.jpg)
ពុយ វណ្ណៈ ត្រូវបានលើកដៃឲ្យឈ្នះក្នុងការប្រកួតថ្មីៗនេះ។ យឺន ពន្លក
ភ្នំពេញ៖ ក្រុមលទ្ធផលប្រកួតវគ្គជម្រុះចុងក្រោយសម្រាប់តំណែងកៅអី ២ ក្នុងវគ្គពាក់កណ្តាលផ្តាច់ព្រ័ត្រនៃពានរង្វាន់ TV5 Boxing Knock Out Serie នៅលើសង្វៀនប៉ុស្តិ៍លេខ ៥ កាលពីយប់ថ្ងៃសៅរ៍ចេញលទ្ធផលហើយ គឺសោម វិឆ័យ ទទួលបានជ័យជម្នះដូចរំពឹងទុកដោយធ្វើឲ្យ រឿម វណ្ណៈ ចាញ់ពិន្ទុដោយអស់ចិត្ត ប៉ុន្តែកីឡាករ ឡុង បេនលឿន ត្រូវបានគណៈកម្មការចៅក្រមសម្រេចឲ្យចាញ់កីឡាករ ពុយ វណ្ណៈ ទាំងមិនអស់ចិត្តហើយសុំតវ៉ាទាំងគ្រូ ទាំងសិស្សដោយហៅការកាត់សេចក្តីនេះជារឿងអយុត្តិធម៌នាំឲ្យកីឡាករចាញ់ខូចចិត្ត និងអស់ឱកាសឡើងទៅវគ្គបន្តទៀត។
ទោះជាយ៉ាងណា លទ្ធផលប្រកួតនេះត្រូវបានយកជាផ្លូវការតាមច្បាប់កីឡាដែលមិនអាចសើរើវិញបានឡើយ ប៉ុន្តែការប្តឹងតវ៉ាត្រូវបានលោក តែម ម៉ឺន ប្រធានសហព័ន្ធប្រដាល់គុនខ្មែរប្រាប់ភ្នំពេញប៉ុស្តិ៍ថា នឹងទទួលយកមកពិនិត្យឡើងវិញ ដើម្បីរកយុត្តិធម៌ជូនគេ។
ជំនួបប្រកួតចំនួន ២ គូចុងក្រោយនេះ អ្នកឈ្នះត្រូវបានទទួលកៅអីវគ្គពាក់កណ្តាលផ្តាច់ព្រ័ត្រ និងទទួលបានប្រាក់កក់រួចជាស្រេចពី ៥០០ ដុល្លារ ដល់ ៤ ០០០ ដុល្លារ ទៅតាមចំណាត់ថ្នាក់ពីលេខ ១ ដល់លេខ ៤។
ចំណែកកីឡាករ ពុយ វណ្ណៈ ដែលឆ្លងកាត់ការប្រកួតចំនួន ៣ ទឹកពេញជាមួយ ឡុង បេនលឿន គឺស្វិតស្វាញដូចគ្នា ប៉ុន្តែគណៈកម្មការ និងចៅក្រមផ្តល់ពិន្ទុឲ្យ ពុយ វណ្ណៈ ឈ្នះ នាំឲ្យ ឡុង បេនលឿន សុំតវ៉ាពីលទ្ធផលនេះ។
លោក ឡុង សាលវ័ន្ត គ្រូបង្វឹក ឡុង បេនលឿន ប្រាប់ភ្នំពេញប៉ុស្តិ៍ថា៖ «ការផ្តល់ពិន្ទុនោះ គឺល្ងីល្ងើនឹងមិនយកជំនាញក្នុងខ្លួនមកប្រើទេ គឺនិយមទៅលើបក្ខពួកព្រោះឡុង បេនលឿន មានពិន្ទុឈ្នះដាច់ពិសេសទឹកទី ៣ ជាទឹកផ្តាច់ព្រ័ត្រ»។
លោក ឡុង សាលវ័ន្ត បញ្ជាក់ថា តាមរូបភាពវីដេអូប្រកួតព្រមនឹងភ្នែកមហាជនគេឃើញទាំងអស់គ្នាហើយចំណុចដែល ឡុង បេនលឿន ឈ្នះគឺទី ១ ដើរចូលវាយសម្រុកដោយបោះជង្គង់ចូលគោលដៅល្អ។ ទី២ កម្លាំងនៅរឹងមាំល្អជាងចាប់ជើងរុញផ្តួលដៃគូនៅចុងទឹកចំនួន ២ លើកព្រមទាំងឱបឡើងក្បាច់ជង្គង់បានជានិច្ច។ ចំណុចនេះ គឺគ្មានឃើញចាញ់ត្រង់ណាទេ ខណៈ ២ ទឹកដំបូងក៍មានប្រៀបខ្លះៗមកហើយ។
លោកបានបន្ថែមថា៖ «លោក ចាន់ សុទ្ធ ប្រធានវិនិច្ឆ័យមិនលើកទូរស័ព្ទពីខ្ញុំ ដើម្បីទទួលពាក្យប្តឹងនោះឡើយ ប៉ុន្តែខ្ញុំនៅឆ្ងាយកន្លះម៉ោងធ្វើម្តេចទៅដល់? ទោះជាយ៉ាងណា ខ្ញុំ ឡុង សាលវ័ន្ត មិនសុខចិត្តទេបានប្តឹងទៅលោកប្រធានសហព័ន្ធ គឺលោក តែម ម៉ឺន គាត់បានសន្យាទទួលយកទៅពិនិត្យ ដើម្បីដោះស្រាយហើយ»។
លោក ចាន់ សុទ្ធ ប្រធានវិនិច្ឆ័យប្រចាំកម្មវិធីនោះ មិនអាចផ្តល់ពត៌មានទាក់ទងនឹងចៅក្រមផ្តល់ពិន្ទុបានទេប៉ុន្តែលោកនិយាយថា៖ «ការផ្តល់ឲ្យ ពុយ វណ្ណៈ ឈ្នះនោះគឺត្រឹមត្រូវរបស់ចៅក្រមហើយ...»៕
