង្វៀនជាក់ស្តែង ដែលយើងលំបាកទស្សន៍ទាយមុនប្រកួតបានត្រូវណាស់»។
ចំណែកលោក ណន រិទ្ធ គ្រូបង្វឹក ពុទ្ធ ឆាយរិទ្ធី បាននិយាយថា៖ «ឆាយរិទ្ធី ហ្វឹកហាត់ត្រៀមបានល្អ និងមានសង្ឃឹមក្នុងការដណ្តើមប្រាក់លាន ប៉ុន្តែយើងមិនអាចមើលស្រាលដៃគូប្រកួតបានទេ ព្រោះកីឡាករទម្ងន់ធ្ងន់ ពេលវាយចូលគោលដៅពេញៗល្អនោះ ងាយនឹងស្រុតកម្លាំងអ៊ីចឹងខ្ញុំគិតថា សង្ឃឹម ៥០ ភាគរយសិន ខណៈដែល វង្ស វិឆ័យ ជាឧបសគ្គធំជាងគេ ប្រសិនប៉ះគ្នានោះ»។
វង្ស វិឆ័យ ត្រូវបានគេចាត់ទុកថា ជាជើងខ្លាំងជំនាន់ក្រោយ ធ្លាប់ចាញ់ និងឈ្នះជាមួយ ឡុង សុភី ហើយកាលពីសប្តាហ៍មុន បានចាញ់ រឿង សោភ័ណ្ឌ ទាំងមិនអស់ចិត្ត ខណៈដែលអ្នកគាំទ្រមួយចំនួនធំ ស្រែកថា មិនយុត្តិធម៌។ លោក ហង្ស ស៊ឺន គ្រូបង្វឹក និង វង្ស វិឆ័យ មិនអាចទាក់ទងសុំសម្ភាសបានទេ ប៉ុន្តែកាលពីប៉ុន្មានសប្តាហ៍កន្លងមកលោក ហង្ស ស៊ឺន បានខ្សឹបប្រាប់ថា៖«ខ្ញុំមិនចង់និយាយទេ ព្រោះមានគេថា ខ្ញុំអួត អ៊ីចឹងបងប្អូនមើលខ្លួនឯងទៅដឹងហើយ»៕
