ភ្នំពេញៈ អ្នកប្រដាល់ឆ្នើម វ៉ាន់ វឿន បានប្រើរយៈពេលតែ ១ ទឹកក្នុងការបង្ខំឲ្យកីឡាករថៃ Banda Sak បោះបង់ការប្រកួតនៅក្នុងទឹកទី ១ ដើម្បីសម្រេចបំណងនៃការផ្តួលគូប្រកួតបានលឿនក្នុងការប្រកួតជម្រុះជុំចុងក្រោយ ដណ្តើមខ្សែក្រវាត់ខារ៉ាបាវទម្ងន់ ៦០ គីឡូក្រាមនៅលើសង្វៀន SEATV កាលពីថ្ងៃសៅរ៍។
ចំណែក សេន កុសល បានសន្លប់ក្នុងទឹកទី ៣ ក្រោមការសង្ស័យធ្វើពុតចាញ់ ដែលអាចជារឿងឃុបឃិតគ្នាណាមួយក្នុងទីផ្សារងងឹតភ្នាល់ប្រដាល់របស់ឈ្មួញ ប៉ុន្តែបញ្ហានេះមន្ត្រីបច្ចេកទេសរបស់សហព័ន្ធកីឡាប្រដាល់គុនខ្មែរ នាំគ្នាស្ងាត់មាត់ឈឹងទំនងហាក់ដូចជាចង់សុំរួចខ្លួនប៉ុណ្ណោះនៅពេលមានរឿងមិនប្រក្រតីកើតឡើងម្តងៗ។
នៅក្រោយការផ្តួល Banda Sak ក្នុងទឹកទី ១ វ៉ាន់ វឿន និយាយថា៖ «ខ្ញុំធ្វើបានសម្រេចដូចបំណង! ពីដំបូងខ្ញុំបានតាំងចិត្តវាយសម្រុកខ្លាំង ដើម្បីផ្តួលកីឡាករថៃឲ្យចុះចាញ់ក្នុងអំឡុង ៣ ទឹក ប៉ុន្តែជាក់ស្តែងខ្ញុំផ្តួលដោយក្បាច់កណ្តាប់ដៃ វ៉ៃចូលមុខពេញទំហឹងហើយគេវង្វេងវង្វាន់អាជ្ញាកណ្តាលរាប់ ១០ ទៅហើយ មិនអាចតដៃជាមួយខ្ញុំបាន»។
វ៉ាន់ វឿន បានបន្តថា៖ «ទោះបីជាខ្ញុំបានឈ្នះដោយផ្តួលដៃគូឲ្យសន្លប់ទាំង ៤ លើកមាន ១២ ពិន្ទុ ប៉ុន្តែមិនទាន់ច្បាស់ថា ខ្ញុំបានឡើងទៅប្រកួតវគ្គផ្តាច់ព្រ័ត្រ ឬយ៉ាងណានោះទេ? គឺនៅរង់ចាំមើលលទ្ធផលការប្រកួតរវាង លាភ រដ្ឋា ជាមួយថៃ Yourt Vady នៅថ្ងៃទី ៩ ខែមីនា ឆ្នាំ ២០១៩ សិន ព្រោះគេបានផ្តួលកីឡាករថៃឲ្យសន្លប់បាន ៣ លើកហើយ អ៊ីចឹងបើគេអាចផ្តួល Yourt Vady ឲ្យសន្លប់ទៀតគឺគេអាចមានប្រៀបលើខ្ញុំ»។
ចំណែកអ្នកស្រី សុខា ដែលគ្រប់គ្រងកីឡាករ វ៉ាន់ វឿន និយាយថា៖ «ខ្ញុំមានការព្រួយបារម្ភចំពោះ វ៉ាន់ វឿន ព្រោះគេមិនប្រាកដថាបានឡើងទៅវគ្គផ្តាច់ព្រ័ត្រនោះទេ ព្រោះច្បាប់ប្រកួតមិនដឹងថាគេគិតយ៉ាងដូចម្តេចទេ? តាមខ្ញុំកត់ត្រាដឹងថា វ៉ាន់ វឿន ក្នុង ៤ ប្រកួតកន្លងមកឈ្នះថៃក្នុងទឹកទី ៣ ចំនួន ២ លើក ឈ្នះក្នុងទឹកទី ១ ចំនួន ២ លើក មាន ១២ ពិន្ទុប៉ុន្តែបើវាមិនបានឡើងទៀត មិនដឹងថាគណៈកម្មការគេគិតយ៉ាងណាទេ ហើយខ្ញុំនឹងរកអ្នកជំនាញផ្នែកកីឡាដើម្បីជួយក្នុងរឿងនេះខ្លាចមានគេបន្លំយើង»។
ទោះបីជាយ៉ាងណាអ្នកស្រីបានបន្ថែមថា៖ «ខ្ញុំនៅតែមានជំនឿថា វ៉ាន់ វឿន បានឡើងទៅវគ្គផ្តាច់ព្រ័ត្រព្រោះដៃគូប្រជែងរបស់គេ លាភ រដ្ឋា ដែល ៣ ប្រកួតកន្លងមកឈ្នះថៃទឹកទី ៤ មួយលើក ឈ្នះទឹកទី ១ ពីរលើកនោះ មិនទាន់ប្រាកដថាអាចផ្តួលថៃ Yourt Vady បានលឿន ដើម្បីយកប្រៀបលើ វ៉ាន់ វឿន នោះទេ»។
ផ្ទុយពីនេះកីឡាករ សេន កុសល ដែលឡើងប្រកួតបង្គ្រប់កិច្ចជាមួយកីឡាករថៃ Reung Sayam ដោយមកប្រកួតជំនួសបេក្ខភាពថៃ Deuk Deur គឺការប្រកួតរបស់ សេន កុសលត្រូវបានគេមើលឃើញថាជាប់សង្ស័យពីការប្រកួតមិនអស់ពីសមត្ថភាពដោយធ្វើពុតចាញ់។
សម្រាប់ប្រវត្តិប្រកួតរបស់ សេន កុសល កន្លងមកឲ្យតែឭស្នូរជួងសឹងមិនទាន់ទេគឺគេចូលវាយសម្រុកអស់ពីសមត្ថភាព ប៉ុន្តែលើកនេះ កុសល ហាក់បីដូចជាស្លូតណាស់ មិនចូលវាយសម្រុកខ្លាំងទេ។
ការប្រកួតអូសបន្លាយដល់ដើមទឹកទី ៣ កីឡាករថៃវ៉ៃចេញដោយកណ្តាប់ដៃត្រូវស្រាលៗ ហើយទាត់បន្ថែមខុសផងនោះ ប៉ុន្តែ សេន កុសល ដួលងើបលែងរួចទោះបីជាអាជ្ញាកណ្តាល ម៉ាក់ សាមឿន រាប់ដល់ ១០ ក៏ដោយ។ ការបរាជ័យបែបនេះធ្វើឲ្យអ្នកទស្សនាផ្ទាល់នៅជិតសង្វៀននាំគ្នាសើច ហើយមានអ្នកខ្លះលាន់មាត់ថា ទាត់ត្រូវខ្យល់សោះសន្លប់ងើបលែងរួច។
កីឡាករ សេន កុសល មិនអាចសុំសម្ភាសបានទេ ព្រោះក្រោយការប្រកួតចប់ គេបានគេចចេញពីសង្វៀនយ៉ាងលឿន ប៉ុន្តែប្រភពស្និទ្ធជាកីឡាករដូចគ្នាបានខ្សឹបថា៖ «សេន កុសល មកហាត់នៅភ្នំពេញមួយរយៈនេះបានដើរលេងជាមួយក្រុមពួកខូចអាចមានគំនិតមិនល្អ គឺប្រកួតបែបនេះ»។
ដោយឡែកការប្រកួតមិត្តភាពអន្តរជាតិកាលពីព្រឹកថ្ងៃអាទិត្យម្សិលមិញអ្នកប្រដាល់ ពុទ្ធ ឆាយរិទ្ធី មកពីក្លិបពុទ្ធសេរីវង្ស បានចំណាយពេលចំនួនត្រឹម ៣ ទឹកក្នុងការផ្តួលកីឡាករថៃ Mee Chhouk ដោយក្បាច់ជង្គង់ហោះចូលគោលដៅបណ្តាលឲ្យអាជ្ញាកណ្តាលរាប់ចំនួន ៣ លើក និងបានបន្ថែមដោយក្បាច់ទាត់ធ្វើឲ្យ Mee Chhouk ដួលងើបលែងរួចតែម្តង៕