.jpg)
សកម្មភាពប្រកួតដណ្តើមពានរដូវកាលចាស់ នៅសង្វៀន TV5។ ពន្លក
ភ្នំពេញ៖ បើនិយាយពីសង្វៀនប្រដាល់គុនខ្មែរ ដែលប្រកួតផ្សាយផ្ទាល់វិញ ទូរទស្សន៍ប៉ុស្តិ៍លេខ ៥ ជាស្ថាបនិកមុនដំបូងដែលមានការប្រកួតផ្សាយផ្ទាល់តាមកញ្ចក់ទូរទស្សន៍មុនគេបង្អស់នៅកម្ពុជា គឺតាំងពីឆ្នាំ ១៩៩៦ ប៉ុន្តែមកដល់បច្ចុប្បន្នមានទូរទស្សន៍ជាច្រើនយកកម្មវិធីប្រកួតនេះ ដើម្បីជាការផ្សព្វផ្សាយពាណិជ្ជកម្ម ហើយយ៉ាងហោចមានប្រកួតជាអចិន្រៃ្តយ៍ និងទៀងទាត់ចំនួន ៦ ស្ថានីយដែរ ដោយស្រូបទាញអ្នកប្រដាល់ក្នុងស្រុកមកប្រកួតបានប្រហែល ១៥០ នាក់ ក្នុង ១ សប្តាហ៍ៗ។
សង្វៀនប្រដាល់ប៉ុស្តិ៍លេខ ៥ ទោះបីមានកម្មវិធីប្រកួតតែ ១ ពេល ក្នុង ១ សប្តាហ៍ ប៉ុន្តែប្រជាប្រិយភាព និងកេរ្តិ៍ឈ្មោះនៅតែរក្សាបានលំនឹងល្អ ដោយមិនទាន់បិទទាំងស្រុងដូចសង្វៀនប៉ុស្តិ៍លេខ ៣ និងប៉ុស្តិ៍អប្សរា និងសង្វៀនអាស៊ីអាគ្នេយ៍នោះឡើយ។ កាលពីសប្តាហ៍មុន និងសប្តាហ៍នេះ សង្វៀនប៉ុស្តិ៍លេខ ៥ បានសម្រាក ដោយគ្មានការប្រកួតដែលធ្វើឲ្យអ្នកចាំទស្សនាឆ្ងល់ថា តើសង្វៀននេះ បិទលែងបន្តការប្រកួតទៀត ឬយ៉ាងណា?
លោក អ៊ូ ឡាឡា អ្នកសម្របសម្រួល និងជាអ្នកអត្ថាធិប្បាយប្រដាល់បានប្រាប់ថា សង្វៀនប៉ុស្តិ៍លេខ ៥ ពិតជាបានសម្រាកជាបណ្តោះអាសន្នក្នុងរយៈពេលខ្លី ដើម្បីរៀបចំទីតាំងបរិវេណសង្វៀនប្រកួតឲ្យបានល្អ ព្រោះយើងបានចប់រដូវកាលចាស់នឹងចូលដល់រដូវកាលមួយទៀត មានការផ្លាស់ប្តូរពាណិជ្ជកម្ម និងទុកពេលរៀបចំសមាសភាពកីឡាករ រដូវកាលថ្មី មិនទាន់បានគ្រប់ចំនួន អ៊ីចឹងសម្រាកក្នុងប្រហែល ២ ឬ ៣ សប្តាហ៍ប៉ុណ្ណោះ។
លោក ឡាឡា បានបន្តថា៖ «ការវិលមកប្រកួតឡើងវិញ យើងនឹងរៀបចំការប្រកួតក្នុងលក្ខណៈថ្មីរូបមន្តប្រកួតថ្មីក្នុងព្រឹត្តិការណ៍ដណ្តើមពាន ដោយក្នុង ១ សប្តាហ៍ យើងអាចប្រកួតជម្រុះត្រឹម ១ គូ ហើយក្រៅពីនេះ យើងដាក់គូប្រកួតដែលខ្លាំង ល្អ ល្បី និង ជក់ចិត្ត»។
ចំណែកលោក សេង កដិកា អ្នកគ្រប់គ្រងបច្ចេកទេសប្រដាល់ប្រចាំសង្វៀនប៉ុស្តិ៍លេខ ៥ បានប្រាប់ថា៖ «សង្វៀនយើងមិនបិទការប្រកួតប្រដាល់ទេ គឺសម្រាកមួយរយៈខ្លី ដើម្បីជួសជុលទីលានសង្វៀនប្រកួតឲ្យមានលក្ខណៈទំនើប តាមការចង់បានរបស់ភាគីស្ពនស័រ និងកំពុងរៀបចំផ្គូផ្គងកីឡាករ ដែលល្អៗ ខ្លាំង ដើម្បីរៀបឲ្យមានភាពទាក់ទាញក្នុងរដូវកាលថ្មីនេះ»។
លោកបានបញ្ជាក់ថា៖ «យើងបានត្រៀមការប្រកួតរដូវកាលថ្មី តាមរូបមន្តប្រកួត knockout ដូចមុន ប៉ុន្តែយើងមានការផ្លាស់ប្តូរបច្ចេកទេសនៃការប្រកួត ដោយជ្រើសរើសយកសុទ្ធតែអ្នកខ្លាំងៗ ឬជាជើងឯកកន្លងមក ចំនួនតែ ១៦ នាក់ទេ ក្នុងប្រភេទទម្ងន់ ៥៤ ឬ ៥៧ គ.ក្រ ឲ្យប្រកួតយកពានជើងឯក។ ចំណែកពេលវេលានែការចាប់ផ្តើម គឺរង់ចាំការរៀបចំស្ទូឌីយោភ្លើងរេញប្រដាល់ តាមតម្រូវការឡើងវិញ និងតាមស្ពនស័រផងដែរ ហើយរួចរាល់ពេលណា ខ្ញុំនឹងជម្រាបជូន»។
ទោះជាយ៉ាងណា លោក សេង កដិកា មិនបានបញ្ជាក់ថា នឹងសម្រាកការប្រកួតប៉ុន្មានសប្តាហ៍នោះទេ។ ប៉ុន្តែប្រភពពីមន្ត្រីសហព័ន្ធបានប្រាប់ដោយសុំមិនបញ្ចេញឈ្មោះថា៖ «សង្វៀនប៉ុស្តិ៍លេខ ៥ អាចនឹងសម្រាកយូរគួរសម ព្រោះសមាសភាពអ្នកប្រដាល់នៅមិនទាន់រៀបរយ ត្រៀមបានរួចនៅឡើយ ហេតុនេះមិនអាចលឿនពេកទេ គឺយូរជាងអ្វីដែលគាត់បានប្រាប់»៕
