ភ្នំពេញ៖ ការប្រកួតប្រដាល់នៅតាមសង្វៀនឯកជនទាំង ៦ ដែលបានកំណត់ឱ្យផ្អាកការប្រកួតជាថ្មីភ្លាមៗ បន្ទាប់ពីមានករណីឆ្លងជំងឺកូវីដ ១៩ ចូលសហគមន៍ កាលពីថ្ងៃទី ២៨ ខែ វិច្ឆិកា ឆ្នាំ ២០២០ នោះ គឺពេលនេះត្រូវបានអនុញ្ញាតឱ្យបើកការប្រកួតវិញហើយ នៅចុងសប្តាហ៍នេះ។
ការអនុញ្ញាតឱ្យបើកការប្រកួតប្រដាល់ជាថ្មីនេះ គឺត្រូវបានធ្វើឡើង បន្ទាប់ពីសហព័ន្ធកីឡាប្រដាល់គុនខ្មែរ បានប្រជុំជាមួយដៃគូស្ថានីយទូរទស្សន៍ ជាម្ចាស់សង្វៀនប្រដាល់កាលពីថ្ងៃពុធ ហើយក្នុងនោះ ម្ចាស់សង្វៀនទាំង ៦ ស្ថានីយទូរទស្សន៍ ដោយធ្លាប់ជាដៃគូសហការ មានបាយ័ន និង CNC ដែលមានកម្មវិធីប្រកួតច្រើនជាងគេ រួមទាំងសង្វៀនប៉ុស្តិ៍លេខ ៥ សង្វៀនថោន សង្វៀន PNN នៅរាជធានីភ្នំពេញ និងសង្វៀនឯកភ្នំ ខេត្តបាត់ដំបង ដែលមានតែ ១ លើក ក្នុង ១ សប្តាហ៍នោះ សុទ្ធតែត្រៀមបើកការប្រកួតទាន់ទាំងអស់នៅចុងសប្តាហ៍នេះ។
យ៉ាងណាក៏ដោយការអនុញ្ញាតឱ្យបើកការប្រកួតប្រដាល់ឡើងវិញនេះ ត្រូវបានអង្គប្រជុំបន្ថែមនូវចំណុចពិសេស គឺរក្សាអនាម័យការពារជំងឺកូវីដ ១៩ តាមគោលការណ៍បច្ចេកទេសរបស់ក្រសួងសុខាភិបាល និងកំណត់ឱ្យកម្មវិធីប្រកួតទាំងមូលនៅក្នុងសង្វៀននីមួយៗ មានមនុស្សចូលរួមទាំងអស់ គឺទាំងកីឡាករ មន្ត្រីបច្ចេកទេស ព្រមទាំងខាងទូរទស្សន៍មានពិធីករ ពិធីការិនីសរុបមិនឱ្យលើស ២០ នាក់ និងមិនអនុញ្ញាតឱ្យមានអ្នកទស្សនាផ្ទាល់ទេ។
លោក ជួប វុត្ថា ដែលបានចូលប្រជុំកាលពីថ្ងៃពុធនោះ បានប្រាប់ថា៖ «ព្រឹកមិញ ខាងសហព័ន្ធកីឡាប្រដាល់គុនខ្មែរ និងភាគីពាក់ព័ន្ធ រួមទាំងតំណាងសង្វៀនទូរទស្សន៍បានទទួលការអនុញ្ញាតឱ្យរៀបចំការប្រកួតវិញទាំងអស់ គឺចាប់ពីថ្ងៃសុក្រ ទី ១៨ ខែ ធ្នូ ឆ្នាំ ២០២០ នេះទៅ ហើយតំណាងខាងទូរទស្សន៍ សុទ្ធតែសម្តែងការសប្បាយចិត្ត ព្រោះកម្មវិធីប្រកួតបានដំណើរការ យើងមានការងារធ្វើទាំងគ្រប់ភាគី ពិសេសកីឡាករគ្នាបានប្រកួត ទទួលបានប្រាក់ជួយជីវភាព»។
អ្នកតំណាងឱ្យស្ថានីយទូរទស្សន៍សង្វៀនថោន លោក ជួប វុត្ថា បានបន្ថែមថា៖ «ខាងសង្វៀនថោន រៀបចំប្រកួតថ្ងៃអាទិត្យដូចសព្វមួយដង គឺរៀបចំការប្រកួតទាន់ ហើយទទួលបានតាមការណែនាំដូចជាពង្រឹងអនាម័យ ពាក់ម៉ាស់ រក្សាគម្លាតព្រមទាំងកាត់បន្ថយចំនួនមនុស្សឱ្យតិច មិនលើស ២០ នាក់ គឺធានាបាន»។
ចំណែកលោក ញាន សុធី ជំនួយការរៀបចំការប្រកួតរបស់សង្វៀនប៉ុស្តិ៍លេខ ៥ និយាយថា ខាងសង្វៀនប៉ុស្តិ៍លេខ ៥ រៀបចំប្រកួតទាន់នៅសប្តាហ៍នេះ គឺកំពុងតែផ្គូផ្គងរៀបរយឱ្យបានល្អឡើងវិញ និងដាក់ឱ្យប្រកួតវគ្គ ពាក់កណ្តាលផ្តាច់ព្រ័ត្រ ដណ្តើមពានផងដែរ។ ចំណែកខាង បាយ័ន CNC PNN និងសង្វៀនឯកភ្នំ បានប្រកាសពីការរៀបចំការប្រកួតឡើងវិញ ទាន់ពេលដូចគ្នា។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ មិនអាចទាក់ទងបានទេ ប៉ុន្តែលោកឧត្តមសេនីយ៍ទោ និន ភារម្យ ជាអនុប្រធានសហព័ន្ធប្រាប់ថា៖ «គ្រប់សង្វៀន ត្រូវបានអនុញ្ញាតឱ្យបើកការប្រកួតឡើងវិញគ្រប់ស្ថានីយ ដែលធ្លាប់ប្រកួតតាមការណែនាំរបស់ថ្នាក់ដឹកនាំ ប៉ុន្តែបន្ថែមឱ្យមានការប្រុងប្រយ័ត្នខ្ពស់ជាងមុន គឺអនុញ្ញាតឱ្យបន្ថែមតែអ្នកឱ្យទឹកម្នាក់ប៉ុណ្ណោះ ក្នុងកីឡាករម្នាក់ ដោយហាមគ្រូ និងអ្នកគាំទ្រ»។
លោកឧត្តមសេនីយ៍ទោ និន ភារម្យ បានប្រាប់បន្ថែមថា៖ «ចំណែកគណៈកម្មការតិចបំផុត ដែលអាចធ្វើទៅបាន គឺសរុបគ្រប់ផ្នែក មិនឱ្យលើស ២០ នាក់ ហើយតាមការឯកភាពគ្នា សង្វៀនដែលធ្លាប់បើកប្រកួតកន្លងមក គឺអនុវត្តតាមការណែនាំបាន ប៉ុន្តែសង្វៀនថ្មីមួយ ដែលទើបតែទទួលបានច្បាប់អនុញ្ញាតថ្មីៗ គឺសង្វៀនទូរទស្សន៍ហង្សមាស ត្រូវបានពន្យារពេលការប្រកួតដល់ខែមករា ឆ្នាំ ២០២១»៕