ភ្នំពេញ៖ កីឡាករលំដាប់ខ្លាំងកម្រិតមធ្យមរបស់កម្ពុជា អេលីត វិចិត្រ របស់ក្លិបគុនខ្មែរប៉ែនកាក់ និង សារ៉ាយ ចំរើន មកពីក្លិបរាជសីហ៍ខេត្តបន្ទាយមានជ័យ បានចាញ់អ្នកប្រយុទ្ធមកពីប្រទេស ចិន និងថៃយ៉ាងគ្រាំគ្រា ដោយពួកគេតស៊ូបាន មិនលើស ៣ នាទីផង ត្រូវទទួលរងសន្លប់ធំដូចគ្នា នៅក្នុងការប្រកួត Mas Fight របស់សង្វៀនថោន កាលពីថ្ងៃអាទិត្យ។ ជើងខ្លាំង ផល សោភ័ណ្ឌ បានវ៉ៃប្តូរជាមួយចិន Sun Zhixiang យ៉ាងស្វិតស្វាញ គ្រប់ចំនួន ៩ នាទីពេញ ដើម្បីបានលទ្ធផលស្មើគ្នា។
ជាមួយគ្នានេះ ប្រភពពីមហាជនអ្នកតាមដានប្រដាល់ការប្រកួតនេះ បានលាន់មាត់ថា ដូចខ្វះកីឡាករកម្ពុជា ទើបដាក់សមត្ថភាពកីឡាករកម្រិតសឹងក្រោមមធ្យម ប៉ះជាមួយជើងខ្លាំងមកពីប្រទេស ចិន និងជើងខ្លាំងមកពីថៃ។
កម្រិតបច្ចេកទេសរបស់កីឡាករ សារ៉ាយ ចំរើន មិនទាន់មានឈ្មោះល្បីនៅឡើយ គឺសូម្បីតែសង្វៀនប្រដាល់នៅភ្នំពេញ ក៏មិនសូវឃើញគេប្រកួតក្នុងលំដាប់គូឯក ឬគូឯករងនៅឡើយ ប៉ុន្តែលើកនេះដាក់ឲ្យជួបជើងខ្លាំងរបស់ថៃ Angkalek Sit Pholek ដែលធ្លាប់ស្មើជើងខ្លាំងកំពុងល្បីឈ្មោះ វង្ស វិឆ័យ។
តាមប្រភពច្បាស់ការពីគណៈកម្មការរៀបចំបានឲ្យដឹងថា សារ៉ាយ ចំរើន ធ្លាប់ប្រកួតបានតែ ៣២ លើកប៉ុណ្ណោះ គឺមានបទពិសោធខ្ចីនៅឡើយ ប៉ុន្តែ Angkalek Sit Pholek ធ្លាប់ប្រកួត រហូតដល់ ១៣១ ដងឯណោះ ហើយថៃម្នាក់នេះ មានកម្រិតបច្ចេកទេសល្អកែង និងជង្គង់មុតស្រួច មានបទពិសោធល្អដាច់ គឺសូម្បីតែជើងខ្លាំងកម្ពុជាកំពុងល្បីឈ្មោះ វង្ស វិឆ័យ បានត្រឹមស្មើប៉ុណ្ណោះ។
ចំពោះការប្រកួតជាក់ស្តែងវិញ កីឡាករ សារ៉ាយ ចំរើន តស៊ូបានត្រឹម ៣ នាទី គឺទទួលរងនូវស្នៀតកែង និងជង្គង់របស់ Angkalek Sit Pholek បណ្តាលឲ្យដួលសន្លប់យ៉ាងគ្រាំគ្រាបំផុត ខណៈដែលសមត្ថភាព គឺមិនអាចតដៃបានឡើយ។
ស្រដៀងគ្នានេះ អេលីត វិចិត្រ ដែលប្តូរកណ្តាប់ដៃ និងជង្គង់ជាមួយចិន Hin Chung នោះ បានត្រឹមតែ ២ នាទី ក៏ទទួលរងនូវជង្គង់ធ្ងន់ៗបណ្តាលឲ្យអាជ្ញាកណ្តាលរាប់ ៨ ដល់ទៅ ២ លើក ហើយសន្លប់ធំតែម្តង។
ចំណែកកីឡាករជើងខ្លាំង ផល សោភ័ណ្ឌ របស់ក្លិបតាឡឺមានរិទ្ធិ បានប្រឹងប្រែងអស់ពីសមត្ថភាពទប់ទល់កណ្តាប់ថៃជាមួយកីឡាករចិន Sun Zhxiang បានចប់ ៩ នាទី ហើយតាមច្បាប់ប្រកួតរបស់ Mas Fight Cambodia គឺបានប្រកាសឲ្យស្មើគ្នា ខណៈដែលស្ថានភាពប្រកួត ផល សោភ័ណ្ឌ ចង់យ៉ាប់ និងចាញ់ប្រៀបកីឡាករចិននោះផងដែរ។
យ៉ាងណា ការផ្គូផ្គងរបស់គណៈកម្មការប្រកួតដែលបានសហការជាមួយគណៈកម្មការខ្មែរ និងគណៈកម្មការនៅក្រុងហុងកុងបានទទួលរងការរិះគន់ពីអ្នកតាមដានទស្សនាដោយសារតែកម្រិតបច្ចេកទេសរវាងកីឡាករកម្ពុជា និងថៃនោះខុសពីគ្នាដាច់តែម្តង។
ជុំវិញបញ្ហានេះ លោក ស្រ៊ុន កុសល នាយកគ្រប់គ្រងកម្មវិធីនៅសង្វៀនថោន បានពន្យល់ថា៖ «បញ្ហាផ្គូផ្គងនៅសប្តាហ៍ទី ២០ នេះ មានការលំបាកមែន ព្រោះយើងលំបាករកកីឡាករ ដែលមានសមត្ថភាពប្រហាក់ប្រហែលគ្នា ដ្បិតអីកីឡាករខ្មែរយើងភាគច្រើនជាប់រវល់កម្មវិធីប្រកួតច្រើន ហើយបេក្ខភាពរបស់កីឡាករ សារ៉ាយ ចំរើន ប៉ះជើងខ្លាំងថៃ Angkalek Sit Pholek គឺជាកីឡាករបម្រុង ឡើងជំនួសគេមែន។ ប៉ុន្តែការចាញ់របស់កីឡាករ អេលីត វិចិត្រ ជាមួយ Hin Chung គឺសមត្ថភាពប្រហាក់ប្រហែលគ្នា ប៉ុន្តែធម្មតាការវ៉ៃសម្រុកប្តូរកណ្តាប់ដៃ និងជង្គង់គ្នា គឺចំគោលដៅល្អសន្លប់ មិនអាចធានាបាននោះឡើយ»។
ជាមួយគ្នានេះ ចំពោះការរៀបចំប្រកួតដោយមានកីឡាករបរទេសមកពីចម្រុះជាតិសាសន៍ ដែលគួរឲ្យមានការបារម្ភពីហានិភ័យវីរុសកូវីដ ១៩ នោះ លោក ស្រ៊ុន កុសល បានបន្តថា៖ «ចំពោះបញ្ហាការការពារសុខភាពទប់ទល់ទៅនឹងជំងឺកូវីដ ១៩ គឺខាងស្ថានីយបានរៀបចំអនាម័យល្អ ដោយដាក់អាល់កុល និងវាស់កម្តៅ នៅច្រកចូល និងបាញ់ថ្នាំសម្លាប់មេរោគគ្រប់ទីកន្លែងអង្គុយក្នុងទីលានប្រកួត»។
លោកបានបញ្ជាក់ថា៖ «ទោះជាយ៉ាងណា បើស្ថានភាពជាក់ស្តែង ឬមានបទបញ្ជាពីថ្នាក់លើ ឬក្រសួងសុខាភិបាល ឬរាជរដ្ឋាភិបាល យើងនឹងអនុវត្តតាមភ្លាម ប៉ុន្តែបច្ចុប្បន្នយើងនៅតែបន្តសកម្មភាពប្រកួតជាធម្មតា តាមកម្មវិធីដែលបានត្រៀមរួចកន្លងមកសិន»៕