ភ្នំពេញ៖ កម្មវិធីប្រដាល់គុនខ្មែរនៅសង្វៀនអាស៊ីអាគ្នេយ៍ ដែលធ្លាប់មានប្រកួតច្រើនលើកក្នុង ១ សប្តាហ៍នោះ គិតមកដល់បច្ចុប្បន្ននៅសល់តែ ១ កម្មវិធីទេ គឺការប្រកួតនៅល្ងាចថ្ងៃសៅរ៍ ក្រោមការឧបត្ថម្ភផ្តាច់មុខដោយភេសជ្ជៈប៉ូវកម្លាំងខារ៉ាបាវ ហើយដោយសារកម្មវិធីនេះ នឹងត្រូវចប់កិច្ចសន្យាត្រឹមថ្ងៃទី ៣០ ខែ មិថុនា ឆ្នាំ ២០២០ អ៊ីចឹងមានន័យថា សង្វៀន SEATV នឹងផ្អាកកម្មវិធីប្រដាល់គុនខ្មែរទាំងស្រុង ដោយមិនទាន់មានគម្រោងថ្មីបន្តទៀតនៅឡើយ។
សង្វៀន SEATV បានចាប់ផ្តើមរៀបចំការប្រកួតល្បីខ្លាំងនៅឆ្នាំ ២០១៣ ដោយកាលនោះក្នុង ១ សប្តាហ៍ មានរហូតដល់ ៦ កម្មវិធី និងប្រកួតពីថ្ងៃសុក្រ ដល់អាទិត្យ ដោយទទួលបានប្រិយភាពខ្ពស់ជាងគេ។ ប៉ុន្តែក្រោយៗមកទៀត ស្របពេលសង្វៀនប្រដាល់ប៉ុស្តិ៍ផ្សេង មានប្រជាប្រិយភាពជាងវិញនោះ ធ្វើឲ្យសង្វៀនមួយនេះ ត្រូវបានដៃគូសហការឧបត្ថម្ភដកថយទៅសង្វៀនដទៃ ដោយគ្មានមូលហេតុច្បាស់លាស់ធំដុំ ខណៈពេលនេះ កម្មវិធី ១ ចុងក្រោយ ក៏នឹងផុតកុងត្រានៅត្រឹមថ្ងៃទី ៣០ ខែមិថុនា ខាងមុខ។
លោក ញាន សុធី អ្នកគ្រប់គ្រងកម្មវិធីប្រដាល់គុនខ្មែរប្រចាំនៅសង្វៀន SEATV បានប្រាប់ភ្នំពេញប៉ុស្តិ៍ កាលពីថ្ងៃអង្គារថា៖ «សង្វៀនខាងខ្ញុំពិតជាបញ្ចប់ការប្រកួតជាបណ្តោះអាសន្នមួយរយៈសិន ដោយសារតែដៃគូសហការឧបត្ថម្ភកម្មវិធីផុតកិច្ចសន្យា ហើយមិនទាន់មានដៃគូឧបត្ថម្ភថ្មីបន្តទៀតនៅឡើយ។ ខ្ញុំមិនអាចប្រាប់ពីកម្មវិធីប្រដាល់នេះ នឹងបើកឡើងវិញបាននៅពេលណាទេ ព្រោះទាក់ទងទៅនឹងការស្វែងរកដៃគូពាណិជ្ជកម្ម អ្នកសហការឧបត្ថម្ភកម្មវិធីថ្មី»។
ទោះជាយ៉ាងនេះក្តី ការផលិតព័ត៌មានកម្មវិធីកីឡា ប្រចាំថ្ងៃ របស់ SEATV នៅតែផលិតផ្សាយបន្តជាធម្មតា។ លោក ជឿង ធួន ប្រធានក្រុមផលិតព័ត៌មានកីឡាប្រចាំថ្ងៃនៅ SEATV បានប្រាប់ភ្នំពេញប៉ុស្តិ៍ថា៖ «ខ្ញុំបានដឹងថា កីឡាប្រដាល់ត្រូវផ្អាក ប៉ុន្តែខាងខ្ញុំជាអ្នកផលិតព័ត៌មានកីឡាប្រចាំថ្ងៃ មានគ្នា ៣ នាក់ មិនទាន់ផ្អាកទេ គឺនៅតែផលិតផ្សាយជាធម្មតាគ្រាន់តែខាងក្រុមហ៊ុន នៅជំពាក់ប្រាក់ខែតាំងពីខែកុម្ភៈ ឆ្នាំ ២០២០ មក មិនទាន់បានបើកជូននៅឡើយ»។
លោក ជឿង ធួន ក៏បានបន្ថែមថា កាលពីសប្តាហ៍មុន ខាងក្រុមហ៊ុនបានហៅប្រជុំប្រាប់ដល់បុគ្គលិកផ្នែកព័ត៌មានមួយចំនួនឲ្យព្យូរការងារមួយរយៈសិន ដោយគ្មានប្រាក់ខែ ប៉ុន្តែអ្នកយកព័ត៌មានទាំងនោះ អាចទៅយកព័ត៌មាន ដោយស្ម័គ្រចិត្តបានជាធម្មតា ហើយអ្នកព្យូរការងារទាំងនោះ នឹងទទួលបានប្រាក់ខែ ដែលបានជំពាក់កន្លងមកចំនួន ៤ ខែ នៅពាក់កណ្តាលខែមិថុនាឆ្នាំ ២០២០។
គួររំឭកក់ថា សង្វៀន SEATV ក្រៅពីផ្តល់តម្លៃខ្លួនប្រកួតឲ្យកីឡាករ ដែលមកប្រកួត គឺនៅមានការឧបត្ថម្ភកម្រៃពលកម្មដល់មន្ត្រីបច្ចេកទេសរបស់សហព័ន្ធ ពីថ្នាក់ដឹកនាំប្រកួតរហូតដល់ចៅក្រមអាជ្ញាកណ្តាល សរុបជាង ៣០ នាក់ ក្នុង ១ ប្រកួត ប៉ុន្តែការផ្អាកជាបណ្តោះអាសន្ន ដោយគ្មានកាលកំណត់នេះ គឺបានធ្វើឲ្យពួកគាត់បាត់ប្រាក់ចំណូល និងមានជីវភាពកាន់តែលំបាក។
មន្ត្រីខាងអ្នកឧបត្ថម្ភកម្មវិធីប្រកួតប្រដាល់បានប្រាប់ដោយសុំមិនចេញឈ្មោះថា៖ «សង្វៀនអាស៊ីអាគ្នេយ៍ មានប្រិយភាពល្អជាងសង្វៀនមួយចំនួន ប៉ុន្តែមួយរយៈចុងក្រោយខាងខ្ញុំទទួលបានព័ត៌មានពីខេត្ត និងតំបន់មួយចំនួនក្នុងប្រទេសថា ទូរទស្សន៍នេះ មើលមិនឃើញ ហេតុនេះខាងខ្ញុំសម្រេចដកទៅសង្វៀនផ្សេងសិន ហើយបើថ្ងៃក្រោយមានរូបភាពច្បាស់ មើលឃើញឡើងវិញល្អនោះ យើងនឹងចរចាគ្នាឡើងវិញមិនខាន»៕