.jpg)
Kroos (ស្ដាំ) របស់អាល្លឺម៉ង់ កំពុងប្រជែងជាមួយ Widmer របស់ស្វ៊ីស អំឡុងការប្រកួត កាលពីថ្ងៃអង្គារ។ AFP
ក្រុង Cologne៖ ការកាន់តំណែងរយៈពេល ១៤ ឆ្នាំ របស់លោក Joachim Loew ក្នុងឋានៈជាគ្រូបង្វឹកនៃក្រុមជម្រើសជាតិអាល្លឺម៉ង់ កំពុងតែមានសម្ពាធហើយ ក្រោយក្រុមនៅតែបន្តបាននូវលទ្ធផលមិនល្អទៀត ដោយត្រូវតាមការនាំមុខ ២-០ រហូតបានស្មើ ៣-៣ អំឡុងការប្រកួតក្នុងកម្មវិធី Nations League ជាមួយស្វ៊ីស កាលពីថ្ងៃអង្គារ។
ក្រុមអាល្លឺម៉ង់ លេងមិនឈ្នះដល់ទៅ ៤ ដង ក្នុង ៥ ប្រកួតចុងក្រោយ ដោយក្នុងនោះ ស្មើ ៣ ប្រកួត ទាំងដែលខ្លួនធ្វើការនាំមុខរហូត ហើយលទ្ធផលនេះ ធ្វើឱ្យក្រុមកំពូលនៅអឺរ៉ុប ១ នេះ ឈរនៅលេខ ២ ក្នុងពូល ពីក្រោមក្រុមអេស្ប៉ាញ។
ការឈ្នះក្រុមអ៊ុយក្រែនយ៉ាងលំបាក ២-១ កាលពីថ្ងៃសៅរ៍ នាក្រុងកៀវ ទាំងក្រុមខ្លួនមានកម្លាំងពេញ ហើយក្រោយមកស្មើជាមួយតួកគី ៣-៣ ក្នុងប្រកួតមិត្តភាព នៅផ្ទះខ្លួនឯងនាថ្ងៃពុធសប្ដាហ៍មុន ជាថ្មីម្ដងទៀត ក្រុមរបស់លោក Loew បានបង្ហាញឱ្យឃើញពីភាពកម្សោយរបស់តំបន់ការពារ។
«ប្រាកដណាស់ ពេលរបូតដល់ទៅ ៣ គ្រាប់ បានន័យថា ការការពារ គឺខ្សោយ»។ នេះជាសម្ដីរបស់ខ្សែបម្រើ Toni Kroos ដែលមានកំហុស នាំឱ្យស្វ៊ីសស៊ុតគ្រាប់ទី២ បានសម្រេច ក្រោយមានឱកាសចូលលេងលើកទី ១០០ ឱ្យក្រុមអាល្លឺម៉ង់។
បុរសវ័យ ៦០ ឆ្នាំ Loew មានកុងត្រាជាមួយសហព័ន្ធបាល់ទាត់អាល្លឺម៉ង់រហូតដល់ព្រឹត្តិការណ៍ World Cup 2022 តែពេលនេះ ប្រជាប្រិយភាពរបស់គាត់ក្នុងដួងចិត្តរបស់អ្នកគាំទ្រ ធ្លាក់ចុះយ៉ាងខ្លាំង ពោលគឺពីកម្រិតខ្ពស់ពេលឈ្នះ World Cup 2014 ខណៈការធ្លាក់នេះ ចាប់ផ្ដើមមានបណ្ដើរៗ ចាប់តាំងពីក្រុមអាល្លឺម៉ង់ទទួលបានលទ្ធផលយ៉ាងអាក្រក់ នៅឯ World Cup 2018 នាប្រទេសរុស្ស៊ី ដោយពួកគេមិនអាចសូម្បីឆ្លងផុតពីវគ្គចែកពូល។
លទ្ធផលស្មើជាមួយស្វ៊ីសនេះ នឹងនាំឱ្យមានការរិះគន់កាន់តែខ្លាំងឡើងៗចំពោះលោក Loew ពីបណ្ដាបុគ្គលល្បីៗមួយចំនួន ក្នុងរង្វង់វិស័យបាល់ទាត់អាល្លឺម៉ង់ មានដូចជាលោក Lothar Matthaeus និង Bastian Schweinsteiger ជាដើម។
តែយ៉ាងណា ខ្សែបម្រើ Kai Havertz ដែលស៊ុតបាន ១ គ្រាប់ដែរ បាននិយាយបែបវិជ្ជមានថា៖ «យើងតែងតែវាយបកបានជានិច្ច បើទោះជាត្រូវនាំមុខជាច្រើនដង ដូច្នេះ យើងបានបង្ហាញពីការមានទំនុកចិត្តខ្ពស់របស់ពួកយើង»។
ក្រោយបញ្ចប់ការប្រកួតទី ៤ នេះ ក្រុមអាល្លឺម៉ង់នៅលេខ ២ ក្នុងគ្រុបទី ៤ នៅ League A ដោយមាន ៦ ពិន្ទុ ស្មើក្រុមលេខ ៣ អ៊ុយក្រែន ខណៈក្រុមលេខ ១ អេស្ប៉ាញ មាន ៧ ពិន្ទុ រីឯក្រុមស្វ៊ីស មាន ២ ពិន្ទុ នៅបាតតារាង៕ AFP/VN
