ភ្នំពេញៈ ប្រធានសហព័ន្ធកីឡាប្រដាល់គុនខ្មែរ លោកឧត្តមសេនីយ៍ឯក តែម ម៉ឺន បានកំណត់ពីកាលបរិច្ឆេទ ដើម្បីប្រកួតប្រដាល់ជ្រើសរើសជើងឯកជាតិ ប្រចាំឆ្នាំ ២០១៩ និងបានកំណត់ឲ្យផ្អាកការប្រកួតជាលក្ខណៈឯកជននៅតាមសង្វៀនប៉ុស្តិ៍នានា ដើម្បីកុំឲ្យជាន់គ្នាទៅនឹងការប្រកួតថ្នាក់ជាតិដូចពេលកន្លងមក។
បន្ថែមពីលើនេះការប្រកួតថ្នាក់ជាតិ ឆ្នាំនេះ នឹងធ្វើនៅក្នុងពហុកីឡដ្ឋានជាតិអូឡាំពិកកម្ពុជា ដោយមានផ្សាយផ្ទាល់តាមទូរទស្សន៍ប៉ុស្តិ៍លេខ ៥ និងកំណត់ស្វែងរកឲ្យបាននូវប្រាក់រង្វាន់បន្ថែមពីវិស័យឯកជនដល់កីឡាករឈ្នះជយលាភីលេខ ១ ចំនួន ៣០០ ដុល្លារ លេខ ២ បាន ២០០ ដុល្លារ និងលេខ ៣ ចំនួន ១០០ ដុល្លារ ដើម្បីឲ្យជើងខ្លាំងៗមួយចំនួនចូលប្រកួត ព្រោះច្រើនឆ្នាំកន្លងមក លេខ ១ បានតែ ៣០ ម៉ឺនរៀល លេខ ២ បាន ២០ ម៉ឺន និងលេខ ៣ បាន ១៦ ម៉ឺនរៀលប៉ុណ្ណោះ។
លោក តែម ម៉ឺន បានថ្លែងក្នុងកិច្ចប្រជុំកាលពីថ្ងៃអង្គារថា៖ «គណៈកម្មាធិការប្រតិបត្តិ និងតំណាងខាងទូរទស្សន៍មួយចំនួន ដែលមានកម្មវិធីប្រដាល់ផ្សាយផ្ទាល់នៅចុងសប្តាហ៍ បានពិភាក្សា និងយល់ព្រមឯកភាពគ្នានៅគ្រប់ស្ថានីយទូរទស្សន៍នានាឲ្យផ្អាកការប្រកួត ១ សប្ដាហ៍ ដើម្បីទុកឱកាសសម្រាប់អ្នកប្រដាល់របស់យើងបានសម្រាកត្រៀមខ្លួនប្រកួតជើងឯកថ្នាក់ជាតិឲ្យបានល្អ ខណៈដែលច្រើនឆ្នាំកន្លងមក កីឡាករទៅវ៉ៃជើងឯកផង និងទៅវ៉ៃតាមប៉ុស្តិ៍ទៀតក្នុងថ្ងៃតែមួយ គឺមានផលប៉ះពាល់ខ្លាំងដល់សុខភាព»។
លោក តែម ម៉ឺន បានបន្ថែមថា៖ «យើងមានកំណែទម្រង់ថ្មីបន្ថែមទៀត គឺការប្រកួតតាមសង្វៀនទូរទស្សន៍នីមួយៗ ក្រោយពេលចាញ់ដោយសន្លប់ គឺកីឡាករត្រូវតែសម្រាកសិន មិនឲ្យចាប់គូឡើងប្រកួតនៅសប្តាហ៍បន្ទាប់ទេ។
ជាមួយគ្នានេះកីឡាករឆ្នើមៗ ដែលបានប្រកួតលក្ខណៈអន្តរជាតិ គឺមិនអនុញ្ញាតឲ្យប្រកួតរៀងរាល់ ១ សប្តាហ៍ម្តងនោះទេ គឺយ៉ាងហោចណាស់ ២ សប្តាហ៍ ប្រកួតម្តង ឬអាចនិយាយថា ១ ខែ ប្រកួតបានតែ ២ ដងប៉ុណ្ណោះ»។
ចំណែកលោកឧត្តមសេនីយ៍ទោ វ៉ា ស៊ិនភិរម្យ ទីប្រឹក្សាជាន់ខ្ពស់ NOCC និងអនុប្រធានទី១ សហព័ន្ធបានថ្លែងថា៖ «ទូរទស្សន៍ប៉ុស្តិ៍លេខ ៥ បានទទួលសិទ្ធិផ្សាយផ្ទាល់ពីការប្រកួតជម្រើសជើងឯកជាតិប្រចាំឆ្នាំ ២០១៩ ហើយខ្ញុំសុំឲ្យទូរទស្សន៍ដទៃទៀតជួយគាំទ្រផង ពិសេសការផ្អាក ១ សប្តាហ៍កុំឲ្យជាន់កម្មវិធីគ្នា»។
សម្រាប់ការប្រកួតជើងឯកថ្នាក់ជាតិ ប្រចាំឆ្នាំ ២០១៩ នេះ គ្រោងនឹងធ្វើចាប់ផ្ដើមពីថ្ងៃទី ៧ ដល់ទី ១១ ខែ តុលា ឆ្នាំ ២០១៩ ក្នុងនោះផ្នែកបុរសមាន ១០ ប្រភេទទម្ងន់ខុសពីរាល់ឆ្នាំមុនៗមាន ៨ ប្រភេទទម្ងន់ គឺទម្ងន់ ៤៨ គីឡូក្រាម ៥១ ៥៤ ៥៧ ៦០ ៦៣,៥ ៦៧ ៦៩ និងទម្ងន់ ៧១ គីឡូក្រាម។ ចំណែកផ្នែកនារីវិញមាន ៦ ប្រភេទទម្ងន់ គឺ ៤៨ គីឡូក្រាម ៥១ ៥៤ ៥៧ ៦០និង ៦៣,៥ គីឡូក្រាម។
យ៉ាងណាក៏ដោយ កីឡាករ កីឡាការិនី ដែលអាចចូលរួមការប្រកួតកីឡាប្រដាល់ជ្រើសរើសជើងឯកថ្នាក់ជាតិ ប្រចាំឆ្នាំ ២០១៩ នេះ បានត្រូវឆ្លងការប្រកួតចម្រាញ់ចេញពីសមាគម ក្រសួង ខេត្ត និងរាជធានីឲ្យបានត្រឹមត្រូវ ដើម្បីធ្វើឲ្យការប្រកួតថ្នាក់ជាតិ មានភាពស្វិតស្វាញ។
លោក តែម ម៉ឺន បាននិយាយថា៖ «ការប្រកួតឆ្នាំនេះ នឹងធ្វើដូចរាល់ឆ្នាំដែរ គឺសមាគម ក្រសួង រាជធានី និងខេត្ត ត្រូវធ្វើការចម្រាញ់កីឡាករ កីឡាការិនីខ្លាំងៗរបស់ខ្លួន ដោយមួយប្រភេទទម្ងន់ យកតែ ១ រូបប៉ុណ្ណោះ និងមិនអាចតវ៉ាថា ខេត្តខ្សោយជាងរាជធានី ឬក្រសួងទៀតនោះឡើយ»៕