ភ្នំពេញ៖ អ្នកប្រដាល់ជាបេក្ខភាពដណ្តើមប្រាក់លានក្នុងកម្មវិធី Mas Fight នៃសង្វៀនថោន នាថ្ងៃអាទិត្យនេះ វេង សុភ័ក្រ និង សេង ស្រឿន មានបទពិសោធចាស់ជាងគេ ចំណែកជើងថ្មី ២ រូបទៀតមាន ផាន រះ និង អ៊ុង កំសត់ ដែលទើបតែសាងឈ្មោះល្បីបន្តិចបន្តួច បានចូលខ្លួនមកដណ្តើមប្រាក់លាននេះដែរ ក្នុងប្រភេទទម្ងន់ ៦៣,៥ គីឡូក្រាម។
យ៉ាងណាក្តីវត្តមានរបស់ វេងសុភ័ក្រ ត្រូវបានគេកត់សម្គាល់ថា មានសមត្ថភាព មានប្រៀបជាងគេ មានបទពិសោធលើសង្វៀនល្អជាងគេ ខណៈគ្រូបង្វឹកក៏មានទំនុកចិត្តរំពឹងថា មានលទ្ធភាពច្រើនក្នុងការដណ្តើមយកប្រាក់លាននេះ។
ប្រភពពីគណៈកម្មការផ្គូផ្គង លោក ជួប វុត្ថា បានឲ្យដឹងថា ការផ្គូផ្គងគឺពិនិត្យទៅលើសមត្ថភាពបច្ចុប្បន្ន ដោយថ្លឹងថ្លែងមើលថា ជើងចាស់មួយចំនួន កម្រិតបច្ចេកទេស ឬកម្លាំងធ្លាក់ចុះ ចំណែកកីឡាករជើងថ្មីមួយចំនួន ចាប់ផ្តើមមានបច្ចេកទេស និងកម្លាំងល្អ ជាបណ្តើរៗត្រូវជួបប្រកួតគ្នាបានល្អ។ ទោះជាយ៉ាងណា ការផ្គូផ្គងនៅសង្វៀនថោន មានការគោរពគោលការណ៍ឯកភាពគ្នា រវាងភាគីចំនួន ៣ គឺខាងស្ពនស័រ, ម្ចាស់សង្វៀន និងខាងមន្ត្រីបច្ចេកទេសរបស់សហព័ន្ធកីឡាប្រដាល់គុនខ្មែរ។
តាមការស្រង់ស្ថិតិប្រវត្តិប្រកួតរបស់កីឡាករទាំង ៤ គឺមានកម្ពស់ ១,៧០ ម៉ែត្រដូចគ្នា ប៉ុន្តែ វេង សុភ័ក្រ ប្រកួតបានច្រើនជាងគេ គឺ ៧២ ដង ឈ្នះ ៥៧ ចាញ់ ១៣ ស្មើ ២ ដង ក្នុងនោះផ្តួលដៃគូឲ្យសន្លប់បាន ២៥ លើក។ បន្ទាប់មក សេង ស្រឿន ធ្លាប់ប្រកួតបាន ៧០ ឈ្នះ ៥២ ចាញ់ ១៥ ស្មើ ៣ ដង ក្នុងនោះផ្តួលដៃគូឲ្យសន្លប់បាន ១៥ ដង។
ចំណែកជើងថ្មី អ៊ុង កំសត់ មានបទពិសោធខ្ចីវស្សាជាងគេ គឺធ្លាប់ប្រកួតបាន ៣២ ដង ឈ្នះ ២៣ ចាញ់ ២ ស្មើ ៧ ដង ក្នុងនោះផ្តួលដៃគូឲ្យសន្លប់ចំនួន ១៧ ដង ហើយ ជើងថ្មីកីឡាករ ផាន រះ ទើបតែសាងភាពល្បីថ្មីៗនេះ ដោយប្រកួតបាន ៦៩ ឈ្នះ ៤៧ ចាញ់ ១៥ ស្មើ ៧ ដង ក្នុងនោះ ផ្តួលដៃគូឲ្យសន្លប់បាន ១០ ដង។
លោក ហង្ស ស៊ឺន គ្រូបង្វឹករបស់ វេង សុភ័ក្រ បានប្រាប់ថា៖ «ការប្រកួតនេះ គឺរំពឹងឈ្នះច្រើន បើសិន សុភ័ក្រ ចាប់ឆ្នោតប៉ះ ផាន រះ ឬ អ៊ុង កំសត់ នៅវគ្គជម្រុះ ប៉ុន្តែបើប៉ះ សេង ស្រឿនបែបរាងលំបាក និងតឹងតែងខ្លាំង។ យ៉ាងណាក៏ដោយ សុភ័ក្រ ហាត់ត្រៀមប្រកួតបានល្អ ហើយបើតាមខ្ញុំមើល វាមានប្រៀបច្រើនក្នុងការដណ្តើមយកឈ្នះទាំង ២ វគ្គ»។
ចំណែក វ៉េង សុភ័ក្រ បាននិយាយថា៖ «មួយរយៈនេះ ខ្ញុំមានបញ្ហាសុខភាព មិនសូវបានឡើងប្រកួត ប៉ុន្តែពេលនេះខ្ញុំហ្វឹកហាត់បានល្អត្រៀមរួចហើយ ហើយការប្រកួតដណ្តើមប្រាក់លាននេះ ខ្ញុំរំពឹងឈ្នះ។ និយាយទៅ ខ្ញុំសង្ឃឹមឈ្នះ ៩០ ភាគរយ ព្រោះដៃគូ ដែលត្រូវប៉ះប្រកួតជាមួយខ្ញុំក្នុងចំណោម ៣ នាក់នេះ ខ្ញុំគិតថា មិនលំបាកខ្លាំងនោះទេ ក្នុងការប្រកួតយកឈ្នះ ប៉ុន្តែចាំមើលជាក់ស្តែងទៅ ព្រោះវ៉ៃគ្នាប្រឹងរៀងខ្លួន»។
ចំណែកលោក ស៊ឹម ហេង គ្រូបង្វឹក អ៊ុង កំសត់ បានប្រាប់ថា៖ «ក្នុងចំណោមកីឡាករ ៤ នាក់ខាងលើនេះ ខ្ញុំគិតថា មានក្បាច់ផ្តួលដៃគូម៉្យាងម្នាក់ទេ។ អ៊ុង កំសត់ មានបទពិសោធឡើងសង្វៀនតិចជាងគេមែន ប៉ុន្តែចិត្តធំ ពេលប្រកួតវាយសម្រុកគ្មានញញើត ហើយវាមានក្បាច់ល្អ គឺមិនចេះលាក់កម្លាំង ដោយចូលវាយភ្លាមៗ។ បើផ្តួលគេមិនបាន គឺសន្លប់ខ្លួនឯង គឺមិនចូលចិត្តវ៉ៃអូសបន្លាយពេលវេលានោះទេ ព្រោះក្នុងជ័យជម្នះកន្លងមករបស់វាចំនួន ២៣ លើក គឺផ្តួលគេឲ្យសន្លប់បានរហូតដល់ ១៧ លើក គឺឈ្នះពិន្ទុតែ ៦ លើកប៉ុណ្ណោះ»៕