ភ្នំពេញ៖ ថ្នាក់ដឹកនាំសហព័ន្ធកីឡាវ៉ូវីណាមកម្ពុជា បានសម្តែងការព្រួយបារម្ភខ្លាំងទៅលើកម្រិតបច្ចេកទេសរបស់អត្តពលិកជម្រើសជាតិ ដែលនឹងមានការធ្លាក់ចុះ ហើយអាចប៉ះពាល់ដល់ការត្រៀមខ្លួនសម្រាប់ការប្រកួតអន្តរជាតិនានា ក្នុងឆ្នាំ ២០២១ បន្ទាប់ពីពួកគេ ត្រូវបានរំសាយពីការប្រមូលផ្តុំដោយសារបញ្ហាជំងឺឆ្លងកូវីដ ១៩ កក្រើកឡើងវិញ ទៅតាមការណែនាំរបស់ក្រសួងសុខាភិបាល និងក្រសួងអប់រំ យុវជន និងកីឡានោះ។
លោក អ៊ូ រតនា អគ្គលេខាធិការសហព័ន្ធកីឡាវ៉ូវីណាមកម្ពុជាបានប្រាប់ ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា៖ «នៅឆ្នាំ ២០២១ យើងមានការប្រកួតធំៗចំនួន ៣ មានប្រកួតជើងឯកអាស៊ាន, ជើងឯកពិភពលោក និងប្រកួតស៊ីហ្គេមលើកទី៣១ នៅវៀតណាម គឺជាព្រឹត្តិការណ៍ដែលសហព័ន្ធបានត្រៀម និងរំពឹងខ្ពស់ក្នុងការដណ្តើមយកជយលាភីឱ្យបានល្អ ប៉ុន្តែការប្រមូលផ្តុំហ្វឹកហាត់ទើបបានរយៈពេលខ្លី ឥឡូវត្រូវបំបែកគ្នាវិញ ដោយសារបញ្ហាទប់ស្កាត់ជំងឺកូវីដ ១៩ បានកម្រើកឡើងជាថ្មីនោះ គឺជាក្តីបារម្ភជាថ្មីចំពោះលទ្ធផលខាងមុខ។
លោកបានបន្តថា៖ «នេះជាក្តីកង្វល់មួយ ចំពោះសមត្ថភាព ឬកម្រិតបច្ចេកទេសរបស់អត្តពលិក ដែលប្រាកដជាធ្លាក់ចុះ ជាមិនខាន។ ទោះជាយ៉ាងណាថ្នាក់ដឹកនាំសហព័ន្ធកីឡាវ៉ូវីណាម បានដាក់ផែនការសម្រាប់ក្រុមជម្រើសជាតិឱ្យរក្សានូវការហ្វឹកហាត់តាមផ្ទះផ្ទាល់ខ្លួនក្នុង ១ ថ្ងៃ ឱ្យបានយ៉ាងតិចចំនួន ២ ម៉ោងដែរ»។
អគ្គលេខាធិការរូបនេះ ក៏បានរំឭកពីការបាត់បង់ឱកាសប្រកួតរបស់ក្រុមវីវ៉ូណាមកម្ពុជា ដោយសារជំងឺកូវីដ ១៩ កន្លងមកផងដែរ។ លោកនិយាយថា៖ «ដោយសារកូវីដ ១៩ បានធ្វើឱ្យការប្រកួតជើងឯកអាស៊ីអាគ្នេយ៍ ដែលគ្រោងធ្វើនៅប្រទេសមីយ៉ាន់ម៉ា ក្នុងអំឡុងខែកញ្ញា ឆ្នាំ ២០២០ ត្រូវបានខកខាន ដែលធ្វើឱ្យក្រុមអត្តពលិកយើងបាត់បង់កម្រិតបច្ចេកទេសមួយចំនួនផងដែរ ព្រោះកីឡាមានការប្រកួតញឹក សមត្ថភាពកាន់តែល្អ»។
ចំណែកលោក ស៊ុម សារឿន ប្រធានសហព័ន្ធកីឡាវ៉ូវីណាម មានប្រសាន៍ថា៖ «សម្រាប់ការប្រកួតស៊ីហ្គេមលើកទី៣១ ឆ្នាំ ២០២១ នៅវៀតណាម គឺក្រុមវ៉ូវីណាមកម្ពុជា បានស្ថិតនៅក្នុងក្តីកង្វល់ចំពោះការដណ្តើមជយលាភីឱ្យបានល្អ ព្រោះបញ្ហាកូវីដ ១៩ ជាឧបសគ្គធំ ដែលយើងលំបាកប៉ាន់ស្មានពីលទ្ធផលណាស់»។
លោកបានបន្តថា៖ «នៅក្នុងវិញ្ញាសាទាំង ៣៣ ដែលដាក់ឱ្យប្រកួតនៅវៀតណាម គឺយើងអាចត្រៀមហ្វឹកហាត់ដាក់ទាំងអស់បាន បើសិនជាខាងម្ចាស់ផ្ទះវៀតណាម អនុញ្ញាតឱ្យយើងមានលទ្ធភាពដាក់បានគ្រប់វិញ្ញាសាទាំងអស់នោះ ពីព្រោះធនធានអត្តពលិកជម្រើសជាតិរបស់យើងសព្វថ្ងៃមានគ្រប់គ្រាន់ ក្នុងនោះយើងក្រុមធំជម្រើសជាតិចំនួន ១៧ នាក់ និងក្រុមថ្នាល ១២ នាក់។ ទោះជាយ៉ាងណា បញ្ហាដែលយើងបារម្ភខ្លាំង គឺវិញ្ញាសាប្រកួតជាក្រុម ព្រោះយើងហ្វឹកហាត់ត្រៀមក្នុងពេលកូវីដ ១៩ នេះជាលក្ខណៈឯកជនរៀងៗខ្លួន»។
គួររំឭកថា កីឡាវ៉ូវីណាមានសក្តានុពលល្អក្នុងការដណ្តើមបានជយលាភីនៅលើឆាកអន្តរជាតិជាបន្តបន្ទាប់ ហើយប្រភេទកីឡានេះ បានចូលក្នុងប្រទេសកម្ពុជា លើកដំបូងតាំងពីឆ្នាំ ២០០៨ ដោយមានលោក រ័ត្ន សុខន ជាស្ថាបនិក និងធ្លាប់ឈ្នះមេដាយមាស ប្រាក់ និងសំរឹទ្ធ ជាបន្តបន្ទាប់ទាំងការប្រកួតកម្រិតអាស៊ាន អាស៊ី ពិភពលោក និងប្រកួតស៊ីហ្គេម។ យ៉ាងណាក៏ដោយការដណ្តើមបានមេដាយមាស ប្រាក់ និងសំរឹទ្ធ ជាច្រើន ដើម្បីឈរនៅលេខ ២ បន្ទាប់ពីវៀតណាមក្នុងការប្រកួតជើងឯកពិភពលោកឆ្នាំ ២០១៩ នៅកម្ពុជានោះ គឺក្រុមអត្តពលិកកម្ពុជា នៅមិនទាន់បានទទួលប្រាក់រង្វាន់ពីរាជរដ្ឋាភិបាលនៅឡើយទេ៕