.jpg)
ការប្រកួតប្រដាល់ ដែលបានរៀបចំនៅលើសង្វៀនតាមប៉ុស្តិ៍ កន្លងមក។ រូប ភ្នំពេញ ប៉ុស្តិ៍
ភ្នំពេញ៖ «ស្វែងរកកំពូលអ្នកប្រដាល់គុនខ្មែរ» ជាឈ្មោះព្រឹត្តិការណ៍ប្រកួតប្រដាល់ថ្មី ដែលស្ថានីយទូរទស្សន៍ហង្សមាស រួមជាមួយដៃគូឧបត្ថម្ភ និងសហព័ន្ធកីឡាប្រដាល់គុនខ្មែរបានសហការគ្នារៀបចំឱ្យមានឡើងជាលើកដំបូង ហើយនឹងចាប់ផ្តើមប្រកួតជាផ្លូវការ នៅយប់ថ្ងៃសៅរ៍ ចុងសប្តាហ៍នេះ។
ទូរទស្សន៍ហង្សមាសធ្លាប់គ្រោងរៀបចំកម្មវិធីប្រកួតប្រដាល់នេះ រយៈពេលយូរឆ្នាំមកហើយ ប៉ុន្តែនៅតែមិនទាន់លេចចេញជាសកម្មភាពនៅឡើយ គឺទើបតែថ្មីៗនេះ ប្រភពច្បាស់ការពីមន្ត្រីសហព័ន្ធកីឡាប្រដាល់គុនខ្មែរបានឱ្យដឹងថា ការប្រកួតនឹងចាប់ផ្តើមនៅដើមខែមករា ឆ្នាំ ២០២១ នេះ ដោយមានកីឡាករឆ្នើមៗក្នុងប្រភេទទម្ងន់ ៦០ គីឡូក្រាម សរុប ៣២ នាក់ មកពីទូទាំងប្រទេសឱ្យប្រកួតគ្នា។
លោកឧត្តមសេនីយ៍ទោ និន ភិរម្យ អនុប្រធានសហព័ន្ធកីឡាប្រដាល់គុនខ្មែរបានប្រាប់ថា៖ «សង្វៀនប្រដាល់ថ្មីរបស់ទូរទស្សន៍ហង្សមាស បានត្រៀម និងរៀបចំមន្ត្រីបច្ចេកទេស មានចៅក្រម អាជ្ញាកណ្តាល និងកីឡាករ រួចរាល់ហើយ ដោយរង់ចាំតែថ្ងៃបើកការប្រកួតប៉ុណ្ណោះ។ ចំពោះរូបមន្តប្រកួតវិញ គឺកីឡាករឆ្នើមៗទាំង ៣២ នាក់ ត្រូវដាក់ឱ្យប្រកួតជម្រុះ ៥ វគ្គ ឬ ៥ ជុំដោយសម្រួចយកតែជើងឯកចំណាត់ថ្នាក់លេខ ១ ម្នាក់គត់ គឺគ្មានចំណាត់ថ្នាក់លេខ ២ លេខ ៣ និងលេខ ៤ នោះឡើយ»។
តាមតារាងកម្មវិធីប្រកួត គឺកីឡាករទាំង ៣២ នាក់ ត្រូវប្រកួតជម្រុះយក ១៦ នាក់ ហើយកីឡាករទាំង ១៦ នាក់នេះ ត្រូវចាប់ឆ្នោតបែងចែកជា ៤ ពូល ដោយពូលនីមួយៗត្រូវប្រកួតជម្រុះវិលជុំ យកអ្នកលេខ ១ និងលេខ ២ តាមពូលទាំង ៤ ឡើងទៅប្រកួតវគ្គ ៨ នាក់។ នៅក្នុងវគ្គ ៨ នាក់នេះ ត្រូវចែកជា ២ ពូលទៀត ហើយត្រូវប្រកួតជម្រុះយកអ្នកលេខ ១ និងលេខ ២ ឡើងទៅប្រកួតវគ្គពាក់កណ្តាលផ្តាច់ព្រ័ត្រ រួចបន្តយកអ្នកឈ្នះ ២ នាក់ នៅវគ្គនេះ ឡើងទៅប្រកួតផ្តាច់ព្រ័ត្ររកម្ចាស់ជើងឯក ដោយការប្រកួតទាំង ៥ ជុំនេះ ត្រូវចំណាយពេលវេលាប្រកួតសរុបអស់ចំនួន ១៩ សប្តាហ៍។
ចំណែកកីឡាករឆ្នើមៗ បានត្រៀមរួចហើយនោះ មានដូចជា ទូច ដេវីត, ព្រឿង សុជាតិ, លី តឿន, រឿម វណ្ណៈ, ចិត្ត សុភី, បាង កាយ៉ាក, លាភ សំណាង, ថា សារុន, សុខ សាវិន, ស៊ន រ៉ាគីម, គង់ ហូវ, លាភ រដ្ឋា, យុគ យក្សផ្លែ, ឡូញ វណ្ឌី, ខាំ សូរិយា, ម៉ន សាម៉េត, ស៊ឹម ប៊ុនឆៃ, អេលីត សាន់, សុខ សុវណ្ណ, មាឃ វណ្ណរ៉ា និងឡុង លីផេង ជាដើម។
លោក អ៊ា វណ្ណា អ្នកសម្របសម្រួលសង្វៀនថ្មីប្រចាំស្ថានីយទូរទស្សន៍ហង្សមាសប្រាប់ថា៖ «ការប្រកួតនេះ នឹងចាប់ផ្តើមនៅរៀងរាល់ថ្ងៃសៅរ៍ ចាប់ពីថ្ងៃទី ៩ ខែ មករា ឆ្នាំ ២០២១ នៅស្ថានីយ HDTV Eaon 2 ផ្ទាល់ចាប់ពីម៉ោង ១៨ ដល់ម៉ោង ២០ យប់ ដោយមានការផ្សាយផ្ទាល់»៕
