ភ្នំពេញ: កីឡាករ វៃ ភ័ត្ត្រា នៃក្រុមជម្រើសជាតិកីឡាកាយសម្ព័ន្ធកម្ពុជា បានធ្វើការប្តេជ្ញាថានឹងខំប្រឹងហ្វឹកហាត់ បង្កើនសមត្ថភាព និងបច្ចេកទេសឲ្យបានល្អដើម្បីឈានទៅរកការប្រជែងរកមេដាយសម្រាប់ការប្រកួតនៅលើឆាកអន្តរជាតិ ពិសេសការប្រកួតស៊ីហ្គេមនៅហ្វីលីពីនដែលគ្រោងធ្វើពីថ្ងៃទី ៣០ ខែវិច្ឆិកាដល់ថ្ងៃទី ១០ ខែធ្នូ ឆ្នាំ ២០១៩ នេះ។
កីឡាករមានដើមកំណើតនៅស្រុកសំរោង ខេត្តតាកែវ វៃ ភ័ត្ត្រា បានប្រាប់ថា៖ «ការទទួលបានឱកាសទៅហ្វឹកហាត់នៅប្រទេសចិន លើកនេះវាជាពេលវេលាដ៏ល្អបំផុតចំពោះរូបខ្ញុំក្នុងការទទួលបាននូវបច្ចេកទេសថ្មីៗគឺខ្ញុំជឿថា ការចេញទៅហាត់នៅចិននេះខ្ញុំនឹងមានការកើននូវកម្រិតបច្ចេកទេសពី ៦០ ទៅ ៧០ ភាគរយ ដើម្បីខ្ញុំអាចប្រកួតប្រជែងស្មើមុខ ស្មើមាត់ ជាមួយប្រទេសគេនៅក្នុងការប្រកួតនៅលើឆាកអន្តរជាតិ»។
កីឡាករវ័យ ១៩ ឆ្នាំដែលបានចូលមកហាត់កីឡាកាយសម្ព័ន្ធទាំងពីអាយុ ៩ ឆ្នាំ វៃ ភ័ត្ត្រា បានបញ្ជាក់ថា៖ «បើទោះបីជាខ្ញុំបានឃ្លាតឆ្ងាយពីក្រុមគ្រួសាររយៈពេលវែង និងបានចេញទៅហ្វឹកហាត់នៅប្រទេសចិនតែម្នាក់ឯង ប៉ុន្តែរូបគេបានប្តេជ្ញាចិត្តហើយថា ខ្ញុំនឹងប្រឹងប្រែងហ្វឹកហាត់ឲ្យអស់ពីសមត្ថភាព ព្រោះគោលដៅរបស់ខ្ញុំគឺខ្ញុំចង់បង្ហាញទង់ជាតិកម្ពុជានៅលើឆាកអន្តរជាតិ តាមរយៈការដណ្តើមបានមេដាយពីការប្រកួតរបស់ខ្ញុំ ពិសេសការប្រកួតស៊ីហ្គេមនៅហ្វីលីពីនខាងមុខនេះ»។
ការលើកឡើងរបស់ វៃ ភ័ត្ត្រា ត្រូវបានធ្វើឡើងនៅព្រលានយន្តហោះអន្តរជាតិភ្នំពេញកាលពីព្រឹកម៉ោង ១០ ថ្ងៃអង្គារម្សិលមិញគឺមុនពេលរូបគេត្រូវឡើងយន្តហោះបោះពួយទៅកាន់ទឹកដីប្រទេសចិន ដើម្បីហ្វឹកហាត់រយៈពេលជាង ៨ ខែនៅខេត្តគ័ងទុងដែលជាជំរុំហ្វឹកហាត់កីឡាកាយសម្ព័ន្ធដ៏មានសក្តានុពល និងមានភាពអំណោយផលមួយរបស់ប្រទេសចិន។
លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា ដែលជាអ្នកជូនដំណើរកីឡាករ វៃ ភ័ត្ត្រា ទៅហ្វឹកហាត់នៅចិននេះដោយផ្ទាល់បានថ្លែងប្រាប់ថាអស់រយៈពេល ២ ឆ្នាំមកហើយ ដែលយើងបានទាក់ទងទៅខេត្តគ័ងទុងតាមរយៈលោក Wang Meng ដែលជាអ្នកសម្របសម្រួល និងជាទីប្រឹក្សាផ្ទាល់របស់លោក Tang Gordon ជាអនុប្រធានទី ១ គណៈកម្មាធិការជាតិអូឡាំពិកកម្ពុជា (NOCC) ហើយលោក Tang Gordon និងលោក ថោង ខុន ដែលជាប្រធាន NOCC និងជាប្រធានសហព័ន្ធកីឡាកាយសម្ព័ន្ធកម្ពុជា ជាអ្នករ៉ាប់រងលើការចេញទៅហ្វឹកហាត់នេះ ហើយយើងក៏បានសុំប្រាក់ប្រចាំខែពីក្រសួងអប់រំ យុវជន និងកីឡាឲ្យកីឡាករ វៃ ភ័ត្ត្រា ផងដែរ។
លោក ណយ ផាណា បានបន្ថែមថា៖ «វៃ ភ័ត្ត្រា នឹងត្រូវហ្វឹកហាត់ជាមួយនឹងបណ្តុំអ្នកកីឡា ខ្លាំង នៅខេត្តគ័ងទុងហេតុនេះខ្ញុំជឿថាការហាត់នៅទីនោះនឹងធ្វើឲ្យរូបគេកើនទៅលើបច្ចេកទេស ព្រោះនៅទីនោះគ្មានការរំខានគឺដឹងតែពីហាត់ក្រោមការបង្ហាត់បង្ហាញពីគ្រូជំនាញខ្លាំងៗនៅទីនោះ ហើយក្រោយបញ្ចប់ការហ្វឹកហាត់ វៃ ភ័ត្ត្រា អាចនឹងបន្តដំណើរទៅប្រកួតស៊ីហ្គេមនៅហ្វីលីពីនតែម្តង»។
នៅពេលនិយាយដល់ការប្រកួត ស៊ីហ្គេម នៅហ្វីលីពីនឆ្នាំនេះលោក ណយ ផាណា បានបញ្ជាក់ថា៖ «ទោះបីជាយើងមានការពិបាកក្នុងការប្រកួតប្រជែងយកមេដាយ ប៉ុន្តែក្តីរំពឹងរបស់យើងគឺចង់ឆ្លងផុតការប្រកួតជម្រុះ ដើម្បីឡើងទៅវគ្គផ្តាច់ព្រ័ត្រនៅស៊ីហ្គេមលើកនេះ ហើយខ្ញុំជឿថាការចេញទៅហ្វឹកហាត់រយៈពេលជាង ៨ ខែនេះ វៃ ភ័ត្ត្រា នឹងមានការកើនទៅលើបច្ចេកទេស ព្រោះការហាត់នៅចិននេះគេផ្តោតខ្លាំងណាស់ ហើយនៅលើពិភពលោកនេះចិនជាប្រទេសខ្លាំងមួយផ្នែកកីឡាកាយសម្ព័ន្ធកម្មនេះតែម្តង»៕