.jpg)
វង្ស វិឆ័យ ត្រូវប្រឈមជាមួយជើងខ្លាំងចាស់វស្សារបស់ថៃ Ao Vatan។ រូប សហការី
ភ្នំពេញ៖ អ្នកប្រដាល់ដែលកំពុងមានប្រជាប្រិយខ្លាំងតាមរយៈឈ្នះបានជយលាភី និងខ្សែក្រវាត់ផ្ទួនៗ វង្ស វិឆ័យ របស់ក្លិបកងពលឆត្រយោង ៩១១ ត្រូវបានដាក់ឲ្យប្រកួតជាមួយអ្នកប្រដាល់ថៃលំដាប់ខ្លាំងរបស់ថៃ A០ Vatan ក្នុងទម្ងន់ ៦៧ គ.ក្រ នៅសង្វៀន SEATV នាព្រឹកថ្ងៃអាទិត្យ។
ជ័យជម្នះរបស់ A០ Vatan លើជើងខ្លាំង ធឿន ធារ៉ា ចំនួន ២ ដង និងឈ្នះ រឿង សោភ័ណ្ឌ ១ លើកនោះ ធ្វើឲ្យកីឡាករលំដាប់ខ្លាំងរបស់ខ្មែរមួយចំនួនញញើត គឺលំបាករកដៃគូប្រកួត ប៉ុន្តែវត្តមានរបស់ វង្ស វិឆ័យ សប្តាហ៍នេះ គឺបានដាស់អារម្មណ៍អ្នកទស្សនាឲ្យងាកមកសង្កេតតាមដាន ខណៈដែលមតិអ្នកទស្សនា និងអ្នកជំនាញស្គាល់ពីសមត្ថភាពកីឡាករថៃរូបនេះមួយចំនួនហ៊ានបញ្ចេញយោបល់ថា ប្រសិនជា A០ Vatan វ៉ៃអស់ពីសមត្ថភាពក្នុងតម្លាភាព គ្មានទីផ្សារពាណិជ្ជកម្មនៅពីក្រោយខ្នងទេ គឺភាគរយតិចណាស់ដែល វង្ស វិឆ័យ មានសមត្ថភាពឈ្នះនោះ។
យ៉ាងណាក៏ដោយ វង្ស វិឆ័យ ដែលធ្លាប់ឈ្នះខ្សែក្រវាត់ចំនួន ២ ស្ថាប័ន និងជយលាភីជើងឯកជាតិក្នុងឆ្នាំ ២០១៩ នោះ អាចនឹងបានដឹងពីកលល្បិចប្រកួតរបស់ A០ Vatan ច្រើនហើយ ព្រោះថៃម្នាក់នេះ ទើបតែប្រកួតជាមួយ ឡៅ ចន្ទ្រា ដែលជាសិស្សរួមក្លិបជាមួយ វង្ស វិឆ័យ កាលពីសប្តាហ៍មុន ដោយចាញ់ដោយពិន្ទុ ប៉ុន្តែការប្រកួតនោះ A០ Vatan ហាក់មិនសូវវាយសម្រុកទៅលើ ចន្ទ្រា ប៉ុន្មានឡើយ។
ប្រភពក្រៅផ្លូវការបានប្រាប់ដោយសុំមិនបញ្ចេញឈ្មោះថា៖ «ការប្រកួតតាមវិស័យឯកជនស្ថិតក្នុងទម្រង់រកស៊ីលក់ ឬផ្សព្វផ្សាយពាណិជ្ជកម្ម ខណៈដែលទីផ្សារប្រកួតមិនអនុលោមតាមបច្ចេកទេសសុទ្ធសាធនោះទេ។ និយាយឲ្យចំគេមានចេតនារៀបចំឲ្យកីឡាករខ្មែរ មានប្រៀបដើម្បីងាយទទួលបានជ័យជម្នះ មានការគាំទ្រពីមហាជន ខណៈដែលភាគីកីឡាករថៃអាចនឹងសម្របសម្រួល ដើម្បីរកទីផ្សារប្រកួតបានច្រើនផងដែរ។ ប្រភពដដែលបន្តថា៖ «បើមិនជឿឲ្យសង្កេតមើលលទ្ធផលកីឡាករកម្ពុជាយើងមួយចំនួន ចេញទៅប្រកួតនៅក្រៅប្រទេសទៅ គឺភាគច្រើនសន្លប់មិនដល់ទឹក គឺត្រឹមទឹកទី ១ នេះច្រើនណាស់»។
លោក ហង្ស ស៊ឺន គ្រូបង្វឹកកីឡាករ វង្ស វិឆ័យ បានប្រាប់ថា វិឆ័យ ហ្វឹកហាត់ និងត្រៀមប្រកួតបានល្អ ប៉ុន្តែយើងមិនហ៊ានអះអាងយ៉ាងណាមុនប្រកួតនោះឡើយ។ ទោះយ៉ាងណា លោកបានបញ្ជាក់ថា៖ «ខ្ញុំធានាបានតាំងពីដើមមក គឺកីឡាករក្នុងក្លិបរបស់ខ្ញុំ ធានាវ៉ៃអស់ពីសមត្ថភាព ដោយគ្មានកីឡាករណាមួយ ជាប់ពិន័យពីការប្រកួតមិនប្រក្រតីនោះឡើយ ហើយភាគច្រើនការចាញ់ ឬឈ្នះ មិនចង់និយាយត្រឹមឈរទឹកបានល្អប៉ុណ្ណោះទេ តែវ៉ៃអស់ពីសមត្ថភាពទៅតាមគំនិតរបស់ខ្ញុំ»។
ចំណែកលោក ថៃ អ៊ូ អ្នកនាំកីឡាករថៃ មកប្រកួតនិយាយថា៖ «កីឡាករថៃ Ao Vatan នេះ ពិតជាខ្លាំងមែន និងមានតម្លៃខ្លួនប្រកួតខ្ពស់ជាងគេ ប៉ុន្តែខ្ញុំគ្រាន់តែជាអ្នករកទីផ្សារឲ្យមានការប្រកួត គឺគេមិនឲ្យនិយាយរឿងបច្ចេកទេស ការចាញ់ ឈ្នះ ឬការវិភាគណាមួយនោះទេ ព្រោះសិទ្ធិរបស់ខ្ញុំ នាំកីឡាករថៃ ឬកីឡាករបរទេសមកប្រកួត ទៅតាមការចង់បានរបស់សង្វៀន និងមន្ត្រីបច្ចេកទេសសហព័ន្ធកីឡាប្រដាល់គុនខ្មែរតែប៉ុណ្ណោះ»។
លោក ហង្ស ស៊ឺន បានបន្តថា៖ «បញ្ហាថៃវ៉ៃអស់ពីសមត្ថភាព ឬមិនអស់ខ្ញុំ ក៏មិនអាចដឹងដែរ ព្រោះភារកិច្ចត្រួតពិនិត្យពីគណៈកម្មការខាងម្ចាស់សង្វៀន ព្រមទាំងស្ពនស័រគេមើលបន្ថែម ចំណែកខ្ញុំសុំមិននិយាយពីបច្ចេកទេសនោះឡើយ»។
ដោយឡែកជុំវិញការផ្គូផ្គងកីឡាករបរទេសមកប្រកួតនៅស្រុកខ្មែរ តែងតែជួបបញ្ហាផ្លាស់ប្តូរគូប្រកួតភ្លាមៗក៏ស្ថិតក្នុងភាពមន្ទិលរវាងជំនួបរបស់ វង្ស វិឆ័យ និង Ao Vatan លើកនេះដែរ។ ប៉ុន្តែលោក ញាន សុធី ប្រធានគ្រប់គ្រងកម្មវិធីបានប្រាប់ថា៖ «គិតមកដល់ម៉ោងនេះ យើងគ្មានព័ត៌មានណាត្រូវផ្លាស់ប្តូរនោះទេ ប៉ុន្តែបើយោងតាមច្បាប់របស់កីឡា គឺកីឡាមានបញ្ហាសុខភាព ឬលើសទម្ងន់ ឬរក្សាបទបញ្ជាប្រកួតមិនបានដូចជាមកមិនទាន់ពេលវេលា គឺត្រូវពិន័យឲ្យចាញ់ដោយស្វ័យប្រវត្តិ និងរកកីឡាករផ្សេងដាក់ជំនួសហើយនេះ គឺជាអ្វីដែលយើងកំពុងអនុវត្តជាក់ស្តែង»៕
