.jpg)
កីឡាករ ខេម ចាន់ បានទាត់ទៅលើ វ៉ាន់ វឿន សម្រាប់ការប្រកួត នៅលើសង្វៀនថោន កន្លងមក។ សហការី
ភ្នំពេញ៖ កីឡាករជើងខ្លាំង វ៉ាន់ វឿន បានបង្ហាញនូវអារម្មណ៍សោកស្តាយទៅលើការបាត់បង់ឱកាសដ៏ពិសេស នៅក្នុងអាជីពប្រដាល់របស់ខ្លួន គឺការគ្មានវត្តមាននៅក្នុងបញ្ជីឈ្មោះក្រុមជម្រើសជាតិប្រដាល់គុនខ្មែរ សម្រាប់ការត្រៀមប្រកួតស៊ីហ្គេម នៅឆ្នាំ ២០២១ នេះ បើទោះបីជារូបគេធ្លាប់បានឈ្នះមេដាយសំរឹទ្ធទាំង ២ លើក សម្រាប់ការប្រកួតស៊ីហ្គេមកាលឆ្នាំ ២០១៧ និងឆ្នាំ ២០១៩ ក៏ដោយ។
អ្នកប្រដាល់ វ៉ាន់ វឿន ធ្លាប់បានជាប់ជាកីឡាករជម្រើសជាតិប្រដាល់គុនខ្មែរ ចំនួន ៤ ឆ្នាំជាប់ៗគ្នា ប៉ុន្តែសម្រាប់ការប្រមូលផ្តុំក្រុមជម្រើសជាតិត្រៀមការប្រកួតស៊ីហ្គេមនៅប្រទេសវៀតណាម ចុងឆ្នាំ ២០២១ នេះ វ៉ាន់ វឿន គ្មានឈ្មោះនៅក្នុងបញ្ជីនោះទេ ហើយរូបគេ ក៏គ្មានវត្តមាននៅក្នុងបញ្ជីឈ្មោះនៃក្រុមជម្រើសជាតិកីឡាប្រដាល់ឃិកបុកស៊ិង ដែលទើបបានបង្កើតឡើងនោះដែរ។
ទាក់ទងទៅនឹងបញ្ហានេះ វ៉ាន់ វឿន បាននិយាយថា៖ «ខ្ញុំសោកស្តាយខ្លាំងណាស់ ប៉ុន្តែការបាត់បង់ឱកាសនេះ មកពីខ្ញុំមិនបានចូលរួមការប្រកួតជម្រើសជើងឯកថ្នាក់ជាតិ ឆ្នាំ ២០២០ ដោយសារកាលនោះ ខ្ញុំឈឺខ្លួនផង ទើបតែប្រកួតនៅតាមប៉ុស្តិ៍រួចហើយថ្មីៗ ហើយម្យ៉ាងទៀតនៅក្នុងមួយប្រភេទទម្ងន់ ៥៧ គីឡូក្រាមនេះ គេកំណត់ឱ្យដាក់បានតែម្នាក់ក្នុង ១ ខេត្ត-រាជធានី ឬ ១ ស្ថាប័ន ហេតុនេះខ្ញុំមិនដឹងថា ទៅប្រកួតឱ្យខាងណា បើក្លិបឃ្លាំងមឿង ខេត្តពោធិ៍សាត់របស់ខ្ញុំមិនបានមកចូលរួមប្រកួតផងនោះ»។
អ្នកប្រដាល់ជាកូនកំព្រា ដែលកំពុងទទួលបានជោគជ័យតាមរយៈការប្រកួតនៅតាមសង្វៀនឯកជន វ៉ាន់ វឿន បានបញ្ជាក់ថា៖ «ការមិនបានជាប់ជម្រើសជាតិនៅឆ្នាំនេះ គឺខ្ញុំសោកស្តាយខ្លាំងណាស់ ព្រោះវាធ្វើឱ្យខ្ញុំ បាត់បង់ឱកាសដ៏ពិសេស គឺការប្រកួតតំណាងឱ្យប្រទេសជាតិនៅស៊ីហ្គេម។ តែទោះបីជាយ៉ាងណា ខ្ញុំនៅតែព្យាយាមប្រកួតនៅតាមសង្វៀននានា ដើម្បីពង្រឹងសមត្ថភាពខ្លួនឯងបន្ថែមទៀត គឺមិនទាន់អស់សង្ឃឹមនោះឡើយ»។
ដោយឡែក នៅថ្ងៃសៅរ៍នេះ វ៉ាន់ វឿន ត្រូវបានដាក់ឱ្យប្រកួតដណ្តើមប្រាក់លាន ជាមួយ ខេម ចាន់ នៅលើសង្វៀន CNC ហើយនេះក៏ជាជំនួបលើកទី៦ របស់ពួកគេផងដែរ ខណៈការប្រកួត ៥ លើកកន្លងមក វ៉ាន់ វឿន បានឈ្នះ ៤ និងចាញ់តែ ១ ដងទេ ចំណែកការជួបគ្នាលើកចុងក្រោយ កាលពីថ្ងៃទី ៧ ខែមីនា នៅសង្វៀនថោន វ៉ាន់ វឿន បានឈ្នះដោយពិន្ទុ។
ជុំវិញជំនួបលើកនេះ វ៉ាន់ វឿន បានប្រាប់ថា៖ «ការប្រកួតដណ្តើមប្រាក់លានលើកនេះ ក៏ដូចជាការប្រកួតសងសឹកដែរ អ៊ីចឹងខ្ញុំមិនអាចប្រហែស ឬបន្ធូរដៃនោះទេ ព្រោះស្នៀតទាត់ និងក្បាច់លេងជង្គង់មុតស្រួចដូចគ្នា។ យ៉ាងណាក៏ដោយ ខ្ញុំមានទំនុកចិត្តត្រឹម ៥០ ភាគរយ ព្រោះការឈ្នះ ខេម ចាន់ កន្លងមក ពិតជាតឹងតែងខ្លាំងណាស់ គឺមានតែ ១ លើកប៉ុណ្ណោះ ដែលខ្ញុំបានផ្តួលឱ្យគាត់សន្លប់ក្នុងទឹកទី១»។
ចំណែក ខេម ចាន់ នៅតែមិនញញើត វ៉ាន់ វឿន បើទោះបីជាធ្លាប់បានភ្លាត់ស្នៀតចាញ់ដោយសន្លប់ទឹកទី១ កាលពីថ្ងៃសៅរ៍ ទី ២៧ កុម្ភៈ ឆ្នាំ ២០២១ ក៏ដោយ។
កីឡាករ ខេម ចាន់ និយាយថា៖ «ខ្ញុំគិតថា ការប្រកួតលើកនេះ វាធម្មតា! ទោះបីជាខ្ញុំធ្លាប់បានចាញ់គាត់ច្រើនដង ប៉ុន្តែខ្ញុំមិនញញើតគាត់នោះទេ ព្រោះស្នៀតចេញមានផ្លែប្តូរគ្នាទៅវិញទៅមក គ្រាន់តែគាត់គេចលឿនរហ័ស រីឯក្បាច់ជង្គង់ ខ្ញុំមិនញញើតទេ អាចប្តូរគ្នាបាន។ ខ្ញុំហាត់បានល្អ តែសង្ឃឹមឈ្នះ ៥០ ភាគ-រយទេ ចំណែកបញ្ហាបច្ចេកទេសវ៉ៃ ខ្ញុំសុំមិននិយាយទេ ព្រោះជាល្បិចរៀងៗខ្លួន»៕
