.jpg)
សង្វៀនប៉ុស្តិ៍លេខ៥ ដែលទើបរចនាថ្មី ត្រៀមបើកឲ្យមានការប្រកួតឡើងវិញ នៅថ្ងៃសៅរ៍នេះ។ សហការី
ភ្នំពេញ៖ ក្រោយពីការផ្អាកសកម្មភាពប្រកួតដោយបញ្ហាជំងឺកូវីដ ១៩ មួយរយៈធំរួចមកសង្វៀនប៉ុស្តិ៍លេខ ៥ នៅថ្ងៃសៅរ៍នេះ នឹងបើកការប្រកួតប្រដាល់ឡើងវិញ ជាមួយនឹងអ្នកឧបត្ថម្ភថ្មី Cellcard ហើយព្រឹត្តិការណ៍ប្រកួតបានប្តូរឈ្មោះមកជាការប្រកួតកំពូលជើងឯក TV5 Boxing Knock Out Serie Cellcard Champion ដែលប្រជុំជើងខ្លាំងក្នុងប្រភេទទម្ងន់ ៥៤ គីឡូក្រាម។
អ្នកប្រដាល់ទាំង ១៦ នាក់ ដែលសម្រេចបញ្ជូនមកប្រកួតប្រជែងក្នុងព្រឹត្តិការណ៍ថ្មីនេះ គឺសុទ្ធតែបានសម្រិតសម្រាំងចេញពីក្លិបចំនួន ១៦ ផ្សេងគ្នា ហើយរូបមន្ត គឺការប្រកួតចាញ់ធ្លាក់ៗ ដោយមាន ៣ ដំណាក់កាលពីវគ្គជម្រុះ ១៦ នាក់ ទៅវគ្គជម្រុះ ៨ នាក់ រួចចូលវគ្គពាក់កណ្តាលផ្តាច់ព្រ័ត្រ និងឈានដល់វគ្គផ្តាច់ព្រ័ត្រតែម្តង។
លោក សេង កដិកា អ្នកគ្រប់គ្រងកម្មវិធីបានប្រាប់ថា ៖«ការប្រកួតនេះ យើងសម្រេចជ្រើសយកប្រភេទទម្ងន់ ៥៤ គីឡូក្រាម ដែលកីឡាករភាគច្រើន វ័យក្មេងមានភាពរហ័សរហួន ព្រោះប្រភេទទម្ងន់នេះ វ៉ៃគ្នាអស់ពីលទ្ធភាព ហើយជាប្រភេទទម្ងន់ ដែលមហាជនចង់ទស្សនាខ្លាំងបំផុត។ ចំណែកពេលវេលាប្រកួត នឹងចាប់ផ្តើមនៅរាល់ថ្ងៃសៅរ៍ ម៉ោង ៦ ល្ងាចតទៅ ពីថ្ងៃ ២៩ ខែសីហា នឹងគ្រោងបញ្ចប់វគ្គផ្តាច់ព្រ័ត្រ នៅថ្ងៃសៅរ៍ទី ១៩ ខែ ធ្នូ ឆ្នាំ ២០២០ ហើយជាមួយនឹងកីឡាករមានសមត្ថភាពនេះ ប៉ុស្តិ៍លេខ ៥ បានរចនាសង្វៀនថ្មី ទំនើបស្តង់ដាអន្តរជាតិ សម្រាប់ការប្រកួតនេះ»។
ចំណែកលោក អូ ឡាឡា អ្នកសម្របសម្រួលកម្មវិធីប្រដាល់សង្វៀនប៉ុស្តិ៍លេខ ៥ បានឲ្យដឹងថា សមាសភាពអ្នកប្រដាល់ដែលត្រៀមរួចរាល់មាន ១៦ នាក់ មកពី ១៦ ក្លិប គឺមានកីឡាករ ធន់ អៀងឡៃ មកពីសមាគមប្រដាល់កងយោធពលខេមរភូមិន្ទ, សេក សារ៉ាន់ ក្លិបអង្គរជ័យសៀមរាប, យិប ឌុក ក្លិបរស្មីភូមិគាប ខេត្តបន្ទាយមានជ័យ, នូវ សុខទី ក្លិបរាជសីហ៍ ខេត្តរតនគីរី, រិន ដាវីដ ក្លិបនាគរាជចតុមុខ, រឿន សុខលី ក្លិបព្រែកឯងកីឡា, ពេជ្រ ប៊ុនសិដ្ឋ ក្លិបចលនាយុវជន ១៥៧, ភួន ឡាំកូស៊ីន ក្លិបសៅយ៉ាន់នាគាបន្ទាយមានជ័យ, ឬទ្ធិ សាស្រ្តាវុធ ក្លិបគុហារព្រហ្មជ័យ ខេត្តសៀមរាប, បាង កានុន ក្លិបអាណាចក្រគុនខ្មែរ, លីន សេងហុង ក្លិបបុរីរាជសីមានរិទ្ធី, ឡុង ខេត្ត ក្លិបខ្លារខិនមានរិទ្ធ, សាន់ សំអូន ក្លិបអរុណរះកីឡា, ផាន ផាន់ណាត់ ក្លិបបញ្ជាការដ្ឋានទ័ពពិសេស, សូដា សុវណ្ណម៉ាយ ក្លិបគោព្រៃ និង រ៉ា រយ៉ា ក្លិបអេភូថងកីឡា។
យោងតាមសមត្ថភាពរបស់កីឡាករទាំង ១៦ រូបនេះ គឺកីឡាករឆ្នើមៗ ដែលកំពុងមានការលេចធ្លោ ដោយប្រកួតមានការទាក់ទាញគួរឲ្យចាប់អារម្មណ៍បំផុតនោះ មានដូចជា ធន់ អៀងឡៃកីឡាករជម្រើសជាតិ យិប ឌុក, ពេជ្រ ប៊ុនសិដ្ឋ, ភួន ឡាំកូស៊ីន និងជម្រើសជាតិ រិន ដេវីដ ដែលគេអាចទស្សន៍ទាយមុនថា អាចឆ្លងផុតវគ្គជម្រុះជុំទី១ បាន។
ដោយឡែកសម្រាប់ការប្រកួតបើកសង្វៀនថ្មី នារសៀលថ្ងៃសៅរ៍នេះ គឺ ធន់ អៀងឡៃ ត្រូវប៉ះ សេក សារ៉ាន់ ហើយ យិប ឌុក ប្រកួតជាមួយ នូវ សុខទី ដើម្បីប្រជែងយក ៣ ពិន្ទុដូចគ្នា។ លោក ធន់ សុភា គ្រូបង្វឹក ធន់ អៀងឡៃ មានទំនុកចិត្តខ្ពស់ថា អៀងឡៃ នឹងឈ្នះ សេក សារ៉ាន់ មិនខាន។ លោកបញ្ជាក់ថា៖ «តាមរយៈហ្វឹកហាត់ និងសមត្ថភាពរបស់ ធន់ អៀងឡៃ ខ្ញុំមិនបារម្ភពីរឿងចាញ់នោះទេ»។
ស្រដៀងគ្នានេះ លោក ហេង ប៊ុនឃីម គ្រូបង្វឹក យិប ឌុក ប្រាប់ថា៖ «ខ្ញុំសង្ឃឹមលើ យិប ឌុក និងឈ្នះ នូវ សុខទី ក្នុងភាគរយខ្ពស់ ព្រោះ យិប ឌុក ជាកីឡាករល្អ ជាប់ជម្រើសជាតិ ២ ឆ្នាំ ហើយឥឡូវកំពុងហាត់នៅភ្នំពេញជាក្រុមជម្រើសជាតិស្រាប់ គឺខ្ញុំមិនបានបង្វឹកផ្ទាល់ដៃទេមួយរយៈនេះ»៕
