.jpg)
សេរីវ៉ាន់ថង (ឆ្វេង) នឹងត្រូវដាក់ឲ្យប្រកួតជាមួយ Pechtsakaew ថ្ងៃសម្ពោធសង្វៀនប្រដាល់ឯកភ្នំ។ ស្រេង ម៉េង ស្រ៊ុន
ភ្នំពេញៈ សង្វៀនប្រដាល់ថ្មីមួយដែលផ្ទុកអ្នកទស្សនាបាន ២៥០០ នាក់ឈ្មោះថា «សង្វៀនប្រដាល់ឯកភ្នំ» នឹងត្រូវបើកឲ្យដំណើរការនៅក្នុងបុរីរស្មីបាត់ដំបង ក្រុងបាត់ដំបង ខេត្តបាត់ដំបងនៅថ្ងៃសៅរ៍ និងថ្ងៃអាទិត្យនេះដើម្បីជួយអ្នកប្រដាល់វ័យក្មេងគ្មានទីផ្សារប្រកួតបានឡើងប្រកួតពង្រឹងសមត្ថភាពឲ្យក្លាយទៅជាជើងខ្លាំង និងស្តារប្រជាប្រិយរបស់ខេត្តបាត់ដំបងឲ្យស័ក្តិសមទៅនឹងពាក្យមួយថា «អ្នកបាត់ដំបងជាពូជអ្នកប្រដាល់»។
លោក ហេង តុលា ម្ចាស់សង្វៀនប្រដាល់ឯកភ្នំ និងជាប្រធានក្រុមហ៊ុនហេងតុលាគ្រុប បានថ្លែងប្រាប់ភ្នំពេញប៉ុស្តិ៍កាលពីម្សិលមិញថា៖ «ខ្ញុំជាអ្នកខេត្តបាត់ដំបង អ៊ីចឹងខ្ញុំចង់ឲ្យខេត្តនេះមានកន្លែងប្រដាល់ ដើម្បីជួយឲ្យកីឡាករ និងក្លិបប្រដាល់ក្នុងខេត្តបាត់ដំបងមានការងារធ្វើព្រោះយើងឭថា ក្លិបដែលមានកីឡាករហើយ តែបែរជាមិនបានឡើងប្រកួត»។
លោកបន្តថា៖ «សង្វៀនប្រដាល់តាមប៉ុស្តិ៍នៅភ្នំពេញ គេយកតែកីឡាករល្បីៗទៅវ៉ៃ តែអ្នកអត់សូវល្បី គេអត់យកទៅវ៉ៃទេ អ៊ីចឹងអ្នកហាត់ថ្មីៗ អត់មានកន្លែងវ៉ៃទេ។ ខ្ញុំបានឭក្មេងៗនិយាយរអ៊ូពីបញ្ហានេះថា ខំហាត់ប្រដាល់ធ្វើអី បើហាត់ហើយ អត់បានឡើងវ៉ៃដដែលហ្នឹង? បញ្ហាទាំងនេះទើបខ្ញុំបង្កើតឲ្យមានសង្វៀនប្រដាល់ឯកភ្នំនេះឡើង ដើម្បីឲ្យវិស័យប្រដាល់នៅខេត្តបាត់ដំបងមានភាពប្រសើរឡើងវិញ ព្រោះអ្នកបាត់ដំបងរបស់យើងចូលចិត្តមើលប្រដាល់ណាស់ និងជាខេត្តមានឈ្មោះល្បីខាងប្រដាល់តាំងពីបុរាណមក»។
ការសម្រេចបើកឲ្យមានសង្វៀនប្រដាល់ឯកភ្នំនេះក៏ដើម្បីលើកមុខមាត់ខេត្តបាត់ដំបងពីការមើលស្រាលពីសំណាក់អ្នកមកពីខេត្តមួយចំនួនរបស់ថៃផងដែរ ដែលពួកគេបានចំអកថា ខេត្តបាត់ដំបងកម្សត់ដល់ថ្នាក់រកសង្វៀនប្រដាល់ផ្ទាល់ខ្លួនមួយមិនបាន។
លោក ហេង តុលា បានបញ្ជាក់ថា៖ «ខេត្តមួយចំនួនរបស់ថៃដែលនៅជិតយើងដូចជាខេត្តត្រាត ខេត្តចន្ទ ខេត្តឈុនបូរី និងផាត់តាយ៉ាជាដើមគេមានសង្វៀនប្រដាល់ខ្នាតអន្តរជាតិទាំងអស់គឺអត់តែខេត្តបាត់ដំបង អ៊ីចឹងពេលគេមកលេងខេត្តយើង គេមើលងាយយើងថា ម៉េចបានជាអត់មានសង្វៀនប្រដាល់? អ៊ីចឹងហើយទើបខ្ញុំចេះតែគិតថាខេត្តរបស់យើងធ្លាប់មានភាពស៊ីវិល័យតាំងពីសម័យសង្គមមក ហេតុនេះយើងត្រូវតែបើកឲ្យមានសង្វៀនខ្នាតអន្តរជាតិនេះឡើង ដើម្បីកុំឲ្យគេមើលស្រាលយើងទៀត»។
បើតាមលោក ហេង តុលា បានឲ្យដឹងទៀតថាសង្វៀនប្រដាល់ឯកភ្នំមានការប្រកួត ២ ថ្ងៃក្នុង ១ សប្តាហ៍គឺថ្ងៃសៅរ៍មាន ៧ គូ និងថ្ងៃអាទិត្យមាន ៧ គូ ហើយក្នុងនោះមានគូមិត្តភាពក្នុងស្រុក ៣ គូ និងមិត្តភាពអន្តរជាតិ ៤ គូដូចគ្នា ចំណែកប្រាក់តម្លៃខ្លួននៃការប្រកួតត្រូវបានលោក តុលា បង្ហើបថាមានចំនួនច្រើនជាងតម្លៃខ្លួនប្រកួតនៅសង្វៀនភ្នំពេញទៅទៀត។
សម្រាប់ការប្រកួតមិត្តភាពអន្តរជាតិទាំង ៤ គូនៅថ្ងៃសៅរ៍ដែលចាប់ផ្តើមពីម៉ោង ៦:៣០ ដល់ម៉ោង ១០ យប់កីឡាករកម្ពុជា ឈុត សេរីវ៉ាន់ថង ត្រូវប៉ះថៃ Pechtsakaew ក្នុងទម្ងន់ ៥៨ គីឡូក្រាម ឯម ឡេងលី ជួបថៃ Khundech ក្នុងទម្ងន់ ៧០ គ.ក្រ ឯ ណាម ម៉ូរ៉ាក់ ប្រកួតក្នុងទម្ងន់ ៦៣ គ.ក្រជាមួយថៃ Saksith ហើយ សេន កុសល ត្រូវជួបថៃ Pecthboonmee ក្នុងទម្ងន់ ៥៧ គីឡូក្រាម។
ចំណែកការប្រកួតនៅថ្ងៃអាទិត្យពីរសៀលម៉ោង ២:៣០ ដល់ល្ងាចម៉ោង ៦ អ្នកលេងជង្គង់ ឡុង សុភី ត្រូវប៉ះថៃ Suay Ngam ក្នុងទម្ងន់ ៧១ គ.ក្រ មុនពេល ឈួន រិទ្ធី តទល់ជាមួយថៃ Dennakorn ក្នុងទម្ងន់ ៧០ គ.ក្រ ឯ រៀម វណ្ណៈ ប្រឈមជាមួយកីឡាករវៀតណាម Dennhonghua ក្នុងទម្ងន់ ៦៤ គ.ក្រ ហើយ ឈឿន ឆៃដែន ប៉ះថៃទម្ងន់ ៦១ គ.ក្រ Linglom៕
