.jpg)
សកម្មភាពប្រកួតរបស់ក្រុមវ័យចាស់ (ស) នៃសមាគមរាជសីហ៍។ សហការី
ភ្នំពេញ៖ សមាគមរាជសីហ៍ដែលបានបង្កើតឡើងតាំងឆ្នាំ ២០១៨ ហើយប្រមូលផ្តុំដោយយុវជន សម្រាប់ហ្វឹកហាត់ និងលេងកីឡា ព្រមទាំងជួយបញ្ហាសង្គមផងនោះ បានធ្វើពិធីជួបជុំគ្នាជាថ្មីឡើងវិញ នៅទីស្នាក់ការថ្មីផ្លូវលេខ ២ ខណ្ឌដង្កោ រាជធានីភ្នំពេញ កាលពីថ្ងៃសុក្រ ដើម្បីត្រៀមការហ្វឹកហាត់ និងការប្រកួតក្នុងករណីក្រសួងសុខភិបាល និងក្រសួងអប់រំ យុវជន និងកីឡា អនុញ្ញាត។
ជាមួយនឹងការជួបជុំសំណេះសំណាលសួរសុខទុក្ខ និងអាហារសាមគ្គីក្នុងពិធីបើកស្នាក់ការថ្មីនោះ សមាគមរាជសីហ៍ ដែលមានក្រុមកីឡាបាល់ទាត់ អាយុក្រោម ១៤ ឆ្នាំ (U14) ក្រោម ១៨ ឆ្នាំ និងក្រុមវ័យចាស់ ព្រមទាំងមានប្រភេទកីឡាវ៉ូវីណាមផងនោះ បានត្រៀមផែនការជាបណ្តើរៗ ក្រោយខកខានជួបគ្នាច្រើនខែ ដោយសារកូវីដ ១៩ ។
លោក ស៊ូម សារឿន ប្រធានសមាគមរាជសីហ៍ និងជាប្រធានសហព័ន្ធកីឡាវ៉ូវីណាមកម្ពុជា បានផ្តល់សម្ភាសថា៖ «សមាគមរាជសីហ៍របស់យើង បានបង្កើតតាំងពីថ្ងៃទី ៩ ខែ កញ្ញា ឆ្នាំ ២០១៨ ហើយក្រៅពីមានក្រុមបាល់ទាត់ គឺខ្ញុំបានដាក់បញ្ចូលកីឡាវ៉ូវីណាម ១ ទៀត ហើយពេលវេលាទៅមុខ បើសិនមានប្រភេទកីឡាណា ដែលមានសក្តានុពល ឬសកម្មភាពល្អ យើងនឹងដាក់ចូលក្នុងសមាគម គឺយើងបន្តការគាំទ្រ ដើម្បីរួមចំណែកអភិវឌ្ឍវិស័យកីឡា និងយុវជន»។
លោកបានបន្តថា៖ «ថ្ងៃនេះ បើនិយាយពីគោលបំណង នៃសមាគមរាជសីហ៍នេះ គឺផ្តោតទៅលើសកម្មភាពជួយផ្នែកកីឡា និងការជួយសង្គមតាមរយៈលើកទឹកចិត្តយុវជនឲ្យស្រឡាញ់សុខភាព និងកីឡា ពីការហ្វឹកហាត់ លេងធម្មតា រហូតដល់កម្រិតបច្ចេកទេសខ្ពស់ផងដែរ។ បន្ថែមលើសពីនេះ សមាគមជួយយុវជនដែលមានជីវភាពលំបាកក្រីក្រ ដោយផ្តល់ឱកាសឲ្យបានលេងកីឡា និងជំរុញសកម្មភាពជាមនុស្សធម៌ ដែលយើងស្វែងរកថវិកាទ្រទ្រង់តាមរយៈវិស័យឯកជនពីសប្បុរសជន ឬមិត្តភក្តិ ដែលស្រឡាញ់រាប់អាន»។
លោកបានរៀបរាប់ទៀតថា គិតក្នុងរយៈពេល ២ ឆ្នាំរបស់សមាគម យើងបង្កើតបានសាខានៅខេត្តចំនួន ៤ ទៀត គឺខេត្តកែប សៀមរាប រតនគិរី និងខេត្តព្រះសីហនុ ហើយការប្រកួត និងធ្វើសកម្មភាពកន្លងមក យើងមានទំនាក់ទំនងជាមួយសាខាតាមខេត្ត តំណាងយុវជនរបស់ខេត្តហើយយើងជួយគ្នាបានល្អ គឺលើកលែងតែអំឡុងពេលជំងឺកូវីដ ១៩ ប៉ុណ្ណោះ ដែលយើងបានផ្អាកសកម្មភាព។
ទោះយ៉ាងណា លោកថា៖ «នៅថ្ងៃនេះ ខ្ញុំជម្រាបជូនថា យើងនឹងត្រៀមខ្លួនធ្វើសកម្មភាព នៅពេលទទួលបានការអនុញ្ញាតពីក្រសួងអប់រំ យុវជន និងកីឡា ឬក្រសួងសុខាភិបាល ហើយក្រៅពីសកម្មភាពកីឡា យើងមានកម្មវិធីមនុស្សធម៌មួយចំនួនដែរ សម្រាប់ជនក្រីក្រ ដើម្បីឲ្យយុវជនទទួលបានភាពប្រសើរជាងមុន»។
នៅពេលសួរថា តើការធ្វើសកម្មភាពរបស់សមាគមរាជសីហ៍ ទទួលបានមូលនិធិពីណាខ្លះ? លោក ស៊ូម សារឿន បញ្ជាក់ថា ផ្នែកសកម្មភាពបាល់ទាត់ គឺជាថវិកាបានមកពីសប្បុរសជន មិត្តភក្តិ ជាវិស័យឯកជន ប៉ុន្តែសម្រាប់កីឡាវ៉ូវីណាមវិញ គឺគាំទ្រពីក្រសួងអប់រំ យុវជន និងកីឡា ទៅតាមគោលការណ៍ ប៉ុន្តែយើងស្វែងរកជួយបន្ថែមបានមួយចំនួន ដើម្បីលើកទឹកចិត្តអត្តពលិក និងមន្ត្រីរបស់សហព័ន្ធយើងផងដែរ។
តាមទស្សនៈ និងផែនការយុទ្ធសាស្ត្ររបស់កីឡាវ៉ូវីណាម លោក ស៊ូម សារឿន បញ្ជាក់ថា៖ «ចំពោះកីឡាវ៉ូវីណាម គឺការប្រកួតស៊ីហ្គេម នៅវៀតណាម ឆ្នាំ ២០២១ ខាងមុខ យើងកំពុងប្រឹងដណ្តើមយកមេដាយមាសយ៉ាងហោចណាស់ក៏បានត្រឹម ៩ ឬប្រហាក់ប្រហែល ទើបយើងអាចឈរក្នុងលំដាប់លេខ ២ ឬលេខ ៣ បាន ព្រោះវៀតណាមដែលជាម្ចាស់ដើមនៃក្បាច់គុន គឺយើងទទួលស្គាល់ថា ល្អជាងយើង ហើយមីយ៉ាន់ម៉ាអាចនឹងប្រទាញប្រទង់ជាមួយយើង»៕
