ភ្នំពេញៈ ភាពចម្រូងចម្រាសលើករណីកាត់សេចក្តីមិនយុត្តិធម៌ លើប្រភេទកីឡាប្រដាល់គុនខ្មែរ ក្នុងព្រឹត្តិការណ៍កីឡាជាតិ លើកទី ២ ឆ្នាំ ២០១៨ កន្លងមកនេះ បានធ្វើឲ្យសហព័ន្ធកីឡាប្រដាល់គុនខ្មែរ ឈានដល់ដាក់ពិន័យទៅលើចៅក្រម ៣ នាក់ ដែលជាអ្នកផ្តល់ពិន្ទុឲ្យ ហ៊ឹម សេរី ឈ្នះ សុខ រិទ្ធ នាពេលនោះ។
ប៉ុន្តែលោក មាស សុខគ្រី ជាគ្រូបង្វឹករបស់ ហ៊ឹម សេរី ដែលឡើងទៅធ្វើជាប្រធានវិនិច្ឆ័យ ទាំងល្មើសច្បាប់ប្រកួត នាពេលនោះ ដោយអាចនិយាយថា ជាមេខ្លោងនោះ បែរជារួចខ្លួន ដោយគ្រាន់តែត្រូវស្តីបន្ទោសផ្ទាល់មាត់ ក្នុងអង្គប្រជុំបិទទ្វារមួយ ដែលសហព័ន្ធកីឡាប្រដាល់គុនខ្មែរ បានធ្វើឡើងកាលពីសប្តាហ៍មុន ដើម្បីពិនិត្យវាយតម្លៃ និងសកម្មភាពតាមរយៈការចាក់វីដេអូការប្រកួតរបស់ ហ៊ឹម សេរី និង សុខ រិទ្ធ ឡើងវិញ។
ប្រភពច្បាស់ការចេញពីសហព័ន្ធកីឡាប្រដាល់គុនខ្មែរ បានប្រាប់ភ្នំពេញប៉ុស្តិ៍ ដោយសុំមិនឲ្យបញ្ចេញឈ្មោះថា៖ «ចៅក្រមទាំង ៣ នាក់ ដែលជាប់ពិន័យ ដោយបានផ្តល់ពិន្ទុឲ្យ ហ៊ឹម សេរី ឈ្នះនោះ មានចៅក្រម នួន បូរ៉ា,សួន ប៊ុនសូត្រ និង ឡឹក ចំណាប់ ចំណែក លោក មាស សុខគ្រី ដែលជាប្រធានវិនិច្ឆ័យ និងជាមេខ្លោង ក្នុងការធ្វើឲ្យមានកំហុសនេះត្រូវបានរួចខ្លួនទៅវិញ»។
បន្ថែមពីលើរឿងអាស្រូវនេះ តាមការស៊ើបអង្កេតស្រាវជ្រាវ គឺមានកីឡាករខ្លះ អវត្តមានតែត្រូវបានគេបិទបាំង ហើយមានមន្ត្រីជាគណៈកម្មការខ្លះ មានឈ្មោះ តែមិនមកធ្វើការទេ ដែលគេហៅថា «មន្ត្រីខ្មោច» ប៉ុន្តែនៅតែមកបើកលុយថវិកាពីក្រសួងអប់រំ យុវជន និងកីឡា បានសម្រេច តាមរយៈអ្នកតំណាងរបស់ខ្លួន។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានផ្តល់សម្ភាសឲ្យភ្នំពេញប៉ុស្តិ៍ កាលពីម្សិលមិញថា៖ «វាពិតជាមានភាពមិនប្រក្រតីខ្លះកើតឡើង ក្នុងកីឡាជាតិ លើកទី ២ នេះមែន ប៉ុន្តែសហព័ន្ធ បានដោះស្រាយហើយ មិនមែនព្រងើយកន្តើយទេ គឺដោះស្រាយយ៉ាងយកចិត្តទុកដាក់ ដោយអនុវត្តតាមច្បាប់ ដែលបានចែង មិនមែនដោះស្រាយតាមបណ្តាញហ្វេសប៊ុក តាមការចង់បានរបស់បុគ្គលមួយចំនួននោះឡើយ។
លោកបានបន្តថា៖ «យើងខិតខំបំពេញការងារបានល្អ ប៉ុន្តែមានករណីខ្លះខុសតិចតួចត្រូវកែលម្អ ហើយវាជារឿងបុគ្គល ដែលទទួលខុសត្រូវ។ ចំណែកករណីលោក មាស សុខគ្រី មានកំហុស ជារឿងបុគ្គលរបស់គាត់ ប៉ុន្តែគាត់ទៅធ្វើជាប្រធានវិនិច្ឆ័យពេលនោះ អត់មានច្បាប់ណា ដាក់ពិន័យគាត់បាន ព្រោះគាត់មិនបានកែប្រែលទ្ធផលទេ ដោយសារលទ្ធផលចេញពីចៅក្រមទាំង ៣ នាក់ ដែលឲ្យកីឡាករ ហ៊ឹម សេរី ឈ្នះ អ៊ីចឹង គាត់ត្រូវតែសម្រេចតាមនោះ»។
លោក តែម ម៉ឺន បញ្ជាក់ថា៖ «ប្រធានវិនិច្ឆ័យ ក្នុងការប្រកួតថ្នាក់ជាតិ ឬខ្សែក្រវាត់ ឬវគ្គផ្តាច់ព្រ័ត្រ ណាមួយ ត្រូវសម្រេចតាមចៅក្រម ដែលផ្តល់ពិន្ទុ បញ្ជូនមកតុគណៈកម្មការ ចំណែកឯប្រធានវិនិច្ឆ័យគ្រាន់តែបូកសរុបប្រកាសលទ្ធផលប៉ុណ្ណោះ មិនអាចដាក់ពិន័យបានទេ»។
ប្រភពច្បាស់ការ ដែលភ្នំពេញ ប៉ុស្តិ៍ ទទួលបានមានមន្ត្រីខ្មោច នៅក្នុងមន្ត្រីគណៈកម្មការ ប៉ុន្តែនៅតែមានគេមកបើកលុយតម្លៃពលកម្មជំនួស ដោយក្នុង ១ ថ្ងៃបាន ២០ ដុល្លារ ហើយអ្នកមកបើកជំនួសនោះគឺសៅ ប៊ុននឿន ដែលជាកូនប្រសាររបស់លោក មាស សុខគ្រី។
ចំពោះបញ្ហានេះ លោក តែម ម៉ឺន បានពន្យល់បកស្រាយថា៖ «បុគ្គលទទួលខុសត្រូវខ្លួនឯង។ ទស្សនៈរបស់ខ្ញុំ ជាអ្នកដឹកនាំ គឺមិនឃុបឃឹត ឬគាំទ្រអ្នកធ្វើខុសទេ ប៉ុន្តែការចាត់វិធានការ ត្រូវធ្វើតាមច្បាប់ និងលក្ខខណ្ឌ ដែលបានចែង ហើយបើមានភ័ស្តុតាងច្បាស់លាស់ទៅលើបុគ្គលណា គឺទទួលខុសត្រូវតាមច្បាប់»។
ចំណែកលោក ម៉ិល កាដូ អគ្គនាយករងកីឡា និងជាអគ្គលេខាធិការសហព័ន្ធកីឡាប្រដាល់គុនខ្មែរ ដែលជាមនុស្សសំខាន់ ពិនិត្យផ្ទាល់ក្នុងរឿងនេះ មិនអាចសុំការពន្យល់បានទេ។ ប៉ុន្តែតាំងពីថ្ងៃប្រជុំសប្តាហ៍មុន លោកនៅតែព្យាយាមលាក់បាំងករណីជាច្រើន មិនសហការជាមួយអ្នកព័ត៌មាន ពិសេសការប្រជុំបិទទ្វារនោះ លោក កាដូ បានហាមមន្ត្រី មិនឲ្យឆ្លើយឆ្លងជាមួយអ្នកកាសែតឡើយ។
លោក រាជ សុផែន មន្ត្រីជាន់ខ្ពស់សហព័ន្ធកីឡាប្រដាល់គុនខ្មែរ បាននិយាយថា៖ «អ្វីៗដែលកើតឡើង វាជាសិទ្ធិសម្រេចរបស់សហព័ន្ធ ប៉ុន្តែមានបុគ្គលខ្លះ បានបង្កើតរឿងមិនចេះអស់ មិនចេះហើយ នាំឲ្យលំបាកដល់លោកប្រធាន និងសហការីទាំងអស់ក្នុងសហព័ន្ធឈឺក្បាល។ ហេតុនេះខ្ញុំគាំទ្រចំណាត់ការរបស់សហព័ន្ធ មិនត្រូវយោគយល់បន្តទៀតទេ ព្រោះខូចឈ្មោះដល់គេដែលល្អ»។
គួររំឭកថា ករណីឲ្យ សុខ រិទ្ធ ចាញ់ពិន្ទុ ហ៊ឹម សេរី ក្នុងការប្រកួតផ្តាច់ព្រ័ត្រនោះ គឺផ្អើលពេញហ្វេសប៊ុក ព្រោះក្នុងថ្ងៃទទួលមេដាយនោះ សុខ រិទ្ធ បានបោកកម្រងផ្កា និងមេដាយប្រាក់នៅមុខគណៈអធិបតី ដើម្បីបង្ហាញពីភាពអយុត្តិធម៌ ដែលគេទទួលបាន ហើយ សុខ រិទ្ធ មិនព្រមបើកប្រាក់រង្វាន់មេដាយប្រាក់ចំនួន ៦០ ម៉ឺននោះឡើយ៕