.jpg)
ចាន់ វឌ្ឍនាកា ពេលជួយក្រុមបឹងកេតប្រកួតជាមួយក្រុមទ័ពកាលពីឆ្នាំមុន។ ស្រង ម៉េងស្រ៊ុន
ភ្នំពេញ: «ខ្ញុំស្រឡាញ់កម្ពុជា និងស្រឡាញ់ក្លិបបាល់ទាត់បឹងកេត» បានក្លាយជាពាក្យពេចន៍ចុងក្រោយដែលខ្សែប្រយុទ្ធ ចាន់ វឌ្ឍនាកា បានបន្សល់ទុកនៅក្នុងវីដេអូឃ្លីបរបស់ក្លិបបាល់ទាត់បឹងកេត បន្ទាប់ពីរូបគេបានសម្រេចចាកចេញពីក្លិបក្នុងស្រុកមួយនេះ ដើម្បីសម្រេចបំណងទៅលេងនៅលីកកំពូលម៉ាឡេស៊ីជាលីកទី ២ ក្នុងឆ្នាំ ២០១៩ នេះ។
ចាន់ វឌ្ឍនាកា ធ្លាប់បានទទួលការខកចិត្តម្តងហើយសម្រាប់ការចេញទៅលេងនៅក្លិប Pahang កាលពីដើមឆ្នាំ ២០១៨ បន្ទាប់ពីក្លិបលេងនៅលីកកំពូលម៉ាឡេស៊ីនេះបានសម្រេចបញ្ចប់កុងត្រាជាមួយរូបគេត្រឹមពាក់កណ្តាលរដូវកាលនោះ។ ប៉ុន្តែកីឡាករមានដើមកំណើតនៅខេត្តកំពត វឌ្ឍនាកា នៅតែចង់ចេញទៅប្រកបអាជីពនៅលើទឹកដីម៉ាឡេស៊ីតាមរយៈការទៅរួមរស់ជាមួយក្លិប PKNS FC ដែលទើបទទួលបានលេខ ៣ ក្នុងលីកកំពូលម៉ាឡេស៊ីកាលពី ២០១៨។
លោក បែ មករា អ្នកចាត់ការទូទៅក្លិបបឹងកេតបានប្រាប់ភ្នំពេញ ប៉ុស្តិ៍ កាលពីថ្ងៃអង្គារថា៖ «ចាន់ វឌ្ឍនាកា បានបញ្ចប់កុងត្រាជាមួយក្លិបបឹងកេតហើយ ហើយការចេញទៅប្រកបអាជីពនៅលីកកំពូលម៉ាឡេស៊ីជាលើកទី ២ នេះជាការសម្រេចចិត្តរបស់គាត់ផ្ទាល់ អ៊ីចឹងក្លិបមានតែជួយជ្រោមជ្រែង ដើម្បីបំពេញបំណងរបស់គាត់»។
លោកបានបង្ហាញការសោកស្តាយសម្រាប់ការចាកចេញរបស់ ចាន់ វឌ្ឍនាកា ដោយនិយាយថា៖ «គាត់ហាក់ដូចជាកីឡាករឆ្នើមប្រចាំក្លិបធ្លាប់នៅជាមួយយើងយូរ និងបានជួយសាងភាពល្បីល្បាញនៅក្នុងក្លិប អ៊ីចឹងជាធម្មតាការបាត់បង់កីឡាករឆ្នើមមានលំដាប់លេខ ១ ក្នុងស្រុកគឺយើងមានការសោកស្តាយខ្លាំង ប៉ុន្តែដើម្បីអនាគតកីឡាករ និងដើម្បីបើកផ្លូវឲ្យកីឡាករខ្មែរយើងផ្សេងៗទៀតបានទៅលេងនៅក្រៅប្រទេស យើងត្រូវតែធ្វើការលះបង់»។
យ៉ាងណាក៏ដោយអ្នកចាត់ការទូទៅដែលធ្លាប់មានបទពិសោធទៅដឹកនាំក្រុមនៅប្រទេសថៃលោក បែ មករា នៅតែមានការគាំទ្រទៅលើការសម្រេចចិត្តរបស់ខ្សែប្រយុទ្ធក្រុមជម្រើសជាតិកម្ពុជា ចាន់ វឌ្ឍនាកា ក្នុងការទៅប្រកបអាជីពនៅលីកកំពូលម៉ាឡេស៊ីដោយលោកគិតថា វឌ្ឍនាកា នឹងមានអនាគតជាងការលេងនៅក្នុងស្រុក។
លោក បែ មករា បានបញ្ជាក់ថា៖ «យើងដឹងហើយថាសមត្ថភាពរបស់ ចាន់ វឌ្ឍនាកា គួរតែទៅលេងនៅលីកដែលល្អជាងយើង ហើយជាធម្មតាយើងផ្តល់ឱកាសដល់កីឡាករខ្មែរទាំងអស់ដែលមានក្លិបល្អៗក្រៅប្រទេសចង់បានគឺយើងឲ្យគាត់ទៅ ព្រោះការទៅលេងនៅក្រៅប្រទេស វាមិនត្រឹមតែទទួលបានចំណូលច្រើនជាងក្លិបនៅក្នុងស្រុកនោះទេ ប៉ុន្តែគាត់អាចសាងកេរ្តិ៍ឈ្មោះរបស់គាត់ និងអាចសាងកិត្តិយសរបស់ប្រទេសជាតិនៅលើឆាកអន្តរជាតិទៀតផង»។
ជាមួយគ្នានេះក្លិបបឹងកេតក៏បានសរសេរបង្ហោះនៅលើផេចហ្វេសប៊ុករបស់ខ្លួនជូនពរដល់ ចាន់ វឌ្ឍនាកា ឲ្យទទួលបានជោគជ័យសម្រាប់ការផ្ទេរទៅលេងនៅក្លិបថ្មី PKNS FC របស់ម៉ាឡេស៊ីនារដូវកាលថ្មីនេះផងដែរ ហើយបឹងកេតក៏នាំចូលកីឡាករបរទេសល្អៗ ដើម្បីត្រៀមការប្រកួតលីកកំពូលកម្ពុជាឆ្នាំ ២០១៩ នេះដោយគ្មានវត្តមាន វឌ្ឍនាកា។
ទាក់ទងទៅនឹងបញ្ហានេះលោក បែ មករា បានបង្ហើបថាគិតមកដល់ពេលនេះក្លិបបឹងកេតបាននាំយកកីឡាករបរទេសគ្រប់ ៥ នាក់សម្រាប់ត្រៀមរដូវកាលថ្មីនេះរួចរាល់ហើយ គ្រាន់តែយើងមិនទាន់បង្ហាញគឺយើងទុកប្រកាសជាផ្លូវការសរុបនៅក្នុងសន្និសីទកាសែតដែលក្លិបគ្រោងនឹងធ្វើនៅថ្ងៃទី ១៥ ខែកុម្ភៈ ហើយការត្រៀមខ្លួនលើកនេះយើងសង្ឃឹមថា យើងនឹងអាចធ្វើបានល្អជាងមុន៕
