ភ្នំពេញ: សហព័ន្ធកីឡាបាល់ឱបកម្ពុជា បានបើកមហាសន្និបាតជាថ្មី ដើម្បីបោះឆ្នោតជ្រើសរើសសមាជិកប្រតិបត្តិចំនួន ១៧ នាក់ សម្រាប់ដឹកនាំធ្វើសកម្មភាពក្នុងអាណត្តិទី ៣ ថ្មី ពីឆ្នាំ ២០១៩ ដល់ឆ្នាំ ២០២៣។
ក្នុងនីតិវិធីរំលាយសមាជិកប្រតិបត្តិចាស់ចោល និងបោះឆ្នោតជ្រើសរើសសមាជិកប្រតិបត្តិថ្មី ក្រោមអធិបតីភាពលោកតែម ម៉ឺន អគ្គលេខាធិការរងនៃគណៈកម្មាធិការជាតិអូឡាំពិកកម្ពុជា (NOCC) លោកម៉ិល កាដូ អគ្គនាយករងនៃអគ្គនាយកដ្ឋានកីឡាព្រមទាំងកីឡាករ-កីឡាការិនី និងមន្ត្រីពាក់ព័ន្ធជាច្រើន ដើម្បីប្រារព្វមហាសន្និបាត កាលពីព្រឹកថ្ងៃអាទិត្យ ទី ៤ ខែវិច្ឆិកា ឆ្នាំ ២០១៨ នៅទីស្នាក់ការ NOCC។
លោកស្រីតាន់ ធានី ដែលជាប់ជាប្រធានសហព័ន្ធកីឡាបាល់ឱប មានប្រសាសន៍ថា៖ «ក្នុងអាណត្តិទី ២ ចាស់ឆ្នាំ ២០១៣ ដល់ ២០១៨ សហព័ន្ធជួបការលំបាក និងឧបសគ្គច្រើនបំផុត ហើយខ្ញុំនៅតែពុះពារ និងខិតខំរក្សាបានការដឹកនាំគ្រប់គ្រង ព្រមទាំងការប្រកួតមកដល់បច្ចុប្បន្ននេះ»។
លោកស្រីបានបន្តថា៖ «បញ្ហាលំបាកមួយចំនួនត្រូវបានដោះស្រាយ ដោយមានការជួយឧបត្ថម្ភគាំទ្រពីគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា ដើម្បីធ្វើដំណើរមកដល់ពេលនេះ ហើយក៏បានត្រៀមខ្លួនដើម្បីហ្វឹកហាត់សម្រាប់ចេញប្រកួតក្នុងព្រឹត្តិការណ៍ប្រកួតស៊ីហ្គេម ឆ្នាំ ២០១៩ នៅប្រទេសហ្វីលីពីន ដែរ»។
លោកនួន ឡេង អគ្គលេខាធិការរងនៃសហព័ន្ធកីឡាបាល់ឱបកម្ពុជា បានឲ្យដឹងដា៖ «សកម្មភាពកីឡាបាល់ឱបក្នុងអាណត្តិចាស់កន្លងមក យើងមានក្លិប និងសមាគមចំនួន ៧ ដែលហ្វឹកហាត់ និងមានការប្រកួតដែលសរុបអត្តពលិក ទាំងក្មេង និងចាស់មាន ៤៨០ នាក់ ហើយប្រតិបត្តិការក្នុងលក្ខណៈរលូនខ្លះ និងមានបញ្ហាផ្ទៃក្នុងលំបាកខ្លះ»។
លោកបានបន្ថែមទៀតថា៖ «ប៉ុន្តែសហព័ន្ធបានឈានមកដល់ថ្ងៃបើកមហាសន្និបាតជាថ្មី សម្រាប់អាណត្តីថ្មីទី ២ ឆ្នាំ ២០១៩ ដល់ ២០២៣ នេះ គឺជាមោទនភាព និងជោគជ័យមួយដ៏ល្អដែលជា ការខិតខំប្រឹងប្រែងរួមគ្នាដើម្បីកីឡាទាំងអស់គ្នា»។
លោក ម៉ិល កាដូ តំណាង ក្រសួងអប់រំ យុវជន និងកីឡា មានប្រសាសន៍ថា៖ «ខ្ញុំសូមស្វាគមន៍ និងគាំទ្រយ៉ាងពេញទំហឹងចំពោះការប្រឹងប្រែងរបស់បងប្អូនក្នុងសហព័ន្ធកីឡាបាល់ឱបកម្ពុជា ដែលជម្នះឧបសគ្គឈានមកដល់ពេលនេះ»។
លោកតែម ម៉ឺន តំណាងឲ្យគណៈកម្មាធិការជាតិអូឡាំពិកកម្ពុជា មានប្រសាសន៍ លើកទឹកចិត្តចំពោះការខិតខំរបស់លោកស្រីតាន់ ធានី និងជំរុញឲ្យមានការខិតខំបន្ថែមដើម្បីឲ្យប្រភេទកីឡាបាល់ឱបមានភាពរីកចម្រើនឈានចូលទៅប្រកួតក្នុងព្រឹត្តិការណ៍អន្តរជាតិ ពិសេសស៊ីហ្គេម ឆ្នាំ ២០១៩ នៅប្រទេសហ្វីលីពីនខាងមុខ។
លោកបានបន្តថា ចំពោះសមាសភាពគណៈកម្មាធិការប្រតិបត្តិក្រោយបោះឆ្នោតមានចំនួន ១៧ នាក់ លោកស្រីតាន់ ធានី ជាប្រធានសហព័ន្ធ លោកម៉ូ ណាំងហ្វីលីព, លោក លន់ សាមឌី, លោកខេង សុភាព និងលោកវណ្ណៈ វីរៈ ជាអនុប្រធាន លោកម៉ សំរេច អនុប្រធានទី ១ លោកនួន ឡេង អគ្គលេខាធិការ លោកយ៉ន់ វ៉ាន់ថា អគ្គហេរញ្ញិក លោកព្រេជ រតនា លោកចន ម៉ូហ្សា លោកចន សាមឺឌី លោកជ្រូ គឹមសៀង និងលោក អ៊ុត វុទ្ធី ជាសមាជិកប្រតិបត្តិ៕