ភ្នំពេញ: ក្លិបកីឡាអេឡិចត្រូនិកមួយឈ្មោះ NET MCT E-sport ត្រូវបានបង្កើតឡើង និងបានសម្ពោធជាផ្លូវការកាលពីថ្ងៃអាទិត្យដែលមានសក្តានុពល និងធនធានសម្ភារទំនើប ហើយសហព័ន្ធកីឡាអេឡិចត្រូនិកកម្ពុជាហៅថា E-Sport បានចាត់ទុកថា ក្លិបនេះជាដៃគូមួយដ៏សំខាន់ សម្រាប់សហប្រតិបត្តិការអភិវឌ្ឍន៍វិស័យកីឡាទំនើបមួយ នេះ។
ក្លិប NET MCT E-sport នេះមានទីស្នាក់ការជិតរង្វង់មូលទួលគោករាជធានីភ្នំពេញ និងត្រូវបានចំណាយថវិកាខ្ពស់រហូតដល់ទៅជាង ៣០ ម៉ឺនដុល្លារអាមេរិក ហើយបានសម្ពោធដាក់ឲ្យប្រើប្រាស់ និងចុះឈ្មោះដែលទទួលស្គាល់ពីសហព័ន្ធកីឡា E-Sport រួចហើយផងដែរ។
ក្នុងពិធីប្រកាសសម្ពោធដាក់ឲ្យប្រើប្រាស់ជាផ្លូវការ និងមានការទទួលស្គាល់ពីសហព័ន្ធដែលធ្វើឡើងក្រោម វត្តមានលោកជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងជាអនុប្រធានសហព័ន្ធកីឡាអេឡិចត្រូនិកកម្ពុជា កាលពីពេលថ្មីៗកន្លងមកនេះ។
លោក ជា ច័ន្ទបូរិបូរណ៍ បានចាត់ទុកក្លិប NET MCT E-sport មានលក្ខណៈទំនើបល្អជាងគេ និងជាទីតាំងសហការមួយសម្រាប់ការប្រកួតក្នុងព្រឹត្តិការណ៍ផ្សេងៗ។
លោកបានប្រកាសទទួលស្គាល់ក្លិប NET MCT E-sport នេះតាមរយៈការបញ្ជាក់ថា៖ «នេះជាការរួមចំណែកអភិវឌ្ឍវិស័យកីឡាអេឡិចត្រូនិកកម្ពុជាឲ្យកាន់តែរីកចម្រើន និងបានក្លាយជាកន្លែងបណ្ដុះបណ្ដាលធនធានកីឡាករកីឡាការិនីឆ្នើមៗសម្រាប់ជ្រើសរើសយកត្រៀមចូលរួមការប្រកួតថ្នាក់ជាតិ និងអន្ដរជាតិនានា ពិសេសគឺជាសកម្មភាពកីឡាដំណើរឆ្ពោះទៅស៊ីហ្គេមឆ្នាំ ២០២៣ ដែលព្រះរាជាណាចក្រកម្ពុជាធ្វើម្ចាស់ផ្ទះ»។
លោកបានបន្តថា៖ «ក្នុងនាមសហព័ន្ធ E-sport និងជារដ្ឋលេខាធិការក្រសួងព័ត៌មាន ខ្ញុំសូមវាយតម្លៃខ្ពស់ចំពោះការប្រឹងប្រែងរបស់ក្លិបដែលបង្កើតឡើងមានកម្រិតស្ដង់ដារខ្ពស់ដែលមានលក្ខណៈទំនើបនៃកីឡាអេឡិចត្រូនិកថ្មីនេះ»។
ក្លិបកម្រិតនេះត្រូវបានស្ថាប័នអន្ដរជាតិផ្ដល់ចំណាត់ថ្នាក់កម្រិតផ្កាយ ៣ ក្នុងការរៀបចំហេដ្ឋារចនាសម្ព័ន្ធគ្រឿងបរិក្ខារ និងឧបករណ៍សម្រាប់ប្រកួត ពិសេសគឺមានកន្លែងប្រកួតកម្រិតស្ដង់ដារដែលសហព័ន្ធរំពឹងថា ក្លិប NET MCT E-sport នឹងក្លាយជាកន្លែងប្រកួតមួយសហការជាមួយសហព័ន្ធ E-sport ដើម្បីរៀបចំការប្រកួតថ្នាក់ជាតិ និងកម្រិតតំបន់នាពេលអនាគត។ ទោះជាយ៉ាងណាលោកក៏ស្នើឲ្យម្ចាស់ក្លិប ត្រូវគោរពតាមបទបញ្ជារបស់សហព័ន្ធផងដែរ ដើម្បីជំរុញក្លិបឲ្យដំណើរការរលូន និងទទួលបានលទ្ធផលជោគជ័យផងដែរ។
លោកសូវ ឆាយ ម្ចាស់ក្លិប NET MCT E-sport បានសន្យាថា៖ «ក្លិបរបស់ខ្ញុំនឹងគោរពតាមលក្ខខណ្ឌផ្សេងៗ ដែលសហព័ន្ធបានចែងដើម្បីក្លាយជាផ្នែកមួយក្នុងការរួមចំណែកអភិវឌ្ឍវិស័យកីឡាអេឡិចត្រូនិកកម្ពុជា»៕