.jpg)
កីឡាករ រឿម វណ្ណៈ នឹងត្រូវប្រកួតជាមួយ សោម វិឆ័យ ដើម្បីស្វែងរកអ្នកឈ្នះឡើងទៅវគ្គផ្តាច់ព្រ័ត្រ។ សហការី
ភ្នំពេញៈ កីឡាករ សោម វិឆ័យ ហាក់មានទំនុកចិត្តយកឈ្នះ រឿម វណ្ណៈ ក្នុងការប្រកួតវគ្គពាក់កណ្តាលផ្តាច់ព្រ័ត្រពានរង្វាន់ TV5 Boxing Knock Out Serie នៅលើសង្វៀនប៉ុស្តិ៍លេខ ៥ នាយប់ថ្ងៃសៅរ៍ ប៉ុន្តែ ពុយ វណ្ណៈ និង ឡុង បេនលឿន ហាក់ខ្លាចញញើតគ្នាមិនហ៊ាននិយាយពីការរំពឹងទុកមុន។
តាមប្រវត្តិជួបគ្នា ៣ លើកកន្លងមក សោម វិឆ័យ មិនដែលឈ្នះ រឿម វណ្ណៈ ទេ គឺចាញ់ ២ និងស្មើ ១ ប៉ុន្តែអ្វីដែលធ្វើឲ្យ សោម វិឆ័យ មានសង្ឃឹមឈ្នះ រឿម វណ្ណៈ លើកនេះដោយសាររូបគេមានយុទ្ធសាស្ត្របិទកែងឆ្វេងរបស់ រឿម វណ្ណៈ បន្ទាប់មកចូលលេងក្បាច់ជង្គង់យកឈ្នះបាន។
លោក ឡុង វិបុល គ្រូបង្វឹក សោម វិឆ័យ បានប្រាប់ថា ការហ្វឹកហាត់ និងតាំងចិត្ត ព្រមទាំងត្រៀមបានល្អ ហើយស្នៀតជង្គង់របស់ សោម វិឆ័យ គឺអាចមានប្រៀបជាងក្នុងការយកឈ្នះលើ រឿម វណ្ណៈ។
លោកបន្តថា៖ «សោម វិឆ័យ មានចំណុចខ្សោយកន្លងមក គឺខ្ជីខ្ជាក្នុងការហ្វឹកហាត់មិនបានល្អនាំឲ្យចាញ់ ប៉ុន្តែលើកនេះឃើញថា វាកំពុងប្រឹងប្រែងជាងមុន»។
ស្រដៀងគ្នានេះ សោម វិឆ័យ បាននិយាយថា៖ «ទោះជាខ្ញុំមិនធ្លាប់ឈ្នះ រឿម វណ្ណៈ ប៉ុន្តែខ្ញុំដឹងពីរបៀបប្រកួតលើកនេះគឺបិទ និងការពារកែងរបស់គេមិនឲ្យវាយចូល គឺធានាឈ្នះតាមរយៈក្បាច់ជង្គង់ ព្រោះការប្រកួតនេះមិនមែនឧបសគ្គធំដូចកាលប៉ះ គង់ សំបូរ នៅវគ្គ ៨ នាក់នោះទេ ហេតុនេះខ្ញុំសង្ឃឹមឈ្នះបានកៅអីនេះតែម្តង គឺ ៩០ ភាគរយ»។
រឿម វណ្ណៈ ដែលទើបតែផ្លាស់ពីខេត្តបន្ទាយមានជ័យមកនៅក្លិបអន្លង់វែងខេត្តឧត្តរមានជ័យកំពុងហ្វឹកហាត់បានល្អជាងមុន។
អ្នកស្រី សុខុម ជាអ្នកមើលខុសត្រូវលើ រឿម រណ្ណៈ និយាយថា៖ «វាមានកម្លាំងល្អជាងមុន ហើយការប្រកួតនេះមិនទាន់ហ៊ាននិយាយថាយ៉ាងម៉េចនោះទេ ពីព្រោះវគ្គនេះសំខាន់ប្រឹងដូចគ្នា។ វាមានស្នៀតកែងល្អ ប៉ុន្តែត្រង់ថា វាយចូលគោលដៅ ឬយ៉ាងណា យើងមិនទាន់ហ៊ានថាឈ្នះប៉ុន្មានភាគរយនោះឡើយ»។
ចំណែកការជួបគ្នារវាង ឡុង បេនលឿន និង ពុយ វណ្ណៈ កាន់តែលំបាកទស្សន៍ទាយខណៈដែល ពុយ វណ្ណៈ ជាជើងចាស់ធ្លាប់ឈ្នះក្នុងព្រឹត្តិការណ៍នេះ ១ លើកកន្លងមកហើយ ប៉ុន្តែ បេន លឿន កំពុងតែមានឈ្មោះល្បីក្នុងជំនាន់អ្នកស្រករក្រោយ ហើយគេមានកម្លាំងកាយ និងទឹកចិត្តប្រកួតក្លាហាន និងនិយាយមិនដែលអួតពីឈ្នះទេ ប៉ុន្តែលទ្ធផលមិនងាយចាញ់ទេ។
ឡុង បេនលឿន បាននិយាយថា៖ «ខ្ញុំមិនហ៊ាននិយាយមុនថាឈ្នះឬយ៉ាងណានោះទេ តែធានាវ៉ៃអស់ពីសមត្ថភាព»។
ចំណែកលោក ឡុង សាលវ័ន្ត ជាគ្រូបង្វឹកទាក់ទងមិនបានទេ ប៉ុន្តែគ្រូបង្វឹក ឡុង វិបុល ដែលតែងតែសហការជាមួយ ឡុង សាលវ័ន្ត បានអះអាងថា សមត្ថភាពរបស់ បេនលឿន បច្ចុប្បន្នកំពុងល្អ ហេតុនេះ ពុយ វណ្ណៈ គឺលំបាកទប់ទល់ណាស់។
លោក ឡុង វិបុល បានវាយតម្លៃថា៖ «បើតាមខ្ញុំគិតខ្លួនឯង ហ៊ានព្យាករថា ឡុង បេនលឿន មានសង្ឃឹមឈ្នះ ៦០ ភាគរយ ឯ ពុយ វណ្ណៈ ៤០ ភាគរយ»។
ចំណែក ពុយ វណ្ណៈ បាននិយាយថា៖ «ខ្ញុំហាត់ផង និងហ្វឹកហាត់ជាកងនគរបាលខេត្តសៀមរាបផង ដោយសារខ្ញុំទើបតែប្រឡងបានក្របខ័ណ្ឌថ្មីៗ។ ទោះជាយ៉ាងណា ខ្ញុំមិនហ៊ាននិយាយថា ឈ្នះ ឬចាញ់ទេ ព្រោះគេខ្លាំងដែរ»៕
