.jpg)
កីឡាករសរ រាជសីហ៍ (ស្តាំ) ក្នុងពេលប្រកួតជាមួយនឹងកីឡាករអ៊ីរ៉ង់ Akbri Keraimant កាលពីថ្ងៃអាទិត្យ។ រូបថត យឺន ពន្លក
ភ្នំពេញ: អ្នកលេងកណ្តាប់ដៃ និងក្បាច់ជង្គង់ឆ្លងមកពីខេត្តបាត់ដំបងកីឡាករសរ រាជសីហ៍ បានប្រកួតស្មើជាមួយកីឡាករមកពីប្រទេសអ៊ីរ៉ង់ Akbri Keraimant ក្នុងទម្ងន់ធ្ងន់កាលពីព្រឹកថ្ងៃអាទិត្យ ទី១១ ខែវិច្ឆិកា ឆ្នាំ២០១៨ នៅសង្វៀនអាស៊ីអាគ្នេយ៍ ប៉ុន្តែសម្រាប់គូអន្តរជាតិទាំងមិត្តភាពក្នុងវគ្គជម្រុះដណ្តើមខ្សែក្រវាត់នោះ កីឡាករកម្ពុជាចំនួន៤នាក់ ឈ្នះថៃទាំង៤គូ។
ជាមួយគ្នានេះដែរ ការប្រកួតគូពិសេសទី៣រវាងថន ភឿត និងហេង វាសនា ត្រូវបានគណៈកម្មការប្រកួតបណ្តេញចុះដោយអះអាងថា ប្រកួតមិនប្រក្រតី ប៉ុន្តែអ្វីដែលភ្នំពេញ ប៉ុស្តិ៍ ទទួលព័ត៌មានបាននោះគឺថា កីឡាករថន ភឿត ដែលសន្លប់នោះ ឡើងប្រកួតជំនួសគេ ខណៈដែលប្រពន្ធឆ្លងទន្លេអត់ងង៉ុយចំនួន៤ថ្ងៃហើយ។
សរ រាជសីហ៍ ឡើងទម្ងន់ដល់៧៥គីឡូក្រាម ប៉ុន្តែ នៅតែមានការប្រកួតទាក់ទាញបំផុត និងមានភាពរហ័សរហួន។ ក្នុងការប្រកួតចំនួន៥ទឹកពេញ សរ រាជសីហ៍ មានប្រៀបផ្នែកជង្គង់ ចំណែកកីឡាករ Akbri Keraimant មកពីអ៊ីរ៉ង់ មានប្រៀបផ្នែកកណ្តាប់ដៃ។
ក្នុង២ទឹកដំបូង ការប្រកួតហាក់ដូចជាលំបាកដាក់ពិន្ទុបំផុត ពីព្រោះមានការវ៉ៃសងគ្នាទៅវិញទៅមកបានល្អដូចគ្នា និងប្រហាក់ប្រហែលគ្នា ហើយនៅពេលចូលដល់ទឹកទី៣ និងទី៤ សរ រាជសីហ៍ មានប្រៀបជាងដោយក្បាច់ជង្គង់។ ទោះជាយ៉ាងណា នៅពេលចូលដល់ទឹកទី៥ កីឡាករ Akbri Keraimant មកពីអ៊ីរ៉ង់ ចេញកណ្តាប់ដៃបានច្រើនមានប្រៀបនៅចុងទឹកទី៥ ដែលនាំឲ្យមានការគាំទ្រខ្លាំងពីអ្នកទស្សនា។
ការប្រកួតគូនេះ ត្រូវបានគេចាត់ទុកថា ជាគូជក់ចិត្តខ្លាំងជាងគេ ហើយគណៈកម្មការប្រកួតបានសម្រេចឲ្យស្មើ។ គូចាប់អារម្មណ៍មួយទៀតដែលត្រូវបណ្តេញចុះនោះគឺកីឡាករថន ភឿត មកពីក្លិបឃ្លាំងមឿង ជាមួយកីឡាករហេង វាសនា មកពីព្រៃទទឹងខេត្តបាត់ដំបង ខណៈដែលនៅទឹកទី៣ ថន ភឿត ទទួលរងសន្លប់ ហើយគណៈកម្មការលោករាជ សុផែន ស្នងការប្រកួត បានបញ្ជាឲ្យបណ្តេញចុះមិនប្រកាសលទ្ធផលឡើយ។
ជុំវិញបញ្ហានេះភ្នំពេញ ប៉ុស្តិ៍ បានស្វែងរកការពិតដោយបានសម្ភាសផ្ទាល់ជាមួយគ្រូបង្វឹក និងកីឡាករទើបទទួលបានលទ្ធផលច្បាស់ថា ជារឿងគួរឲ្យសង្វេគ និងខ្លោចចិត្តទៅវិញ។
កីឡាករសរ រាជសីហ៍ (ឆ្វេង) និងកីឡាករអ៊ីរ៉ង់ Akbri Keraimant ត្រូវបានប្រកាសឲ្យទទួលបានលទ្ធផលស្មើកាលពីថ្ងៃអាទិត្យ។ រូបថត យឺន ពន្លក
អ្នកស្រីមែន សុខា អ្នកគ្រប់គ្រងកីឡាករថន ភឿត បាននិយាយថា៖ «ថន ភឿត បានឡើងប្រកួតជំនួសគេ មិនបានហ្វឹកហាត់ទេ ហើយប៉ុន្មានថ្ងៃនេះ រូបគេមានធុរៈដោយប្រពន្ធឈឺព្រោះទំរាំកើតគឺ៤ ទៅ៥ថ្ងៃ និងមិនបានសម្រាកដោយកូនតូច ហេតុនេះការប្រកួតគឺវាយអស់ពីសមត្ថភាពហើយ ប៉ុន្តែការសន្លប់នោះគឺកម្លាំងមិនគ្រប់គ្រាន់ ចូលជង្គង់របស់គេ»។
អ្នកស្រីមែន សុខា បានបន្តថា៖ «កីឡាករនេះមានចរឹកល្អ ស្មោះត្រង់ គ្មានគំនិតអាក្រក់ប្រកួតធ្វើពុតនោះឡើយ ប៉ុន្តែបើប្រៀបធៀបការប្រកួតមុនៗ រូបគេមិនល្អដូចមុនទេ ដោយគ្នាអត់ងងុយកូនខ្ចី»។ ថន ភឿត បាននិយាយថា៖ «ខ្ញុំស្បថគឺគ្មានពាក់ព័ន្ធភាពមិនប្រក្រតីណាមួយ ឬខ្ញុំធ្វើពុតនោះទេ ប៉ុន្តែ ពិតជាសន្លប់មែន»។
លោកស៊ឹម ហេង គ្រូបង្វឹកកីឡាករហេង វាសនា ដែលជាដៃគូប្រកួត បាននិយាយថា៖ «ពួកគេប្រកួតបែបនោះ ដោយគ្មានភាគីមួយណាធ្វើពុតទេ ពីព្រោះការវ៉ៃគ្នាមិនអាចកំណត់បានឡើយ ជួនការសន្លប់ឈឹង មិនដឹងខ្លួនគឺនិយាយទៅគណៈកម្មការណាមិនធ្លាប់ដាល់ មិនដឹងពីការសន្លប់នោះដូចម្តេចនោះទេ»។
ទោះជាយ៉ាងណា ក្រោយពេលប្រកួតភ្លាមៗអ្នកប្រដាល់ទាំង២នេះមិនទាន់បានបើកប្រាក់តម្លៃខ្លួននោះទេ ហើយប្រធានវិនិច្ឆ័យបានប្រាប់ក្រុមការងារធ្វើកំណត់ហេតុគូនេះទៅសហព័ន្ធ ប៉ុន្តែ មិនដឹងថា ពិន័យឬយ៉ាងណានោះឡើយ។
អ្នកគាំទ្រមួយចំនួនមានការខ្លោចចិត្តនៅពេលដឹងថា កីឡាករថន ភៀត មានបញ្ហាអត់ងងុយមិនបានហ្វឹកហាត់ ហើយការឡើងប្រកួតជំនួសគេដើម្បីប្រាក់ជួយប្រពន្ធកូនខ្ចី និងត្រូវបានគេពិន័យនោះ មិនដឹងថា លំបាកយ៉ាងដូចម្តេចទៅ៕
