ភ្នំពេញ: សហព័ន្ធខ្មែរកីឡាទោចក្រយានបាននិងកំពុងបើកវគ្គបណ្តុះបណ្តាលគ្រូបង្វឹកថ្នាល និងអត្តពលិកវ័យក្មេង កីឡាទោចក្រយានហើយបានចាត់ទុកវគ្គនេះជាមូលដ្ឋានគ្រឹះយ៉ាងសំខាន់ក្នុងការជំរុញឲ្យអត្តពលិកវ័យក្មេងអាចវិវឌ្ឍខ្លួនទៅជាអ្នកអាជីព ដែលអាចចូលរួមប្រជែងរកមេដាយឲ្យកម្ពុជានៅលើឆាកអន្តរជាតិ។
លោក ឧកញ៉ា វង្ស ខាន់ពៅ អគ្គលេខាធិការសហព័ន្ធខ្មែរកីឡាទោចក្រយាន បានប្រាប់ភ្នំពេញប៉ុស្តិ៍ថា វគ្គនេះយើងតែងតែធ្វើជារៀងរាល់ឆ្នាំក្រោមកញ្ចប់ថវិកាចំណាយប្រចាំឆ្នាំរបស់ក្រសួងអប់រំ ហើយវគ្គនេះមានសិក្ខាកាមចូលរួមចំនួន ៣៨ នាក់ (ស្រី ៣ នាក់) ហើយពួកគេត្រូវបណ្តុះបណ្តាលទាំងលើទ្រឹស្តី និងការអនុវត្តជាក់ស្តែងនៅលើទីលានគឺកង់គួកត្រូវធ្វើតេស្តលើកង់ប្រើម៉ាស៊ីននៅ NOCC ហើយក្រុមកង់ភ្នំធ្វើនៅទីលានព្រែកលៀប។
លោកបានបន្ថែមថា៖ «វគ្គនេះមានសារៈប្រយោជន៍ណាស់ក្នុងការបង្ហាត់បង្ហាញឲ្យអត្តពលិកវ័យក្មេងរបស់យើងបានដឹងពីបច្ចេកទេសក៏ដូចជាតាក់ទិកក្នុងការអភិវឌ្ឍខ្លួនឲ្យក្លាយទៅជាកីឡាករអាជីពដែលមានសមត្ថភាពល្អសម្រាប់ត្រៀមឆ្ពោះទៅកាន់ការប្រកួតស៊ីហ្គេមឆ្នាំ ២០២៣»។
គួររំឭកថាវគ្គបណ្តុះបណ្តាលនេះត្រូវបានបើកនៅទីស្នាក់ការ NOCC កាលពីព្រឹកថ្ងៃសៅរ៍នឹងត្រូវបញ្ចប់នៅថ្ងៃចន្ទនេះ ហើយនៅក្នុងពិធីបើកវគ្គកាលពីថ្ងៃអាទិត្យនោះលោក ហ៊ុន សាមុត ប្រធាននាយកដ្ឋានអប់រំកាយ និងកីឡាបានប្រាប់ឲ្យសិក្ខាកាមទាំងអស់យកចិត្តទុកដាក់ក្នុងការក្រេបជញ្ជក់យកចំណេះដឹងពីគ្រូឧទ្ទេស ពិសេសត្រូវគោរពវិន័យឲ្យបានល្អដើម្បីក្លាយជាអត្តពលិកមានទាំងសមត្ថភាព និងវិន័យ ក្រមសីលធម៌ អាចចូលរួមប្រកួតស៊ីហ្គេម ឆ្នាំ ២០២៣ តំណាងឲ្យជាតិពេលកម្ពុជាធ្វើជាម្ចាស់ផ្ទះ។
យ៉ាងណាក៏ដោយអតីតកីឡាករអាជីពរបស់អូស្ត្រាលីលោក Frank Zgoznik ដែលជាគ្រូឧទ្ទេសដ៏សំខាន់នៅក្នុងវគ្គបណ្តុះបណ្តាលនេះបានប្រាប់ថា ការហ្វឹកហាត់តែទៅលើការប្រណាំងកង់មួយមុខមិនអាចក្លាយជាអត្តពលិក មានសមត្ថភាពខ្លាំងអាចឆ្ពោះទៅដណ្តើមបានមេដាយនៅលើឆាកអន្តរជាតិបាននោះទេ។
លោក Frank បានប្រាប់ភ្នំពេញ ប៉ុស្តិ៍ ក្នុងម៉ោងសម្រាកកាលពីថ្ងៃសៅរ៍នោះថា៖ «នៅក្នុងវគ្គបណ្តុះបណ្តាលនេះខ្ញុំនឹងបង្ហាត់បង្រៀនពួកគាត់ឲ្យមានការយល់ដឹងបន្ថែមដោយមិនមែនផ្តោតតែទៅលើការជិះកង់មួយមុខនោះទេ គឺយើងត្រូវផ្តោតទៅលើកត្តាផ្សេងៗទៀត ពិសេសការពង្រឹងកាយសម្បទាបន្ថែមដូចជាការហាត់នៅគ្រឹះស្ថានហាត់ប្រាណ ការរត់ប្រណាំង លេងបាល់ទះ និង ការលេងបាល់ទាត់ជាដើម»។
គ្រូបង្វឹកស្ម័គ្រចិត្តរបស់សហព័ន្ធខ្មែរកីឡាទោចក្រយានលោក Frank បានបន្ថែមថា៖ «ជាមួយគ្នានេះយើងក៏ត្រូវប្រាប់ពួកគាត់ពីរបៀបរបបនៃការហូបចុកទាំងមុនការជិះកង់ ពេលជិះកង់ និងក្រោយការជិះកង់ ដើម្បីធ្វើឲ្យរាងកាយរបស់គាត់មានកម្លាំងវិលមករកភាពដើមវិញ នៅពេលដែលយើងប្រើវាអស់ហើយយើងក៏ប្រាប់ពួកគាត់ពីក្បួនហាត់ ក្បួនប្រណាំង ព្រមទាំងបច្ចេកទេសជាច្រើនទៀតដើម្បីជួយឲ្យពួកគាត់អាចអភិវឌ្ឍខ្លួនឲ្យក្លាយទៅជាអត្តពលិកដែលមានសមត្ថភាពល្អ និងជាអ្នកបណ្តុះបណ្តាលម្នាក់ដែលមានសមត្ថភាពគ្រប់គ្រាន់ក្នុងការបង្ហាត់ដល់គេ»៕