ភ្នំពេញ៖ តាមគម្រោងកាលពីដើមសប្តាហ៍របស់សង្វៀនបាយ័ន គឺមានការប្រកួតចំនួន ៣ ថ្ងៃ មានថ្ងៃសុក្រ សៅរ៍ និងថ្ងៃអាទិត្យ ប៉ុន្តែជាក់ស្តែងការប្រកួតបានតែថ្ងៃសុក្រមួយទេ ចំណែកថ្ងៃសៅរ៍ និងអាទិត្យ ត្រូវបានផ្អាកភ្លាមៗតែម្តង ទោះបីអ្វីៗបានត្រៀមរួចរាល់អស់ហើយក៏ដោយ។ ផ្ទុយពីនេះ ចំពោះសង្វៀន CNC មិនបានផ្អាកការប្រកួតនោះទេ គឺនៅតែរៀបចំប្រកួតទាំង ៤ កម្មវិធីកាលពីថ្ងៃសៅរ៍ និងថ្ងៃអាទិត្យ ដោយមានផ្សាយផ្ទាល់តាមកញ្ចក់ទូរទស្សន៍យ៉ាងរលូន។
សង្វៀនបាយ័ន ដែលមាន ៥ កម្មវិធីនោះ គឺបានប្រកួតរួចរាល់តែកម្មវិធីគូបូតា កាលពីល្ងាចថ្ងៃសុក្រ ដោយមានកីឡាករចំនួន ៥ គូ ប៉ុន្តែកម្មវិធី ចំនួន ៤ ទៀត មានកម្មវិធី Chhampion កម្មវិធីប្រដាល់ Super Whisky កម្មវិធីប្រដាល់ Wurkz និងកម្មវិធីប្រដាល់របស់ Carabao ដែលត្រូវធ្វើនៅថ្ងៃសៅរ៍ និងថ្ងៃអាទិត្យ ត្រូវបានផ្អាកទាំងស្រុងតែម្តង។
ជុំវិញបញ្ហានេះ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានថ្លែងថា៖ «សង្វៀនប្រដាល់នៅបាយ័ន បានផ្អាកការប្រកួតភ្លាមៗ ដើម្បីចូលរួមរក្សាការពារបញ្ហាចម្លងនៃជំងឺកូវីដ ១៩ និងដើម្បីសុវត្ថិភាពដល់កីឡាករ គ្រូបង្វឹក និងគណៈកម្មការ ប្រកួតផងដែរ។ ចំណែកសង្វៀន CNC នៅបន្តការប្រកួតចប់ទាំង ៤ កម្មវិធី ទាំងសៅរ៍ និងថ្ងៃអាទិត្យ»។
នៅពេលសួរថា ចុះហេតុអ្វីសង្វៀនប្រដាល់ខ្លះបិទ សង្វៀនខ្លះនៅបន្តប្រកួតបាន? ហើយកីឡាករ និងគណៈកម្មការប្រកួត ជាមន្ត្រីក្នុងសហព័ន្ធតែមួយ ដោយអ្នកខ្លះចល័តពីប៉ុស្តិ៍មួយទៅមួយទៀត ឬកីឡាករខ្លះប្រកួតប្តូរសង្វៀននោះ លោក តែម ម៉ឺន បានពន្យល់ថា៖ «យើងកំពុងតែត្រួតពិនិត្យតាមការជាក់ស្តែង ក្នុងនោះយើងចាប់ផ្តើមផ្អាកការប្រកួតជាបណ្តោះអាសន្នពីសង្វៀនមានបញ្ហា និងឈានទៅជាបន្តបន្ទាប់ ទៅតាមលក្ខណៈជាក់ស្តែងតាមការណែនាំរបស់ក្រសួងជំនាញ និងភាគីពាក់ព័ន្ធ ដូចជាខាងអ្នកគ្រប់គ្រងសង្វៀនផ្ទាល់តែម្តង»។
ប្រធានសហព័ន្ធកីឡាប្រដាល់រូបនេះ បានបញ្ជាក់ថា៖ «តែទោះជាយ៉ាងណា ចំពោះបញ្ហានេះ (ការផ្អាកការប្រកួតនៅសង្វៀនបាយ័ន) វាបានកើតឡើងភ្លាមៗ អ៊ីចឹងជួនពេលខ្លះ យើងខិតខំដោះស្រាយតាមលទ្ធភាពជាក់ស្តែង ហើយសប្តាហ៍បន្តបន្ទាប់ យើងក៏មិនអាចទស្សន៍ទាយមុនបានឡើយថា វាយ៉ាងណា?»។
ចំណែកលោក ធន់ សុភា គ្រូបង្វឹកប្រចាំក្រសួងការពារជាតិ និងជាជំនួយការផ្គូផ្គងប្រចាំសង្វៀនបាយ័នបាននិយាយថា សង្វៀនបាយ័ន ផ្អាកការប្រកួតចំនួន ២ សប្តាហ៍ ដោយមូលហេតុរក្សាការពារជំងឺឆ្លងកូវីដ ១៩ ដែលមានមនុស្សឆ្លងច្រើន។ លោកបន្ថែមថា ចំណែកកីឡាករ ដែលត្រៀមខ្លួនមកប្រកួត ហើយត្រូវខកខាននោះ គ្មានប្រាក់តម្លៃខ្លួនទេ ប៉ុន្តែអ្នកមកពីខេត្តមួយចំនួនតូចទទួលបានសោហ៊ុយធ្វើដំណើរខ្លះ ទៅតាមអ្វីដែលអនុវត្តកន្លងមក។
លោកគ្រូពេទ្យម្នាក់បានប្រាប់ ដោយសុំមិនបញ្ចេញឈ្មោះថា៖ «ការប្រកួតប្រដាល់នេះ គួរតែផ្អាកជាបណ្តោះអាសន្ន ព្រោះមានការជួបជុំគ្នាច្រើន ហេតុនេះបើមានកីឡាករណាម្នាក់ផ្ទុកជំងឺកូវីដ ១៩ គឺងាយនឹងឆ្លងណាស់ ហើយខ្ញុំឆ្ងល់ថា កីឡាករប្រមូលផ្តុំជម្រើសជាតិអាចផ្អាកបាន ចុះហេតុអ្វីការប្រកួតប្រដាល់ឯកជនជាលក្ខណៈផ្សាយពាណិជ្ជកម្ម ហេតុអ្វីផ្អាកមិនបាន?»៕