.jpg)
ភ្នំពេញ៖ ម្ចាស់មេដាយសំរឹទ្ធស៊ីហ្គេម វ៉ាន់ វឿន និង អេលីត ចំរើន បានអះអាងពីការត្រៀមខ្លួនរួចរាល់ដូចគ្នា ហើយពួកគេបានបញ្ជាក់ដូចគ្នាថា នឹងប្រឹងប្រែងប្រកួតគ្នាឲ្យកក្រើកសង្វៀន PNN ដើម្បីដណ្តើមយកខ្សែក្រវាត់មាស និងប្រាក់រង្វាន់ ១ ម៉ឺនដុល្លារ នៅវគ្គផ្តាច់ព្រ័ត្រថ្ងៃអាទិត្យនេះ។
នៅក្នុងការប្រកួតដ៏សំខាន់នេះ វ៉ាន់ វឿន ហាក់ចាញ់ប្រៀប អេលីត ចំរើន ផ្នែកកម្ពស់បន្តិច ហើយ ចំរើន ក៏មានផ្លែវាយចេញបានវែងជាង វ៉ាន់ វឿន ផងដែរ ខណៈអ្នកទាំង ២ នេះ ចូលចិត្តវាយប្រយោល គឺភាគច្រើនប្រើស្នៀតទាត់។ យ៉ាងណាក៏ដោយ វ៉ាន់ វឿន បានអះអាងថា រូបគេបានត្រៀមក្បាច់រួចរាល់អស់ហើយ ដើម្បីទប់ទល់ជាមួយ អេលីត ចំរើន។
ម្ចាស់មេដាយសំរឹទ្ធស៊ីហ្គេម វ៉ាន់ វឿន បាននិយាយថា៖ «ខ្ញុំហ្វឹកហាត់ត្រៀមបានល្អ ១០០ ភាគរយហើយ ហើយខ្ញុំដឹងថា អេលីត ចំរើន ជាកីឡាករមានអាវុធចេញធ្ងន់ៗ និងមានផ្លែល្អ ប៉ុន្តែខ្ញុំក៏បានត្រៀមក្បាច់ ដើម្បីទប់ទល់ជាមួយគាត់បានល្អហើយដែរ។ ខ្ញុំសង្ឃឹមលើខ្លួនឯង ហើយខ្ញុំនឹងធ្វើឲ្យជំនួបមួយនេះ ក្លាយជាការប្រកួតនេះដ៏កក្រើក និងជក់ចិត្តសម្រាប់ទស្សនិកជន»។
នៅមុនការប្រកួតនេះ អេលីត ចំរើន និង វ៉ាន់ វឿន សុទ្ធតែធ្វើបានល្អដូចគ្នា ដើម្បីឈ្នះគ្រប់ការប្រកួតទាំងអស់ ហើយអ្វីដែលគួរឲ្យចាប់អារម្មណ៍ខ្លាំង ចំពោះជ័យជម្នះរបស់ពួកគេកន្លងមកនេះ គឺការទម្លាក់ជើងខ្លាំង ប៊ុន សុធា និង អេ ណារ័ត្ន នៅវគ្គ ១/២ ផ្តាច់ព្រ័ត្រ ដោយក្នុងនោះ ចំរើន បានយកឈ្នះដោយពិន្ទុទាំងលំបាកលើ ប៊ុន សុធា ហើយ វ៉ាន់ វឿន បានឈ្នះពិន្ទុ អេ ណារ័ត្ន ខណៈជំនួបនោះ វ៉ាន់ វឿន បានវាយកែងបណ្តាលឲ្យ អេ ណារ័ត្ន មានស្នាមបែក និងពក នៅលើផ្ទៃមុខជាច្រើនកន្លែង។
តាមរយៈការប្រកួត និងសមត្ថភាពរបស់អ្នកទាំង ២ ត្រូវបានគេគិតថា អេលីត ចំរើន ហាក់មានភាគរយខ្ពស់ជាង វ៉ាន់ វឿន ព្រោះការទាត់ចេញរបស់គេមានទម្ងន់ជាង និងធ្ងន់ជាង ហើយជាមួយគ្នានេះ ក៏មានអ្នកខ្លះបានព្យាករថា វ៉ាន់ វឿន មិនអាចទប់ អេលីត ចំរើន ដល់ ៥ ទឹកពេញផងដែរ ប៉ុន្តែ វ៉ាន់ វឿន បានអះអាងថា គ្មានអ្វីជាឧបសគ្គចំពោះរូបគេនោះទេ គឺគេនឹងធ្វើឲ្យបានល្អ។
សិស្សគណក្លិបឃ្លាំងមឿនកីឡា វ៉ាន់ វឿន បញ្ជាក់ថា៖ «សម្រាប់ខ្ញុំ ដូចជាគ្មានឧបសគ្គអ្វីទេ គឺខ្ញុំរំពឹងថា ខ្លួនឯងនឹងធ្វើបានល្អ។ ខ្ញុំនឹងប្រឹងប្រែងឲ្យអស់សមត្ថភាព និងធ្វើឲ្យបានល្អ ព្រោះនេះជាការប្រកួតដ៏សំខាន់សម្រាប់ខ្ញុំ ប៉ុន្តែការប្រកួតដែលមានការវាយប្តូរគ្នាទៅវិញទៅមកបែបនេះ យើងមិនអាចស្មានទុកមុនបានទេ ព្រោះបើអ្នកណាភ្លាត់ស្នៀត និងបរាជ័យរៀងៗខ្លួន»។
ចំណែក អេលីត ចំរើន កំពុងតែអន្ទះសាខ្លាំង ចំពោះការប្រកួតផ្តាច់ព្រ័ត្រនេះ ហើយរូបគេបានអះអាងថា នឹងធ្វើឲ្យជំនួបនេះក្លាយជាការប្រកួតដ៏អស្ចារ្យបំផុត ប៉ុន្តែ អេលីត ចំរើន ក៏បានស្នើសុំរឿងមួយដល់អ្នកគាំទ្រ ដែលតែងតែជេរប្រមាថដល់កីឡាករ នៅក្រោយការប្រកួតផងដែរ។
កីឡាករវ័យ ២៤ ឆ្នាំ អេលីត ចំរើន បាននិយាយថា៖ «ខ្ញុំត្រៀមខ្លួនបានរួចរាល់អស់ហើយ គឺចាំតែថ្ងៃប្រកួតមកដល់ប៉ុណ្ណោះ ហើយខ្ញុំនឹងធ្វើឲ្យការប្រកួតនេះ ក្លាយជាការប្រកួតដ៏អស្ចារ្យ និងកក្រើក នៅសង្វៀន PNN។ យ៉ាងណាក៏ដោយ ខ្ញុំសង្ឃឹមថា ទោះបីខ្ញុំឈ្នះ ឬចាញ់ សូមកុំជេរប្រមាថដល់ខ្ញុំ ព្រោះកីឡាតែងមានឈ្នះ និងចាញ់ ប៉ុន្តែខ្ញុំនឹងប្រឹងប្រែងឲ្យអស់ពីសមត្ថភាព មិនឲ្យអ្នកគាំទ្រអស់សង្ឃឹមឡើយ»៕
