អតីតអ្នកប្រដាល់ វ៉ោយ សុធន ដែលមានលោក វ៉ោយ អេង ជាឪពុកបង្កើត និងជាគ្រូបង្វឹកផ្ទាល់នោះធ្លាប់បានសាងភាពល្បីល្បាញក្នុងនាមជាកីឡាករប្រដាល់លំដាប់ជួរមុខ ដោយមានរហ្សនាមថា ជង្គង់ពិឃាតត្រកូល «វ៉ោយ» ហើយបងប្អូនបង្កើតចំនួន ៥ នាក់ (ស្រី ១ នាក់) របស់ សុធន សុទ្ធតែជាអ្នកហាត់ប្រដាល់គុនខ្មែរឆ្នើម មកពីក្រុងសេរីសោភ័ណ ខេត្តបន្ទាយមានជ័យ។
វ៉ោយ សុធន បានសាងភាពល្បីល្បាញក្នុងអំឡុងឆ្នាំ ១៩៩៦ ប៉ុន្តែបានថមថយ ជាបន្តបន្ទាប់រហូតបាត់បង់អាជីពតែម្តងនៅក្នុងឆ្នាំ ២០១៣ ហើយបច្ចុប្បន្ន វ៉ោយ សុធន កំពុងរស់នៅក្នុងសភាពក្រីក្រតោកយ៉ាកក្នុងខ្ទមកម្សត់តូចមួយ លើទឹកដីក្រុងប៉ៃលិន ខេត្តប៉ៃលិន ដោយមានការងារជាកម្មករសំណង់បានព្រឹក ខ្វះល្ងាច និងកំពុងប្រឈមទៅនឹងការខ្វះអាហារ ដោយអត់ការងារធ្វើ ក្នុងសម័យ ដែលកូវីដ១៩ រាតត្បាតខ្លាំងនៅកម្ពុជា។
អ្នកលេងក្បាច់ជង្គង់ពិឃាត ដែលធ្លាប់ដើរប្រកួតគ្រប់ច្រកល្ហក ច្រើនខេត្តក្រុង និងព្រំប្រទល់ជាយដែនប្រទេសថៃអស់រយៈពេល ២០ ឆ្នាំ វ៉ោយ សុធន បានអះអាងថា រូបគេធ្លាប់ឡើងប្រកួតរហូតដល់ជាង ៤០០ លើក ចាញ់ប្រហែល ១០០ លើក ក្រៅពីនេះឈ្នះ និងស្មើ ៨ លើក ហើយក្នុងនោះបានផ្តួលដៃគូឱ្យសន្លប់បានចំនួន ៨០ លើក និងធ្លាប់ប្រកួតជាលក្ខណៈអន្តរជាតិបានចំនួន ៧៨ លើកផងដែរ។
យ៉ាងណាក៏ដោយ វ៉ោយ សុធន ទោះមានឪពុកបង្កើត គឺលោក វ៉ោយ អេង ជាគ្រូបង្វឹក និងខំហាត់យ៉ាងយកចិត្តទុកដាក់បានល្អ ព្រមទាំងប្រកួតមានភាពទាក់ទាញបំផុត ដោយក្បាច់ជង្គង់ ដែលអាចឡើងបានល្អគ្រប់ស្ថានភាព ប៉ុន្តែ សុធន មិនធ្លាប់ឈ្នះបានខ្សែក្រវាត់ ឬចំណាត់ថ្នាក់លេខ ១ ម្តងណាឡើយ គឺបានត្រឹមចំណាត់ថ្នាក់លេខ ៣ ប៉ុណ្ណោះ ក្រៅពីនេះ ភាគច្រើនបានត្រឹមចំណាត់ថ្នាក់លេខ ៤ និងលេខ ៥។
វ៉ោយ សុធន និយាយថា៖ «ខ្ញុំធ្លាប់បានចំណាត់ថ្នាក់លេខ ១ ក្នុងការប្រកួតជម្រើសថ្នាក់ជាតិ ហើយក្នុងការប្រកួតដណ្តើមខ្សែក្រវាត់ស្រាបៀរ ABC កាលពីឆ្នាំ ២០០០ ខ្ញុំឈ្នះបានលេខ ៣ ខណៈដែលលេខ ១ បានទៅកីឡាករ ជ័យ ប៊ុនជឿ និងលេខ ២ អូត ភូថង»។
សុធន បានបន្ថែមថា៖ «ខ្ញុំបានលាឈប់ប្រដាល់ក្នុងឆ្នាំ ២០១៣ បន្ទាប់ពីបាក់ឆ្អឹងជំនីរ ក្រោយមកបាក់ឆ្អឹងដៃឆ្វេង ដោយការទាត់របស់កីឡាករ ធន់ សុភា ហើយអ្នកដែលរារាំងផ្លូវ និងជាឧបសគ្គធំ ដែលធ្វើឱ្យខ្ញុំមិនអាចឈ្នះបានខ្សែក្រវាត់គឺមានកីឡាករ នួន សូរិយា,ផៃ ប៊ុនឈឿ, អូត ភូថង និង ធន់ សុភា តែក្រៅពីនេះ មិនលំបាក ឬជាឧបសគ្គធំក្នុងការប្រជែងនោះឡើយ»។
ទាក់ទងទៅនឹងជីវភាពប្រចាំថ្ងៃក្នុងសម័យកូវីដ១៩នេះ វ៉ោយ សុធន បាននិយាយថា៖ «ខ្ញុំឥឡូវ ដាច់បាយហើយ! កន្លងមក ខ្ញុំធ្វើការសំណង់ផង បើកឡានឱ្យគេផង ដោយបានត្រឹមម៉ារស់ៗប្រចាំថ្ងៃ ហើយក្នុងរយៈពេលឈប់ពីប្រដាល់នេះ ខ្ញុំបានសន្សំលុយ និងជំពាក់គេខ្លះ ទិញដីបានទំហំ ១២ គុណនឹង ១៧ ម៉ែត្រសង់បានខ្ទមតូចមួយ នៅភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដើម្បីរស់នៅជាមួយប្រពន្ធ និងកូន ៣ នាក់ យ៉ាងកម្សត់ណាស់»។
បន្ថែមលើភាពកម្សត់នេះ វ៉ោយ សុធន់ និងប្រពន្ធ កូន កាន់តែជួបបញ្ហាខ្លាំង នៅក្នុងវិបត្តិជំងឺកូវីដ១៩នេះដោយពួកគេរកអង្ករច្រកឆ្នាំងលែងបានហើយ។ សុធន បានបញ្ជាក់ថា៖ «មកដល់ពេលនេះ ពួកខ្ញុំគ្មានអីហូបទេ អង្ករក៏អស់ លុយក៏គ្មាន គឺដាច់បាយតែម្តង ព្រមទាំងគ្មានការងារធ្វើទៀត ហេតុនេះសូមបងប្អូន និងថ្នាក់ដឹកនាំមេត្តាជួយដល់ពួកខ្ញុំផង»។
ជាមួយគ្នានេះ វ៉ោយ សុធន បានបញ្ជាក់ពីភាពអយុត្តិធម៌ខ្លាំង ចំពោះគ្រួសារគាត់ ដែលមានបងប្អូនចំនួន ៦ នាក់ហាត់ប្រដាល់ទាំងអស់ និងបាននាំយកភាពល្បីល្បាញកន្លងមក តែគ្មាននរណាម្នាក់បានទទួល ឬចាប់ក្របខ័ណ្ឌជាមន្ត្រីរាជការជាប៉ូលិស ទាហ៊ាន ដូចកីឡាករដទៃទេ ហើយអ្នកមានក្របខ័ណ្ឌ គេមានប្រាក់ខែជួយទប់ នៅពេលប្រកួតមិនកើត។ សុធន បានបញ្ជាក់ថា៖ «ខ្ញុំស្នើសុំឱ្យមានក្របខ័ណ្ឌនឹងគេផង ពិសេសនៅពេលបើកការប្រកួតវិញ សុំការងារជាចៅក្រម អាជ្ញាកណ្តាល ដូចមិត្តៗរួមអាជីពកន្លងមកផង ដើម្បីបានកម្រៃទ្រទ្រង់ជីវភាព»។
គួររំឭកថា បងប្អូនទាំង ៦ នាក់របស់ វ៉ោយ សុធន ដែលបងប្អូនធ្លាប់ស្គាល់ជាអ្នកប្រដាល់ឆ្នើមមកពីទិសខាងលិច រួមមានទី ១ កីឡាករ វ៉ោយ ចន្ទតារា ទី ២ វ៉ោយ វណ្ឌី ទី ៣ វ៉ោយ សុធន ទី ៤ វ៉ោយ ចន្ទដារិទ្ធ ទី ៥ វ៉ោយ ចន្ទដារ័ត្ន និងទី ៦ កីឡាការិនី វ៉ោយ ស្រីម៉ុច ខណៈពួកគេចាប់ផ្តើមល្បីល្បាញ នៅក្នុងក្លិបប្រដាល់ខេត្តបន្ទាយមានជ័យក្នុងអំឡុងឆ្នាំ ១៩៩៩ ដល់ឆ្នាំ ២០១០៕