ក្រុងឡូសអេនជឺលេស: លោក Grigory Rodchenkov ដែលជាសាក្សី បានបញ្ជាក់កាលពីថ្ងៃអង្គារថា ភ្នាក់ងារប្រឆាំងសារធាតុហាមឃាត់ហៅកាត់ថា WADA បានប្រឈមមុខនឹង «មហន្តរាយសម្រាប់កីឡាស្អាតស្អំ» ប្រសិនបើលុបចោលការពិន័យព្យួរ ១ ប្រឆាំងនឹងភ្នាក់ងារប្រឆាំងសារធាតុហាមឃាត់ នៅចុងសប្តាហ៍នេះ។
អតីតប្រធានមន្ទីរពិសោធន៍ប្រចាំទីក្រុងម៉ូស្គូលោក Rodchenkov ដែលបានទម្លាយរឿងអាស្រូវនៃការប្រើប្រាស់សារធាតុហាមឃាត់របស់រុស្ស៊ី កាលពីឆ្នាំ ២០១៥ នោះ បានឲ្យដឹងថា រុស្ស៊ី អាចត្រឹមតែទទួលបាននូវសិទ្ធិអនុញ្ញាតម្តងទៀត ប្រសិនបើពួកគេបានដឹងពីតួនាទីរដ្ឋាភិបាល ក្នុងរឿងអាស្រូវនេះ និងបានផ្តល់រាល់ការសម្របសម្រួលទាំងអស់ ចំពោះលទ្ធផលធ្វើតេស្តកាលពីមុន។
លោក Rodchenkov បានសរសេរក្នុងទំព័រកាសែត USA Today ថា៖ «WADA មិនត្រូវក្លាយជាខ្លួនជានុយក្នុងការប្រើប្រាស់ល្បិចកល និងការអះអាងមិនត្រឹមត្រូវពីសំណាក់ក្រសួងកីឡាឡើយ ដែលជាអាវុធតែមួយរបស់វិមាន Kremlin ដែលបានសម្របសម្រួលក្នុងកម្មវិធីប្រើប្រាស់សារធាតុហាមឃាត់ និងបានអនុវត្ត ក្លែងក្លាយ។ ការធ្វើបែបនេះនឹងបង្កើតឲ្យមានមហន្តរាយសម្រាប់កីឡាស្អាតស្អំ»។
ការបញ្ចេញមតិរបស់លោក Rodchenkov កើតឡើងត្រឹមតែរយៈពេល ២ ថ្ងៃ នៅមុនពេលកិច្ចប្រជុំរបស់ WADA ក្នុងទីក្រុង Seychelles ដើម្បីពិភាក្សាទៅលើស្ថានភាពរបស់រុស្ស៊ី។
អង្គភាពឃ្លាំមើលការធ្វើតេស្តរកសារធាតុហាមឃាត់ពិភពលោកមួយនេះ បានប្រកាសកាលពីសប្តាហ៍មុនថា គណៈកម្មការក្រោមបង្គាប់របស់ខ្លួន បានណែនាំឲ្យមានការលុបចោលនូវការដាក់ពិន័យព្យួររយៈពេល ៣ ឆ្នាំរបស់ខ្លួន ក្រោយពីទទួលបានការធានាផ្សេងៗពីសំណាក់ក្រសួងកីឡារបស់រុស្ស៊ី។
ការបង្ហាញពីការបន្ទន់ជំហររបស់ WADA បានបង្កើតឲ្យមានការតវ៉ាយ៉ាងខ្លាំងពីអត្តពលិក និងភ្នាក់ងារប្រឆាំងសារធាតុហាមឃាត់ជាតិជុំវិញពិភពលោក៕