សៀមរាប៖ ក្រុមសហព័ន្ធកីឡាប្រដាល់គុនខ្មែរអន្តរជាតិកាលពីចុងសប្តាហ៍បានបើកមហាសន្និបាតបូកសរុបបញ្ចប់អាណត្តិទី ១ និងជ្រើសរើសបំពេញបន្ថែមនូវគណៈកម្មាធិការប្រតិបតិ្តសហព័ន្ធព្រមទាំងតែងតាំងឥស្សរជនជាន់ខ្ពស់ក្នុងរាជរដ្ឋាភិបាលជាក្បាលម៉ាស៊ីនដឹកនាំក្នុងអាណត្តិទី ២ សម្រាប់ឆ្នាំ ២០១៩ ដល់ ២០២៣ ដើម្បីពង្រឹងសមត្ថភាពសហព័ន្ធគុនខ្មែរ ដើម្បីទំនាក់ទំនងលើឆាកអន្តរជាតិក្នុងទិសដៅឲ្យប្រទេសជាច្រើននៅលើពិភពលោកបានចូលរួមយ៉ាងផុសផុលពិសេសក្នុងព្រឹត្តិការណ៍កីឡាស៊ីហ្គេមលើកទី ៣២ ឆ្នាំ ២០២៣ ដែលព្រះរាជាណាចក្រកម្ពុជាធ្វើម្ចាស់ផ្ទះ។
ជាមួយគ្នានេះ មហាសន្និបាតដែលធ្វើឡើងនៅទីក្រុងសៀមរាប ខេត្តសៀមរាបរយៈពេល ៣ ថ្ងៃ ដោយមានការចូលរួមពីប្រទេសចំនួន ១៨ ក្នុងអាស៊ី និងបានតែងតាំងប្រធាន អនុប្រធានព្រមទាំងគណៈកម្មាធិការប្រតិបត្តិសរុបចំនួន ១១ នាក់ សុទ្ធតែជាធនធានមនុស្សល្អ ជំនាញក្នុងការទាក់ទងប្រតិបត្តិការ ឬធ្វើសកម្មភាព។
ក្រោយការបិទបញ្ចប់មហាសន្និបាតកាលពីថ្ងៃសុក្រនោះ លទ្ធផលជាផ្លូវការបានសម្រេចនូវសមាសភាពថ្នាក់ដឹងនាំសហព័ន្ធអាណត្តិថ្មី។ លោក ម៉ាម រ៉ា អតីតប្រធានក្នុងអណត្តិទី ១ ត្រូវបានគាំទ្រដោយមហាសន្និបាតជ្រើសតាំងជាប្រធានបន្ត ហើយលោកបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកអគ្គនាយកគយ និងរដ្ឋាករកម្ពុជាជាអនុប្រធានអចិន្រ្តៃយ៍ លោកឧត្តមសេនីយ៍ តែម ម៉ឺន អគ្គលេខាធិការរង NOCC និងជាប្រធានសហព័ន្ធប្រដាល់គុនខ្មែរជាអនុប្រធានទី ១។ លោក Sayasone say samone សញ្ជាតិឡាវប្រធានកីឡាមួយពិភពលោក ជាអនុប្រធានទី ២។ លោក វ៉ាត់ ចំរើន រដ្ឋលេខាធិការក្រសួងទេសចរណ៍ អគ្គលេខាធិការនៃគណៈកម្មាធិការជាតិអូឡាំពិកកម្ពុជាជាអគ្គលេខាធិការ និងមានសមាជិកចំនួន ៦ រូបបន្ថែមទៀត។
លោក ម៉ាម រ៉ា ដែលជាប់ជាប្រធានមានប្រសាសន៍ថា៖ «សហព័ន្ធប្រដាល់គុនខ្មែរអន្តរជាតិ ដែលមានសកម្មភាព ៥ ឆ្នាំកន្លងមកគិតមកដល់ពេលនេះមានប្រទេសចូលជាសមាជិកនៅលើពិភពលោកចំនួន ៣៨ ប្រទេស គឺគ្រប់ទ្វីប ហើយវត្តមានក្នុងមហាសន្និបាតផ្ទាល់នៅក្នុងឱកាសនេះមានចំនួន ១៨ ប្រទេសក្រៅពីនេះ គេគាំទ្រតាមរយៈលិខិតប្រគល់សិទ្ធិ»។
លោក វ៉ាត់ ចំរើន ដែលជាប់ជាអគ្គលេខាធិការមានប្រសាសន៍ថា៖ «សហព័ន្ធគុនខ្មែរអន្តរជាតិ មានសកម្មភាពផ្តោតទៅលើការផ្សព្វផ្សាយ និងទំនាក់ទំនងស្វែងរកសមាជិកដែលជាប្រទេសផ្សេងៗនៅលើពិភពលោកហើយក៍ជាសហព័ន្ធកីឡាមួយដែលបានសហការជាមួយសហព័ន្ធជាតិ (សហព័ន្ធគុនខ្មែរ) ដើម្បីមានសកម្មភាពលើឆាកអន្តរជាតិព្រមទាំងនាំពីអន្តរជាតិមកក្នុងស្រុក ខណៈដែលធនធានមនុស្ស ឬធនធានកីឡាករ គឺមិនអាចផ្តាច់ចេញពីសហព័ន្ធគុនខ្មែរក្នុងស្រុកនោះឡើយ»។
លោកបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកអគ្គនាយកគយ និងរដ្ឋាករកម្ពុជាដែលជាប់ជាអនុប្រធានអចិន្រ្តៃយ៍នោះ បានផ្តល់បទសម្ភាសប្រាប់ភ្នំពេញប៉ុស្តិ៍ថា៖ «ខ្ញុំសប្បាយចិត្តក្នុងការចូលរួមក្នុងសកម្មភាពកីឡាសហព័ន្ធប្រដាល់គុនខ្មែរអន្តរជាតិដើម្បីជួយគាំទ្រក្នុងវិស័យកីឡា ក៏ដូចរួមចំណែកជួយដល់សង្គមផងដែរ»។
លោកបណ្ឌិត គុណ ញឹម បានបន្ថែមថា៖ «នេះជាការងារថ្មីមួយបន្ថែមទៀតដែលខ្ញុំត្រូវខិតខំស្វែងយល់និងប្រឹងប្រែងចូលរួមនៅក្នុងដំណើរឈានទៅព្រឹត្តិការណ៍កីឡាដ៍ធំ និងជាប្រវត្តិសាស្ត្រ គឺស៊ីហ្គេមលើកទី ៣២ ដែលកម្ពុជាធ្វើម្ចាស់ផ្ទះឆ្នាំ ២០២៣»៕