.jpg)
លោក គឹម ស្រ៊ុនកុសល (ឆ្វេង) បានប្រគល់ប្រាក់រង្វាន់លេខ ១ ឲ្យទៅកីឡាករ វ៉ាន់ វឿន។ រូបថត សហការី
ភ្នំពេញ៖ កីឡាករជាក្មេងកំព្រា វ៉ាន់ វឿន បានប្រើពេលប្រកួតសរុបទាំង ២ លើកត្រឹម ៩:២៤ នាទី ដើម្បីក្លាយជាម្ចាស់ប្រាក់លាន ដែលមានទឹកប្រាក់ ៣,៤ លានរៀល ពីការប្រកួតម៉ារ៉ាតុងដណ្តើមប្រាក់លាន នៃកម្មវិធី Mas Fight Cambodia នៅលើសង្វៀនថោន ហើយថិរវេលាប្រកួតនេះ គឺតិចជាងគេបំផុត បើប្រៀបធៀបទៅនឹងរយៈពេលប្រកួតរបស់កីឡាករ ម៉ន វណ្ណី, ព្រឿង សុជាតិ និង ឌុម កែវដា ដែលធ្លាប់បានឈ្នះជើងឯកប្រាក់លាននេះ សម្រាប់ការប្រកួត ៣ សប្តាហ៍កន្លងមក។
សម្រាប់ការប្រកួតកាលពីថ្ងៃអាទិត្យនោះ ម្ចាស់មេដាយសំរឹទ្ធស៊ីហ្គេម វ៉ាន់ វឿន បានយកឈ្នះម្ចាស់មេដាយសំរឹទ្ធ ខេម ចាន់ ដោយពិន្ទុជាឯកច្ឆន្ទ នៅក្នុងការប្រកួតត្រឹម ៣ ទឹក ហើយការប្រកួតផ្តាច់ព្រ័ត្រ ជាមួយ រិន ដាវីត ដែលប្រើច្បាប់ Mas Fight ត្រឹម ១ ទឹក មាន ៩ នាទីនោះ វឿន ប្រើពេលត្រឹម ២៤ វិនាទី ដោយវាយកែងស្តាំ បណ្តាលឲ្យ ដាវីត ដួលសន្លប់ និងបែកក្បាល ដេរអស់ ៤ ថ្នេរ។
នៅក្នុងការប្រកួតទាំង ២ លើក ក្នុងថ្ងៃតែមួយនេះ វ៉ាន់ វឿន បានសារភាពថា រូបគេមានការបារម្ភនៅពេលចាប់ឆ្នោតប៉ះ ខេម ចាន់ នៅវគ្គជម្រុះ។ «ខ្ញុំមានការបារម្ភខ្លាំង តាំងពីមុនពេលប្រកួត ព្រោះ ខេម ចាន់ ជាឧបសគ្គធំ ប៉ុន្តែខ្ញុំមានល្បិចប្រកួត គឺវ៉ៃឆ្ងាយ និងទាត់ជើងក្រោម ព្រមទាំងចូលឱបលេងក្បាច់ជង្គង់ឲ្យបានលឿន មុនពេលអាជ្ញាកណ្តាលបំបែក ហើយការវាយចេញដោយបច្ចេកទេសសន្សំពិន្ទុនេះបានធ្វើឲ្យខ្ញុំឈ្នះពិន្ទុ ខេម ចាន់ ដោយឯកច្ឆន្ទ»។
ចំពោះការឡើងទៅជួប រិន ដាវីត នៅវគ្គផ្តាច់ព្រ័ត្រ ដែលបានយកឈ្នះពិន្ទុ សាន សំអុន នៅវគ្គជម្រុះដែរនោះ វ៉ាន់ វឿន បាននិយាយថា៖ «ខ្ញុំសង្ឃឹមឈ្នះតាំងពីមុនប្រកួត ព្រោះខ្ញុំមានប្រៀបជាងទាំងកម្លាំងស្មារតី និងបទពិសោធ ដោយសារ រិន ដាវីត ជាសិស្សប្អូននៅខ្ចីវស្សា ហើយក៏គ្មានលទ្ធភាពផ្តួលខ្ញុំបាននោះទេ»។
វ៉ាន់ វឿន បានបន្ថែមថា៖ «ទោះជាយ៉ាងណា ខ្ញុំមិនបានមើលស្រាលដៃគូ ឬវ៉ៃបណ្តែតបណ្តោយនោះទេ គឺត្រូវតែប្រើស្នៀតកែង ឬជង្គង់ ដើម្បីផ្តួលដៃគូ មិនពន្យារពេលឡើយ ហើយក្នុងរយៈពេលមិនដល់ ១ នាទីផង ខ្ញុំបានវាយកែងចូលក្បាលរបស់ រិន ដាវីត បណ្តាលឲ្យដួលសន្លប់ ធ្វើឲ្យខ្ញុំបានទទួលបានជ័យជម្នះ និងក្លាយជាម្ចាស់ប្រាក់លានតែម្តង»។
ជាមួយការទទួលបានប្រាក់រង្វាន់ ៣,៤ លានរៀលនេះ វ៉ាន់ វឿន បានបង្ហើបថា បានជួយសម្រួលដល់រូបគេទំនុកបម្រុងដល់ប្អូនៗ។ វឿន បានបញ្ជាក់ថា៖ «ខ្ញុំសូមថ្លែងអំណរគុណដល់ប៉ុស្តិ៍ថោន ដែលមានការប្រកួតដណ្តើមប្រាក់លាននេះ នាំឲ្យខ្ញុំបានលុយច្រើនៗ ហើយខ្ញុំបានយកលុយនេះទៅជួយចិញ្ចឹមប្អូនៗចំនួន ៣ នាក់ទៀត ដែលកំព្រាឪពុកម្តាយស្លាប់ចោលអស់ គឺមានតែកីឡាប្រដាល់នេះហើយ ដែលជួយខ្ញុំឲ្យមានជីវភាពដល់ពេលនេះ»។
ចំណែក រិន ដាវីត ដែលទទួលបានប្រាក់រង្វាន់ ១,៨ លានរៀលដែរនោះ បាននិយាយក្រោយពេលចាញ់ថា៖ «វ៉ាន់ វឿន ខ្លាំងណាស់! គាត់ឈ្នះខ្ញុំ គឺស័ក្តិសម ព្រោះខ្ញុំជាសិស្សប្អូនជំនាន់ក្រោយ ប៉ុន្តែបានប្រកួតជាមួយគាត់វាជាកិត្តិយស ដែលទទួលបានបទពិសោធល្អ សម្រាប់យើងដែរ»។
ជាមួយគ្នានេះ ខេម ចាន់ ក៏ទទួលស្គាល់ថា បានចាញ់ វ៉ាន់ វឿន ដោយអស់ចិត្តដែរ។ ចាន់ និយាយថា៖ «ខ្ញុំចាញ់ វ៉ាន់ វឿន ដោយគាត់រហ័សជាង វ៉ៃលឿនជាងខ្ញុំ ហើយគាត់មិនព្រមវ៉ៃតទល់ទេ គឺគេច និងចេញចូលលំបាកវ៉ៃណាស់។ ការចាញ់នេះ គ្មានអ្វីត្រូវនិយាយនោះទេ គឺគេឈ្នះពិន្ទុបានឡើងទៅវគ្គចុងក្រោយ»។
ចំណែកនាយកគ្រប់គ្រងកម្មវិធីប្រចាំសង្វៀនថោន គឺលោក គឹម ស្រ៊ុនកុសល បានប្រាប់ថា៖ «ការប្រកួតម៉ារ៉ាតុងដណ្តើមប្រាក់លាននេះ យើងច្របាច់បញ្ជូលគ្នារវាងច្បាប់ប្រកួតគុនខ្មែរ និងច្បាប់ Mas Fight ហើយកម្មវិធីនេះ គឺពេញនិយម ព្រមទាំងទទួលបានការ គាំទ្រពីស្ពនស័រពេញទំហឹងពិសេសក្រុមហ៊ុន Cambodia Beer និងជីប ម៉ុង»៕
