.jpg)
សកម្មភាពប្រកួត Mas Fight Cambodia រវាងកីឡាករកម្ពុជា វង់ វិឆ័យ និងកីឡាករបរទេស នាពេលកន្លងមក។ រូបថត សហការី
ភ្នំពេញ៖ ព្រឹត្តិការណ៍ប្រកួតប្រដាល់គុនខ្មែរ Mas Fight Cambodai របស់សង្វៀនថោន បានឈានដល់លុបចោលការនាំកីឡាករបរទេសមកប្រកួតនៅកម្ពុជាមុនគេ សម្រាប់ការប្រកួតនៅថ្ងៃអាទិត្យនេះ ជាបណ្តោះអាសន្នសិន ដើម្បីរក្សាសុវត្ថិភាព និងបង្ការកុំឲ្យឆ្លងជំងឺកូវីដ ១៩ ដោយមានរៀបចំតែការប្រកួតតែកីឡាករក្នុងស្រុក។ ចំណែកសង្វៀនចំនួន ៥ ទៀត ដែលមានគូប្រកួតមកពីអន្តរជាតិប្រចាំសប្តាហ៍សរុបមានជាង ៣០ នាក់នោះ មិនទាន់ទទួលបានចម្លើយនៅឡើយទេ ដោយរង់ចាំទទួលបទបញ្ជាពីស្ថាប័នជំនាញ។
ជាធម្មតាការប្រកួតនៅតាមស្ថានីយទូរទស្សន៍ទាំង ៦ រាល់ចុងសប្តាហ៍នីមួយៗ មានចំនួន ១៦ លើក ដោយក្នុងនោះយ៉ាងហោចណាស់ក៏មានកីឡាករមកពីបរទេស ៣០ នាក់ដែរ ដោយមកពីប្រទេស ថៃ ច្រើនជាងគេ។
តាមលិខិតជូនដំណឹងពីទូរទស្សន៍ថោន និងគណៈកម្មការ Mas Fight Cambodia និងគណៈកម្មការផ្គូផ្គង Mas Fight International មានទីស្នាក់ការនៅក្រុងហុងកុង ដែលភ្នំពេញប៉ុស្តិ៍ទទួលបានកាលពីព្រឹកថ្ងៃពុធម្សិលមិញបានឲ្យដឹងថា ការប្រកួតនេះ ត្រូវផ្អាកបណ្តោះអាសន្នកីឡាករមកពីបរទេស ដែលក្នុង ១ សប្តាហ៍ មានចំនួនយ៉ាងហោច ៣ នាក់ ប៉ុន្តែត្រូវដាក់ជំនួសឲ្យមានការប្រកួតត្រឹមកីឡាករក្នុងស្រុកខ្មែរនឹងខ្មែរ។
លោក ស្រ៊ុន កុសល នាយកគ្រប់គ្រងកម្មវិធីទូរទស្សន៍ថោន និងជាគណៈកម្មការ Mas Fight Cambodia បានប្រាប់ភ្នំពេញប៉ុស្តិ៍ថា៖ «ដោយសារបញ្ហាជំងឺកូវីដ ១៩ រីករាលដាល និងក្តីបារម្ភពីសុវត្ថិភាពការពារមិនឲ្យឆ្លងនោះ យើងបានសម្រេចរួមគ្នាជាមួយគណៈកម្មការផ្គូផ្គងនៅហុងកុង និងបានជួបជាមួយប្រធានសហព័ន្ធកីឡាប្រដាល់គុនខ្មែរ គឺលោក តែម ម៉ឺន ដើម្បីផ្អាកកីឡាករមកពីបរទេសជាបណ្តោះអាសន្ន ប៉ុន្តែយើងនៅតែបន្តការប្រកួតជាលក្ខណៈមិត្តភាពថ្នាក់ជាតិកីឡាករខ្មែរនឹងខ្មែរដដែល»។
លោក កុសល បានបញ្ជាក់ថា៖ «គិតមកដល់ពេលនេះ ទោះជាយើងមិនទាន់ទទួលបានបទបញ្ជាពីស្ថាប័នជំនាញឲ្យផ្អាកការប្រកួត ប៉ុន្តែកីឡាករដែលខាងសង្វៀន Mas FightCambodia នាំមកប្រកួត គឺឆ្លងទ្វីប ឆ្លងតំបន់ ដោយធ្វើដំណើរតាមយន្តហោះ ហេតុនេះគេត្រូវតែប្រយ័ត្នប្រយែងការពារដូចគ្នា»។
តំណាងក្រុមហ៊ុនឧបត្ថម្ភកម្មវិធីប្រកួតប្រដាល់មកពីក្រុមហ៊ុន Khmer Beverages ដែលស្ពនស័រកម្មវិធីប្រដាល់នៅសង្វៀនបាយ័ន សង្វៀនថោន និងសង្វៀន CNC បានប្រាប់ដោយសុំមិនប្រាប់ឈ្មោះថា៖ «កម្មវិធីក៏អាចនឹងប្រែប្រួល ដោយរង់ចាំការប្រជុំមួយជាមួយភាគីពាក់ព័ន្ធនៅថ្ងៃទី ១៩ ខែមីនានេះ អ៊ីចឹងយើងនឹងទទួលបានលទ្ធផលច្បាស់ការណ៍។
ចំណែកលោក ថៃ អ៊ូ ប្រតិភូនាំកីឡាករពីប្រទេស ថៃ មកប្រកួតសង្វៀនប៉ុស្តិ៍ SEATV និងប៉ុស្តិ៍លេខ ៥ បាននិយាយថា៖ «ក្នុងសប្តាហ៍នេះ មិនទាន់មានការហាមឃាត់នៅឡើយ ហេតុនេះខ្ញុំនៅតែបន្តនាំកីឡាករមកប្រកួតសិន ដោយរង់ចាំទទួលបទបញ្ជាថ្មី ទើបអនុវត្តតាមភ្លាម។ ទោះជាយ៉ាងណា នៅច្រកចេញចូលព្រំដែនមានការរឹតបន្តឹង ដោយមានពេទ្យពិនិត្យវាស់កម្ដៅជាច្រើនកន្លែង គឺតឹងតែងជាងមុន»។
ជាមួយគ្នាប្រភពពីការប្រកួតនៅខេត្ត លោក សៅ ប៊ុនធិន គ្រូប្រដាល់ និងជាចៅក្រមអាជ្ញាកណ្តាលនៅខេត្តបាត់ដំបងបានប្រាប់ភ្នំពេញប៉ុស្តិ៍ថា៖ «ការប្រកួតនៅខេត្ត គេផ្អាកសិន ហើយកីឡាករ និងគ្រូបង្វឹកមួយចំនួន ដែលធ្លាប់ទទួលបានកម្រៃប្រាក់ពីការប្រកួត គឺបាត់ចំណូល និងមានជីវភាពលំបាកជាងមុន»។
ចំណែកលោក ឈិន ក្វាន់ចៃ គ្រូបង្វឹកក្លិបមកុដរាជសីហ៍ បាននិយាយថា៖ «ខ្ញុំមានការព្រួយបារម្ភខ្លាំងពេលគេផ្អាកការប្រកួត ព្រោះរាល់ថ្ងៃទាំងកីឡាករ និងគ្រូបង្វឹកបានចំណូលពីប្រដាល់ ដើម្បីទ្រទ្រង់ជីវភាព»៕
