.jpg)
លោក យ៉ៅយ៉េន (ឆ្វេង) ប្រគល់ប័ណ្ណថ្លែងអំណរគុណដល់ប្រធានក្លិប Motohashi។ ពន្លក
ភ្នំពេញ: ការសម្រេចបែងចែកដាច់ពីគ្នារវាងសហព័ន្ធកីឡាប្រដាល់សកលកម្ពុជា និងសហព័ន្ធកីឡាប្រដាល់គុនខ្មែរបានធ្វើឲ្យក្រុមប្រដាល់សកលមានភាពស្ងប់ស្ងាត់លើសកម្មភាព ឬការចេញទៅប្រកួតនៅលើឆាកអន្តរជាតិ ហើយបញ្ហានេះបានធ្វើឲ្យឱកាសក្នុងការប្រកួតប្រជែងរកមេដាយនៅស៊ីហ្គេមរបស់ប្រដាល់សកលកាន់តែលែងមាន ខណៈអ្នកប្រដាល់សកលស្ទើរតែទាំងអស់បានបង្ខំចិត្តទៅប្រកួតប្រដាល់សេរីនៅតាមសង្វៀនផ្សេងៗ ដើម្បីទទួលបានប្រាក់ផ្គត់ផ្គង់លើជីវភាពប្រចាំថ្ងៃ។
អ្វីដែលមតិសាធារណៈមួយចំនួននៅតែមន្ទិល និងមិនជ្រះស្រឡះនោះគឺសកម្មភាពកីឡាប្រដាល់សកលមិនដែលឃ្លាតចេញ ឬផ្តាច់ខ្លួនចេញពីប្រដាល់គុនខ្មែរនៅឡើយស្របពេលដែលមន្ត្រីថ្នាក់ដឹកនាំសហព័ន្ធគឺភាគច្រើនលើសលុបជាមន្ត្រីតែមួយ។ មានន័យថាអ្នកទាំងនោះមានឋានៈ និងតួនាទីនៅក្នុងសហព័ន្ធកីឡាប្រដាល់សកលកម្ពុជាផង និងនៅសហព័ន្ធកីឡាប្រដាល់គុនខ្មែរផងគឺមានការបែងចែកតែសហព័ន្ធប៉ុណ្ណោះ។
តាមសង្កេតជាទូទៅប្រដាល់សកលក្រោមការដឹកនាំរបស់លោក ឆឹង យ៉ៅយ៉េន ជាប្រធានមួយរយៈពេលនេះហាក់ដូចជាស្ងាត់ជាងកាលដែលនៅរួមជាមួយសហព័ន្ធកីឡាប្រដាល់គុនខ្មែរ ប៉ុន្តែកាលពីថ្ងៃអាទិត្យទី ១០ ខែកុម្ភៈ ឆ្នាំ ២០១៩ សហព័ន្ធកីឡាប្រដាល់សកលកម្ពុជាបានធ្វើអនុស្សរណៈយោគយល់គ្នាមួយជាមួយក្លិបកីឡាប្រដាល់សកលអាជីព Motohashi របស់ប្រទេសជប៉ុន។
សកម្មភាពប្រដាល់សកលជ្រើសរើសជើងឯកថ្នាក់ជាតិនាពេលកន្លងមក។ ស្រេង ម៉េងស្រ៊ុន
អនុស្សរណៈយោគយល់គ្នាដែលប្រព្រឹត្តឡើងនៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីថ្ងៃអាទិត្យនោះអាចជាពន្លឺមួយជួយឲ្យសហព័ន្ធកីឡាប្រដាល់សកលអាចអភិវឌ្ឍ និងពង្រឹងសមត្ថភាពកីឡាកររបស់ខ្លួនប្រកបដោយគុណភាព ប្រសិទ្ធភាពឆ្ពោះទៅកាន់ការប្រកួតកីឡាស៊ីហ្គេមឆ្នាំ ២០២៣ និងការចូលរួមប្រជែងរកមេដាយក្នុងការប្រកួតនៅលើអន្តរជាតិនានា។
លោកវេជ្ជបណ្ឌិត ឆឹង យ៉ៅយ៉េន បានប្រាប់ភ្នំពេញប៉ុស្តិ៍ ថា៖ «ឆ្លងកាត់ការប្រកួតកន្លងមកក្នុងតំបន់អាស៊ានកម្ពុជាយើងមិនទាន់អាចទៅរួចដូចបណ្តាប្រទេសទាំងនោះទេ ទាំងកម្រិតបច្ចេកទេសសមត្ថភាព និងបទពិសោធអ៊ីចឹងហើយការចុះ MoU ពេលនេះជាឱកាសសម្រាប់កីឡាករកម្ពុជាយើង ព្រោះខាងជប៉ុនអាចមកហ្វឹកហាត់ និងប្រកួតនៅកម្ពុជា និងមួយវិញទៀតកីឡាករ កីឡាការិនីរបស់កម្ពុជាអាចទៅហ្វឹកហាត់នៅជប៉ុន ដើម្បីទទួលបានបទពិសោធល្អៗ និងថ្មីៗបន្ថែមទៀតផងដែរ»។
នៅក្នុងការចុះ MoU នោះ ក្លិបប្រដាល់ Motohashi របស់ជប៉ុនបានជួយជាថវិកាសម្រាប់ការជួសជុល កែលម្អនូវហេដ្ឋារចនាសម្ព័ន្ធហ្វឹកហាត់របស់សហព័ន្ធកីឡាប្រដាល់សកលកម្ពុជាក្នុងពេលឆាប់ៗនេះ ហើយកម្ពុជានឹងទទួលបាននូវបច្ចេកទេសថ្មីៗពីប្រទេសជប៉ុនដែលមានបំណងតែមួយគត់គឺជួយកម្ពុជាឲ្យដណ្តើមមេដាយលើឆាកអន្តរជាតិ ពិសេសនៅស៊ីហ្គេមលើកទី ៣២ ឆ្នាំ ២០២៣ ពេលកម្ពុជាធ្វើជាម្ចាស់ផ្ទះ។
លោក ប៊ុយ សោភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា បាននិយាយថា៖ «ប្រដាល់សកលមិនទាន់មានទីផ្សារប្រកួតច្រើនដូចប្រដាល់គុនខ្មែរនោះទេ ហើយជាផ្លូវការកន្លងមកគឺក្នុងរយៈពេល ១ ឆ្នាំ យើងអាចរៀបចំការប្រកួតបានត្រឹម ២ ដងប៉ុណ្ណោះ ប៉ុន្តែក្រោយពីមានដៃគូសហការជាមួយក្លិបប្រដាល់ Motohashi របស់ជប៉ុននេះ ប្រដាល់សកលរបស់យើងនឹងមានភាពរីកចម្រើនជាងមុន ខណៈបច្ចុប្បន្នកីឡាករប្រដាល់សកលមួយចំនួនកំពុងមានអាជីពប្រកួតប្រដាល់គុនខ្មែរ ដើម្បីមានប្រាក់ចំណូល ខណៈដែលប្រដាល់សកលខ្សត់កម្មវិធីប្រកួត និងខ្សត់ប្រាក់ចំណូល»៕
