.jpg)
លោក ស៊ូម សាវឿន (ពីស្តាំ) និងលោក អ៊ូ រតនា ក្នុងពេលប្រគល់វិញ្ញាបនបត្រដល់សិក្ខាកាម។ រូប សហការី
ភ្នំពេញ៖ សហព័ន្ធកីឡាវ៉ូវីណាម ទើបតែបានបិទវគ្គបណ្តុះបណ្តាលចៅក្រម អាជ្ញាកណ្ដាលកម្រិត ក នៅទីលានហ្វឹកហាត់របស់សហព័ន្ធ ក្នុងមជ្ឈមណ្ឌលជាតិហ្វឹកហ្វឺនកីឡា កាលពីល្ងាចថ្ងៃអង្គារ ខណៈវគ្គដែលទទួលបានការគាំទ្រថវិកាពីក្រសួងអប់រំ យុវជន និងកីឡានេះ ជាគម្រោងឆ្នាំ ២០២០ ប៉ុន្តែបានអូសបន្លាយ និងពន្យារពេល រហូតមកដល់ឆ្នាំ ២០២១ នេះ ដោយសារវិបត្តិជំងឺវីដ ១៩។
ជាមួយគ្នានេះ សិក្ខាកាមជាចៅក្រម អាជ្ញាកណ្តាល ដែលទើបបានបញ្ចប់ នៅក្នុងវគ្គបណ្តុះបណ្តាលនេះត្រូវបានសហព័ន្ធកីឡាវ៉ូវីណាមកម្ពុជា ដាក់ឱ្យបំពេញការងារផ្ទាល់នៅក្នុងការប្រកួតកីឡាវ៉ូវីណាមជ្រើសរើសជើងឯកថ្នាក់ជាតិ ប្រចាំឆ្នាំ ២០២០ ដែលទើបបានរៀបចំជាថ្មីកាលពីថ្ងៃពុធ ម្សិលមិញ នៅពហុកីឡដ្ឋានជាតិអូឡាំពិកកម្ពុជា នឹងគ្រោងបញ្ចប់ថ្ងៃទី ២៩ ខែ មករា ឆ្នាំ២០២១។
លោក អ៊ូ រតនា ជាអគ្គលេខាធិការសហព័ន្ធកីឡាវ៉ូវីណាមកម្ពុជាបានប្រាប់ថា៖ «វគ្គបណ្តុះបណ្តាលនេះ មានសិក្ខាកាមចូលរួមចំនួន ២៨ នាក់ (ស្រី ៥ នាក់) មកពីខេត្តស្វាយរៀង ខេត្តកណ្តាល ខេត្តកំពង់ចាម ប៉ៃលិន ព្រៃវែង កំពង់ធំ កំពត ត្បូងឃ្មុំ ខេត្តសៀមរាប និងក្លិបនៅក្នុងរាធានីភ្នំពេញ មានចំនួន ៦ បន្ថែមទៀត ព្រមទាំងក្រសួង ២ គឺក្រសួងការពារជាតិ និងក្រសួងមហាផ្ទៃ ហើយតាមរយៈការសិក្សារួចមក សិក្ខាកាមមានការសិក្សាដោយយកចិត្តទុកដាក់រៀនសូត្រ ទទួលបានលទ្ធផលគួរឱ្យកត់សម្គាល់»។
វគ្គបណ្តុះបណ្តាលចៅក្រម អាជ្ញាកណ្តាលកីឡាវ៉ូវីណាមលើកនេះ ផ្តោតជាសំខាន់ទៅលើច្បាប់នៃការប្រកួត បែបបទការដាក់ពិន័យ និងការព្រមានពីបច្ចេកទេសនៃការដាក់ពិន្ទុឱ្យកីឡាករកីឡាការិនី ការអនុវត្តជាក់ស្តែងលើទីលាន រួមជាមួយបទប្បញ្ញត្តិទូទៅនៃកីឡាជាធរមាន។
លោក កៅ មករា ជាគ្រូឧទ្ទេស បានប្រាប់ថា តាមការវាយតម្លៃ គឺសិក្ខាកាមទទួលបាននិទ្ទេសល្អ ៥០ ភាគរយ និទ្ទេសមធ្យម ៣០ ភាគរយ និងនិទ្ទេសខ្សោយ ២០ ភាគរយ។
ចំណែកលោក ស៊ូម សារឿន ប្រធានសហព័ន្ធកីឡាវ៉ូវីណាមកម្ពុជា លោកបន្ថែមថា៖ «វគ្គនេះបង្ហាញថា សិក្ខាកាមរបស់យើងនៅមានសមត្ថភាពខ្វះខាតច្រើន ចាំបាច់ណាស់ ត្រូវតែពង្រឹងបន្ថែមទៀត ក្នុងន័យ ដើម្បីធ្វើឱ្យសិក្ខាកាមរបស់យើង ក្លាយទៅជាចៅក្រម និងអាជ្ញាកណ្តាល ប្រកបដោយគុណវុឌ្ឍិ និងថាមពល ទាំងក្នុងក្របខ័ណ្ឌការប្រកួតថ្នាក់ជាតិ តំបន់ និងអន្តរជាតិ នាពេលអនាគត ពិសេសឆ្នាំ ២០២១ នេះ គឺបន្តបើកវគ្គបណ្តុះបណ្តាលចៅក្រម និងអាជ្ញាកណ្តាល ឱ្យបានច្រើនបន្ថែមទៀត ដើម្បីពង្រឹង និងជំរុញអភិវឌ្ឍសមត្ថភាពធនធានរបស់ពួកគាត់ ឱ្យមានការរីកចម្រើន ព្រោះវ៉ូវីណាមជាប្រភេទកីឡា មានសក្តានុពលឈ្នះមេដាយច្រើន»។
ដោយឡែកចំពោះការប្រកួតកីឡាវ៉ូវីណាមថ្នាក់ជាតិវិញ លោក អ៊ូ រតនា បានប្រាប់ថា ត្រូវធ្វើឡើងចំនួន ៣ ថ្ងៃ ដោយចាប់ផ្តើមនៅល្ងាចថ្ងៃទី ២៧ និងបញ្ចប់នៅថ្ងៃទី ២៩ ខែ មករា ឆ្នាំ២០២១ ហើយការប្រកួតនេះ មានអត្តពលិកចូលរួមប្រកួតចំនួន ៧៦ នាក់ មកពីក្លិបសមាគម ចំនួន ១២ ក្នុងនោះមានខេត្តប៉ៃលិន ខេត្តស្វាយរៀង ក្រសួងការពារជាតិ ក្រសួងមហាផ្ទៃ និងក្លិបក្នុងរាជធានីភ្នំពេញ ចំនួន ៨ ក្លិបទៀត។
ទាក់ទងទៅនឹងបច្ចេកទេស លោក អ៊ូ រតនា បានបន្ថែមថា ការប្រកួតមាន ១៧ វិញ្ញាសា ក្នុងនោះវិញ្ញាសាប្រយុទ្ធចំនួន ៩ និងវិញ្ញាសាសម្តែងចំនួន ៨ មានសម្តែងមេគុណជាក្រុម និងឯកជន។
ចំណែកលោក ស៊ូម សារឿន បញ្ជាក់ថា៖«ក្រោយប្រកួតជើងឯកថ្នាក់ជាតិនេះ សហព័ន្ធកីឡាវ៉ូវីណាមកម្ពុជាមានការងារច្រើនបំផុត ដោយត្រូវបញ្ជូនអត្តពលិកទៅហ្វឹកហាត់ឱ្យបានខ្លាំងក្លា នៅប្រទេសវៀតណាម ដើម្បីត្រៀមប្រកួតអន្តរជាតិជាច្រើន»៕
