ភ្នំពេញៈ កីឡាករកម្ពុជា សារឿន ច័ន្ទ បានចាញ់ជើងខ្លាំងរបស់ថៃ Supper Man យ៉ាងផុយស្រួយបំផុតគឺត្រឹមទឹកទី ១ នៅក្នុងការប្រកួតវគ្គជម្រុះដណ្តើមខ្សែក្រវាត់ Wurkz ទម្ងន់ ៦០ គីឡូក្រាមនៅសង្វៀន SEATV កាលពីល្ងាចថ្ងៃអាទិត្យ ចំណែក ហេង វាសនា ក៏មិនអាចរក ៣ ពិន្ទុថែមដូចគ្នា ខណៈរូបគេបានចាញ់ថៃ Chhai Yo ដោយពិន្ទុទាំងប្រផិតប្រផើយនោះ។
តាមលទ្ធផលប្រកួតចាញ់នេះត្រូវបានគេមើលឃើញថាកីឡាករ ហេង វាសនា និង សារឿន ច័ន្ទ នៅសល់ឱកាសស្តួចស្តើងបំផុតក្នុងការប្រជែងយកកៅអីផ្តាច់ព្រ័ត្រដែលមានតែ ១ ប្រចាំនៅពូលកម្ពុជា ព្រោះ ៣ ប្រកួតនេះ ហេង វាសនា និង សារឿន ច័ន្ទ ឈ្នះ ១ ប្រកួត និងចាញ់ ២ ប្រកួតមាន ៥ ពិន្ទុស្មើគ្នា ដោយស្ថិតនៅពីក្រោមកីឡាករ លន បញ្ញា ដែលឈរនៅលើកំពូលតារាងបណ្តោះអាសន្នដោយឈ្នះ ២ ចាញ់ ១ និងរង់ចាំការប្រកួតនៅសប្តាហ៍ក្រោយទៀត។
សម្រាប់ទិដ្ឋភាពប្រកួតជាក់ស្តែងគឺមានភាពស្វិតស្វាញ ព្រោះ ហេង វាសនា បានប្រឹងប្រែងយ៉ាងល្អ និងអស់ពីសមត្ថភាព តែ Chhai Yo មានស្នៀតដកថយស្រង់យកពិន្ទុបានល្អជាង។ បន្ថែមពីលើនេះការវាយចេញរបស់ ហេង វាសនា មិនសូវចំគោលដៅល្អ ប៉ុន្តែលទ្ធផលពីសំណាក់ចៅក្រមទាំង ៥ បានផ្តល់ពិន្ទុចាញ់កីឡាករថៃ ៣ ទល់នឹង ២ ក្នុងលក្ខណៈប្រផិតប្រផើយ។
ហេង វាសនា បាននិយាយក្រោយការប្រកួតថា៖ «ខ្ញុំរំពឹងឈ្នះ តែលទ្ធផលបែរជាចាញ់ទៅវិញ។ ការកាត់សេចក្តីនេះគឺកីឡាករថៃហាក់បីដូចជាមានសំណាងជាងកីឡាករខ្មែរ ព្រោះកន្លងមកបើការប្រកួតក្នុងលក្ខណៈប្រហាក់ប្រហែលគ្នា ថៃភាគច្រើនគឺឈ្នះជារឿយៗ»។
ប៉ុន្តែលោក រាជ សុផែន មន្ត្រីបច្ចេកទេសរបស់សហព័ន្ធកីឡាប្រដាល់គុនខ្មែរ បាននិយាយថា៖ «ចៅក្រមកាត់ក្តីនេះត្រឹមត្រូវហើយជាធម្មតាកីឡាករដែលចាញ់មួយចំនួនតែងតែមិនអស់ចិត្ត ប៉ុន្តែគេមិនមែនជាអ្នកវ៉ៃផង ដាក់ពិន្ទុផង ដោយខ្លួនឯងនោះទេ»។
ចំណែកកីឡាករជើងចាស់ សារឿន ច័ន្ទ ដែលប្រកួតចាញ់ក្នុងលក្ខណៈផុយពេកនោះបានធ្វើឲ្យក្រុមអ្នកទស្សនាផ្ទាល់ នៅជិតសង្វៀនប្រដាល់លាន់មាត់ថា «ចោលលុយ» គឺមានន័យថាស្តាយលុយដែលការប្រកួតលក្ខណៈអន្តរជាតិ ដែលមានតម្លៃខ្លួនដល់ទៅ ៤០០ ដុល្លារ តែឈរប្រកួតមិនបាន ២ នាទីផង ក៏បរាជ័យយ៉ាងលឿនបំផុត។
ក្រោយពេលកីឡាករថៃ Supper Man ប្រើស្នៀតទាត់ល្អចូលកញ្ចឹងក គឺបានធ្វើឲ្យ សារឿន ច័ន្ទ ដួលហើយអាជ្ញាកណ្តាល យឹម សុខុម រាប់ចំនួន ១០ តែដោយសារ សារឿន ច័ន្ទ ស្ថិតក្នុងសភាពឈរមិននឹងលោកក៏បញ្ឈប់ការប្រកួតតែម្តងទៅ។ ភ្លាមៗនោះ សារឿន ច័ន្ទ ក៏តវ៉ាដោយនិយាយថា៖ «ខ្ញុំនៅប្រកួតបាន» ប៉ុន្តែវាជាច្បាប់ប្រកួតដែលមិនអាចតថ្លៃបានទេនៅពេលអាជ្ញាកណ្តាលបានរាប់ដល់ ១០ ទៅហើយនោះ។
គិតត្រឹមវគ្គជម្រុះសប្តាហ៍ទី ៧ នេះបង្ហាញថាកីឡាករថៃមានសមត្ថភាពល្អជាងកីឡាករកម្ពុជាដោយពួកគេបានឈ្នះជាបន្តបន្ទាប់។ ជាមួយគ្នានេះ Supper Man បានឈ្នះទាំង ៣ លើក មាន ៩ ពិន្ទុ និងកំពុងឈរនៅលើគេ ក្នុងចំណោមកីឡាករថៃទាំង ៤ នាក់ដែលតាមពីក្រោយដោយ Chhai Yo។ ចំណែកជើងខ្លាំងម្នាក់ទៀតរបស់ថៃ Chhav Vallith ដែលមានសមត្ថភាពខ្ពស់ ហើយគេរំពឹងខ្ពស់ថាអាចនឹងឈានចូលទៅវគ្គផ្តាច់ព្រ័ត្រនោះ បែរជាធ្លាក់បាត់ទៅហើយដោយសារតែឈ្នះ ១ និងចាញ់ ២ ប្រកួតនោះ៕