ភ្នំពេញៈ ក្រោយពីបាននាំយកមេដាយមាស ១ ប្រាក់ ១ និងសំរឹទ្ធ ៤ ពីការប្រកួត ADSF Asain Dance Sport Championship និងការប្រកួត ADSF Open Hong Kong 2018 ដែលត្រូវបានធ្វើឡើងក្នុងពេលតែមួយនៅហុងកុងកន្លងមកនេះ សហព័ន្ធកីឡារាំកម្ពុជា កាលពីថ្ងៃអង្គារ បានប្រកាសពីក្តីរំពឹងខ្ពស់ ក្នុងការដណ្តើមយកមេដាយ ក្នុងព្រឹត្តិការណ៍ស៊ីហ្គេម ឆ្នាំ ២០១៩ នៅហ្វីលីពីន។
លោកស្រី ញែម មរកត ប្រធានសហព័ន្ធកីឡារាំកម្ពុជា បានថ្លែងប្រាប់អ្នកសារព័ត៌មានថា៖ «ពេលខ្ញុំទៅទទួលស្វាគមន៍ការមកដល់កម្ពុជា របស់ប្រតិភូកីឡារាំកម្ពុជា កាលពីយប់ថ្ងៃចន្ទ គឺខ្ញុំរំភើបមែនទែន ព្រោះលទ្ធផលនេះធ្វើឲ្យមានការកោតសរសើរពីមហាជន ពិសេសស្ថាប័នកីឡា ដែលអត្តពលិករបស់យើងដណ្ដើមបានមេដាយកម្រិត អាស៊ីចំនួន ៥ ហើយនេះជាសមិទ្ធផលដ៏ល្អ ស្ទើរមិនគួរឲ្យជឿ ព្រោះជាលើកដំបូង ដែលយើងបានចូលរួម តែទទួលបានលទ្ធផលល្អបែបនេះ»។
លោកស្រីប្រធានសហព័ន្ធបានបន្ដថា៖ «អ្វីដែលសំខាន់ ខ្ញុំចង់ប្រាប់ទៅបងប្អូនយើងថា នៅឆ្នាំ ២០១៩ កីឡារាំ នឹងដាក់គោលដៅច្បាស់លាស់មួយ ដោយស្នើសុំឲ្យមានអត្តពលិកជម្រើសជាតិច្រើនជាងមុន និងខិតខំប្រឹងប្រែងឲ្យទទួលបានមេដាយពីការប្រកួតស៊ីហ្គេម ឆ្នាំ ២០១៩ នៅហ្វីលីពីន ព្រោះសមិទ្ធផលនេះ នឹងធ្វើឲ្យយើងមានទឹកចិត្តខិតខំបន្ថែម និងហ៊ានកំណត់ជយលាភី សម្រាប់ព្រឹត្តិការណ៍ប្រចាំតំបន់»។
គួររំឭកថា សម្រាប់ការប្រកួត ADSF Asain Dance Sport Championship និង ការប្រកួត ADSF Open Hong Kong 2018 នៅហុងកុង ដែលបានបញ្ចប់កាលពីថ្ងៃអាទិត្យ កន្លងមកនេះ កីឡាករ ច័ន្ទ វ៉ិចទ័រ និងកញ្ញា ព្រាប ដានីអែលឡា បានឈ្នះមេដាយសំរឹទ្ធ ការប្រកួត ADSF Asain Championship លើការរាំគូចង្វាក់ Cha Cha Cha ដោយមាន ១៥ ប្រទេសចូលរួម។
ចំណែកព្រឹត្តិការណ៍ ADSF Open Hong Kong 2018 កីឡាករ ច័ន្ទ វ៉ិចទ័រ និង ព្រាប ដានីអែលឡា បានឈ្នះមេដាយមាស ១ លើវិញ្ញាសា 5-dance ចំណែកកីឡាករ សេងសុគីម ឈ្នះមេដាយប្រាក់ ១ លើវិញ្ញាសាឯកត្តជនរាំចង្វាក់ Cha Cha Cha និងមេដាយសំរឹទ្ធ ១ វិញ្ញាសារាំចង្វាក់ Rumba។ រីឯ កីឡាករ ម៉ូវ ដាវីន និងកញ្ញា ម៉ូវ ដានីតា ឈ្នះមេដាយសំរឹទ្ធ ២ លើវិញ្ញាសារាំចង្វាក់ Cha Cha Cha បែប Jive និងវិញ្ញាសា Latin-Cha Cha Cha។
ចំណែកអ្នកស្រី ហង្ស ស៊ីមន អគ្គលេខាធិការសហព័ន្ធកីឡារាំកម្ពុជា បាននិយាយថា៖ «ការហ្វឹកហាត់ត្រៀមស៊ីហ្គេម ឆ្នាំ ២០១៩ គឺជាការហ្វឹកហាត់ក្នុងស្រុក ដោយមានអញ្ជើញគ្រូបង្វឹកបរទេសមកជួយបង្ហាត់បន្ថែមពីលើគ្រូបង្វឹកក្នុងស្រុក ក្នុងនោះលោក ច័ន្ទ វ៉ិចទ័រ និងកញ្ញាព្រាប ដានីអែលឡា គឺជាគ្រូបង្វឹកផង ជាកីឡាករកីឡាការិនីតំណាងកម្ពុជាផងដោយពួកគាត់ក៏មានសមត្ថភាព និងសក្តានុពលល្អ ដើម្បីបង្ហាត់ដល់កីឡាករ កីឡាការិនីវ័យក្មេងកម្ពុជាដែរ»៕