ភ្នំពេញ៖ ក្លិបបាល់ទាត់វិសាខា បានចាត់ទុកការឈ្នះពានរង្វាន់សម្តេច ហ៊ុន សែន ឆ្នាំ ២០២០ ថា ជាសមិទ្ធផលដ៏អស្ចារ្យ ដែលបានជួយឱ្យក្លិបទើបបង្កើតឡើងក្នុងឆ្នាំ ២០១៦ មួយនេះ ទទួលបានឱកាសដ៏ពិសេស គឺការបានទៅលេងនៅវគ្គជម្រុះ play off ពានរង្វាន់ AFC Cup 2021 ជាលើកដំបូង។
យ៉ាងណាក៏ដោយ សម្រាប់ការប្រកួតរដូវកាលថ្មីឆ្នាំ ២០២១ នេះ អ្នកចាត់ការទូទៅក្លិបវិសាខា កញ្ញា អ៊ូ បញ្ញាសុកិត្យា បានដាក់គោលដៅកាន់តែធំសម្រាប់ក្លិប ដែលមានមូលដ្ឋាននៅភ្នំពេញមួយនេះ ដើម្បីឈានទៅរកការឈ្នះពាននៅក្នុងស្រុក ពិសេសការធ្វើឱ្យបានល្អ នៅក្នុងការប្រកួត AFC Cup ដើម្បីចារកំណត់ត្រានៅក្នុងសៀវភៅប្រវត្តិសាស្រ្តរបស់ក្លិបផ្ទាល់។
តាមរយៈបទសម្ភាសជាមួយក្លិបផ្ទាល់ កញ្ញា អ៊ូ បញ្ញាសុកិត្យា បាននិយាយថា៖ «វិសាខា ទើបបានឈ្នះពានរង្វាន់សម្តេច ហ៊ុន សែន ឆ្នាំ ២០២០ ហើយការឈ្នះពាននេះ បានជួយឱ្យយើងបានទៅលេងនៅវគ្គជម្រុះពានរង្វាន់ AFC Cup 2021 អ៊ីចឹងយើងសង្ឃឹមយ៉ាងមុតមាំថា ការទទួលបានជោគជ័យទាំងអស់នេះ ដែលបងប្អូនបានជួយជំរុញជាមួយគ្នា គឺយើងនឹងបន្តដើរទៅដល់ AFC មួយកម្រិតទៀត ដែលយើងអាចកត់ត្រាទុក នៅក្នុងសៀវភៅប្រវត្តិសាស្រ្តរបស់ក្លិបទើបកកើត វិសាខារបស់យើង»។
អ្នកចាត់ការទូទៅជាស្រ្តីរូបនេះ បានបន្តថា៖ «ក្រៅពីការឈ្នះពានរង្វាន់សម្តេចនេះ គឺនៅឆ្នាំក្រោយយើងនៅតែបន្ត និងស្វែងរកពានមកជូនក្លិប និងអ្នកគាំទ្ររបស់យើងទាំងអស់គ្នា ហើយយើងតែងតែស្វែងរកកីឡាករ ដែលមានសមត្ថភាពល្អៗ មកចូលរួមជាមួយយើង។ ទោះជាកីឡាករក្នុងស្រុក និងក្រៅស្រុក យើងតែងតែចម្រាញ់ពួកគាត់ ពង្រឹងសមត្ថភាព កំណែទម្រង់នៃការលេង ដើម្បីឈានទៅរកពាននៅឆ្នាំ ២០២១ នេះ»។
បន្ថែមទៅលើការដាក់គោលដៅប្រជែងឱ្យបានពានក្នុងស្រុកនេះ វិសាខាក៏ចង់បង្កើតបាននូវកំណត់ត្រាល្អសម្រាប់ការប្រកួតនៅក្រៅប្រទេសផងដែរ ខណៈការប្រកួតជម្រុះវគ្គ play off ពានរង្វាន់ AFC Cup 2021 នេះ ក្រុមវិសាខារបស់កម្ពុជា ត្រូវប្រកួតជម្រុះជុំទី២ ជាមួយក្រុម Lalenok United របស់ទីម័រខាងកើត ហើយក្រុមណាឈ្នះ នឹងត្រូវឡើងទៅជួបក្រុម Persipura Jayapura របស់ឥណ្ឌូនេស៊ី។
កញ្ញា អ៊ូ បញ្ញាសុកិត្យា បានបញ្ជាក់ថា៖ «មិនត្រឹមតែពានរង្វាន់នៅក្នុងស្រុកទេ ប៉ុន្តែផ្នែក ១ នៃការអភិវឌ្ឍ និងគោលដៅរបស់ក្លិបវិសាខា នៅឆ្នាំនេះ គឺការឈានទៅលេងកម្រិតអន្តរជាតិ ដោយយើងនឹងនាំយកទង់ជាតិប្រទេសកម្ពុជា និងទង់ក្លិបបាល់ទាត់វិសាខាទៅដល់ប្រទេសជិតខាង ដើម្បីឱ្យគេស្គាល់បាល់ទាត់កម្ពុជាយើង និងក្លិបវិសាខាផងដែរ»។
កញ្ញាបានបន្ថែមថា៖ «នៅរដូវកាលថ្មីឆ្នាំ ២០២១ នេះ យើងនឹងព្យាយាមប្រកួតប្រជែង ដើម្បីទទួលបានសមិទ្ធផលថ្មី បន្ថែមទៅលើអ្វីដែលយើងមាននៅឆ្នាំ ២០២០ សម្រាប់ជូនដល់បងប្អូនទាំងអស់គ្នា ហើយទាំងនេះ ជាមោទនភាពជាតិរបស់យើងទាំងអស់គ្នា បើសិនជាយើងបានទៅដល់គោលដៅកំណត់នោះ»។
អ្នកចាត់ការទូទៅរូបនេះ បានបញ្ជាក់បន្ថែមថា៖ «យ៉ាងណាក៏ដោយ អ្វីទាំងអស់នេះ មិនអាចជោគជ័យទេ បើសិនជាគ្មានអ្នកទាំងអស់គ្នាជួយគាំទ្រ ដូច្នេះខ្ញុំសូមអំពាវនាវដល់អ្នកគាំទ្រទាំងអស់បន្តគាំទ្រក្លិបវិសាខា ដើម្បីឆ្ពោះទៅរកភាពជោគជ័យជាមួយគ្នានៅរដូវកាលថ្មី និងចូលរួមទាំងអស់គ្នា ដើម្បីអភិវឌ្ឍវិស័យកីឡាបាល់ទាត់នៅប្រទេសកម្ពុជា គឺយើងឆ្ពោះទៅមុខជាមួយគ្នា»៕