.jpg)
ការប្រកួតរបស់កីឡាករវាយកូនឃ្លីលើតុកម្ពុជា ក្នុងស៊ីហ្គេម កន្លងមក។ រូប ភ្នំពេញ ប៉ុស្តិ៍
ភ្នំពេញ៖ សហព័ន្ធកីឡាវាយកូនឃ្លីលើតុកម្ពុជា (ហៅប៉េងប៉ុង) បានត្រៀមផែនការយុទ្ធសាស្ត្រក្នុងការបញ្ជូនអត្តពលិកចំនួន ៨ នាក់ (ស្រី ៣ នាក់) ទៅហ្វឹកហាត់នៅប្រទេសចិន បំប៉នបច្ចេកទេសឲ្យមានសមត្ថភាពខ្ពស់ ដើម្បីដណ្តើមយកលទ្ធផលឈ្នះក្នុងព្រឹត្តិការណ៍ស៊ីហ្គេម លើកទី ៣២ ឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ ខណៈពេលនេះក្រុមថ្នាលជម្រើសជាតិកីឡាវាយកូនឃ្លីលើតុ ក៏បានប្រមូលផ្តុំហ្វឹកហាត់ឡើងវិញផងដែរ បន្ទាប់ពីក្រសួងអប់រំ យុវជន និងកីឡា អនុញ្ញាតជាថ្មី។
លោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា ទទួលស្គាល់ថា ចំណុចប្រឈម ពិតជាមានហើយសម្រាប់ការហ្វឹកហាត់ និងសមត្ថភាពរបស់អត្តពលិកយើងបច្ចុប្បន្ន មិនទាន់ធានាបានថា ប្រកួតប្រជែងក្នុងកម្រិតតំបន់មានប្រៀបជាងគេនៅឡើយទេ ហេតុនេះការហ្វឹកហាត់នៅក្រៅប្រទេសពិសេសប្រទេសចិន គឺជាគោលដៅសំខាន់ដែលយើងរំពឹងខ្ពស់។
លោកបានប្រាប់ភ្នំពេញ ប៉ុស្តិ៍ ថា៖ «ខ្ញុំនិយាយដោយត្រង់ កីឡាវាយកូនឃ្លីលើតុកម្ពុជា ត្រូវតែស្វែងរកការហ្វឹកហាត់នៅក្រៅប្រទេស ពិសេសប្រទេសចិន គឺយ៉ាងហោចណាស់ ១ ឆ្នាំឲ្យបានចំនួន ៩ ខែដែរ ទើបកម្រិតបច្ចេកទេសអត្តពលិកយើងឡើង និងចូលរួមប្រកួតកម្រិតអន្តរជាតិមានលក្ខណៈប្រហាក់ប្រហែលគេ ឬអាចដណ្តើមបានមេដាយជូនជាតិ»។
យ៉ាងណាក៏ដោយ នៅក្នុងវិបត្តិជំងឺកូវីដ ១៩ នេះ ផែនការហ្វឹកហាត់ក៏ដូចជាប្រកួតរបស់ក្រុមវាយកូនឃ្លីលើតុនៅលើឆាកអន្តរជាតិ ត្រូវបានខកខាន និងពន្យារពេលអស់។ ប៉ុន្តែតាមការស្ទាបស្ទង់ស្ថានភាពកូវីដ ១៩ នេះ ផែនការហ្វឹកហាត់នៅបរទេសរបស់កីឡាវាយកូនឃ្លីលើតុ អាចនឹងត្រៀមចេញនៅខែវិច្ឆិកា ឆ្នាំ ២០២០ ជាមួយប្រភេទកីឡាផ្សេងទៀត។
លោក ស៊ុន សុទ្ធារិទ្ធ បន្ថែមថា៖ «បញ្ហាកូវីដ ១៩ នាំឲ្យខកខានផែនការត្រៀម និងការប្រកួតនៅអន្តរជាតិជាច្រើន ប៉ុន្តែបច្ចុប្បន្ននៅពេលកូវីដស្ងប់ និងមានការអនុញ្ញាតពីក្រសួងផែនការរៀបចំប្រកួតជើងឯកជាតិប្រចាំឆ្នាំ ក្រោមការគាំទ្រពីក្រសួងអប់រំ នឹងពន្យារពេលរហូតដល់ខែធ្នូ ឆ្នាំ ២០២០ ដើម្បីទុកពេលឲ្យបានច្រើន ទៅលើការរៀបចំហ្វឹកហាត់ជាចម្បង។ ចំណែកការរៀបចំប្រកួតឲ្យបានច្រើនលើកក្នុង ១ ឆ្នាំៗនោះ ដូចយើងសំលៀងកាំបិត គឺកាន់តែសំលៀង កាន់តែមុត ហើយដូចគ្នាទៅនឹងអត្តពលិកយើងកាន់តែប្រកួត កាន់តែមានសមត្ថភាពល្អ»។
គួររំឭកថា លោក ស៊ុន សុទ្ធារិទ្ធ ធ្លាប់ដកខ្លួនពីតួនាទីជាអគ្គលេខាធិការ សហព័ន្ធកីឡាវាយកូនឃ្លីលើតុកម្ពុជា អស់រយៈពេលជាង ៥ ឆ្នាំ ដោយបញ្ហាមិនចុះសម្រុងគ្នា ប៉ុន្តែកាលពីឆ្នាំ ២០១៩ តាមរយៈមហាសន្និបាតសហព័ន្ធដែលរៀបចំរចនាសម្ព័ន្ធដឹកនាំថ្មី មានលោកនាយឧត្តមសេនីយ៍ គៀត ចន្ទថារិទ្ធិ ជាប្រធាន លោក ស៊ុន សុទ្ធារិទ្ធ ត្រូវបានជ្រើសតាំងជាអគ្គលេខាធិការម្តងទៀត។
លោក ស៊ុន សុទ្ធារិទ្ធ បានអះអាងថា៖ «ខ្ញុំសង្ឃឹមថា ប្រធាន និងថ្នាក់ដឹកនាំសហព័ន្ធថ្មី នឹងដឹកនាំបានល្អ ក្នុងការជួយឲ្យអត្តពលិកដណ្តើមបានមេដាយក្នុងព្រឹត្តិការណ៍លំដាប់អន្តរជាតិបន្ទាប់ពីផែនការយុទ្ធសាស្ត្រហ្វឹកហាត់នៅក្រៅប្រទេស បានយ៉ាងហោច ៩ ខែ ក្នុង ១ ឆ្នាំ និងមានការប្រកួតច្រើនលើកក្នុង ១ ឆ្នាំៗ»។
លោកប្រាប់ទៀតថា បច្ចុប្បន្នយើងមានក្រុមជម្រើសជាតិថ្នាល ៨ នាក់ (ស្រី ២ នាក់) និងគ្រូបង្វឹក ២ នាក់ ចំណែកក្រុមជម្រើសជាតិធំ ដែលត្រៀមមិនទាន់បានប្រមូលផ្តុំមាន ៧ នាក់ (ស្រី ១ នាក់) និងគ្រូបង្វឹក ២ នាក់ ហើយថវិកាគាំទ្របានពីក្រសួងអប់រំ យុវជន និងកីឡា មានចំនួន ៦០ លានរៀល ក្នុង ១ ឆ្នាំ ដែលចំណាយទៅលើការបណ្តុះបណ្តុះបណ្តាល, ការងាររដ្ឋបាល និងការប្រកួតជម្រើសជើងឯកថ្នាក់ជាតិ៕
