.jpg)
ក្រសួងអប់រំ យុវជន និងកីឡា បានបញ្ជាក់ថា ការប្រមូលផ្ដុំកីឡាករហ្វឹកហាត់ និងការប្រកួត ក្នុងលីកអាជីព នៅមិនទាន់អាចបើកដំណើរការបានទេពេលនេះ ដោយក្រសួងបានចេញលិខិតបញ្ជាក់ កាលពីថ្ងៃទី២០ ខែឧសភា ឆ្នាំ២០២០ ដែលចុះហត្ថលេខាដោយលោក ស សុខា រដ្ឋលេខាធិការ ក្រសួងអប់រំ យុវជន និងកីឡា។
ក្នុងលិខិតជូនដំណឹងនោះ បានបញ្ជាក់ថា បច្ចុប្បន្ន កម្ពុជាស្ថិតក្នុងស្ថានភាពការពារការឆ្លងជំងឺកូវីដ១៩ ដដែល ដូច្នេះ គោលការណ៍នានាដែលបានដាក់ចេញ ដូចជាច្បាប់គម្លាតសង្គមជាដើម ត្រូវបន្តអនុវត្តដដែល។ ការប្រមូលផ្ដុំកីឡាករ កីឡាការិនី ដើម្បីហ្វឹកហាត់ គឺមិនទាន់អាចធ្វើទៅបាននោះទេ ហើយការប្រកួតតាមលីក ក៏ត្រូវបានហាមឃាត់ដូចគ្នាដែរ។
ចំណែកក្លិបហាត់ប្រាណ ក៏មិនទាន់អាចបើកទ្វារដំណើរការដែរ ដោយគ្រប់យ៉ាងត្រូវរង់ចាំដល់មានការណែនាំពីក្រសួងសុខាភិបាល ដែលនឹងអះអាងពីស្ថានភាពនៃជំងឺកូវីដ១៩ ថា អាចគ្រប់គ្រងបាន ឬយ៉ាងណា។
នៅក្នុងលិខិតជូនដំណឹងនោះ មានខ្លឹមសារសំខាន់ៗចំនួន ៥ចំណុច៖
១. រក្សាគម្លាតសង្គម និងពង្រឹងវិធានការទប់ស្កាត់ និងប្រឆាំងជំងឺកូវីដ ១៩ ដោយត្រូវចេះកែប្រែទម្លាប់ និងឥរិយាបថនៃការរស់នៅឲ្យស្របទៅតាមសភាពធម្មតាបែបគន្លងថ្មី ដូចជាអនុវត្តអនាម័យដៃស្អាត ពាក់ម៉ាស់ និងវាស់កម្ដៅ ដើម្បីរក្សាសុខភាពឲ្យបានល្អប្រសើរ។
២. ពុំទាន់អនុញ្ញាតឲ្យប្រមូលផ្ដុំកីឡាករ កីឡាការិនី ហាត់ហ្វឹកហ្វឺន
៣. ពុំទាន់អនុញ្ញាតឲ្យដំណើរការក្លិបហាត់ប្រាណ
៤. ពុំទាន់អនុញ្ញាតឲ្យមានការប្រកួតលីក
៥.ត្រូវរង់ចាំសេចក្តីប្រកាសផ្លូវការរបស់រដ្ឋាភិបាលស្តីពីការអនុញ្ញាតឲ្យដំណើរការងារប្រក្រតីឡើងវិញ។
ផ្អែកតាមរបាយការណ៍របស់ក្រសួងសុខាភិបាលស្តីអំពីស្ថានភាពជំងឺកូវីដ១៩ នៅព្រះរាជាណាចក្រកម្ពុជា មានភាពល្អប្រសើរ ក្នុងរយៈពេលមួយខែកន្លងមក ដោយពុំមានអ្នកឆ្លងថ្មី ខណៈអ្នកជំងឺទាំង ១២២ នាក់ បានជាសះស្បើយទាំងអស់ ប៉ុន្តែតាមការវាយតម្លៃ ឃើញថាស្ថានភាពកូវីដ១៩ នៅតែមានហានិភ័យខ្ពស់នៅឡើយ ដែលទាមទារឲ្យមានការប្រុងប្រយ័ត្នខ្ពស់បំផុត៕
