.jpg)
កីឡាករ យ៉ន ពិសី ត្រូវប្រកួតជាមួយ សាន សំអុន ដើម្បីរកអ្នកឈ្នះឡើងទៅវគ្គបន្ត។ រូបសហការី
ភ្នំពេញ៖ អ្នកប្រដាល់ សាន សំអុន និង យ៉ន ពិសី នឹងត្រូវប្រឈមមុខដាក់គ្នានៅក្នុងការប្រកួតវគ្គជម្រុះ ៨ នាក់ចុងក្រោយ នៅលើសង្វៀនប៉ុស្តិ៍លេខ ៥ នាថ្ងៃសៅរ៍នេះ ដើម្បីរកអ្នកឈ្នះឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រដណ្តើមពានរង្វាន់ TV5 Boxing Knock Out Serie ក្នុងប្រភេទទម្ងន់ ៥៤ គីឡូក្រាម ខណៈបេក្ខភាព ៣ នាក់ផ្សេងទៀត បានរកឃើញអស់ហើយ។
ទោះបីជា សាន សំអុន ជាក្មេងស្រករក្រោយក៏ពិតមែន ប៉ុន្តែរូបគេអាចនឹងប្រជែងបានកៅអីទៅវគ្គពាក់កណ្ដាលផ្ដាច់ព្រ័ត្រពី យ៉ន ពិសី ក្នុងលក្ខណៈតឹងតែង ព្រោះមួយរយៈនេះ កីឡាករជើងចាស់មិនតិចទេ ដែលត្រូវ សាន សំអុន ផ្ដួលបាននោះ ខណៈការប្រកួតក្នុងវគ្គជម្រុះកន្លងមកនេះ សាន សំអុន របស់ក្លិបអារុណរះកីឡា បានផ្ដួល ផាន ផាន់ណាត់ ក្លិបទ័ពពិសេសឆត្រយោង ៩១១ ឱ្យសន្លប់នៅមុនស្នូរជួងបញ្ចប់ទឹកទី៣។
ចំណែក យ៉ន ពិសី វិញ បានប្រកួតឈ្នះអ្នកប្រដាល់ រ៉ា រ៉យ៉ា ក្លិបអេភូថងកីឡាត្រឹមពិន្ទុ ហើយតាមប្រវត្តិប្រកួត គឺ យ៉ន ពិសី ធ្លាប់ប្រកួតលើស សាន សំអុន ត្រឹម ៦ ដងប៉ុណ្ណោះ ដោយក្នុងនោះ សាន សំអុន ធ្លាប់ប្រកួតបាន ៣២ ដង ឈ្នះ ២៦ ចាញ់ ៥ និងស្មើពិន្ទុ ១ ដង រីឯ យ៉ន ពិសី ធ្លាប់ប្រកួតបានចំនួន ៣៨ ដង ឈ្នះ ២៨ ដង ចាញ់ ៧ និងស្មើពិន្ទុ ៣ ដង។
តាមរយៈការសម្ភាសជាមួយគ្រូបង្វឹក លោក អាត់ សំរិទ្ធ បានប្រាប់ថា សាន សំអុន ហ្វឹកហាត់បានគ្រប់គ្រាន់មានថាមពលប្រកួតល្អ ប៉ុន្តែធម្មតាការប្រកួតលើសង្វៀនក្នុងវគ្គសំខាន់បែបនេះ មិនអាចប៉ាន់ស្មានបានទេ ព្រោះខាងគេក៏ប្រឹង យើងក៏ប្រឹង និងចង់ឈ្នះដូចគ្នា។ លោក អាត់ សំរិទ្ធ បន្ថែមថា៖ «ខ្ញុំសង្ឃឹមឈ្នះត្រឹម ៥០ ភាគរយប៉ុណ្ណោះ ព្រោះប៉ាន់ស្មានពីសមត្ថភាពប្រហាក់ប្រហែលគ្នា»។
ចំណែក លោក ឡុង សាលវ័ន្ត គ្រូបង្វឹករបស់ យ៉ន ពិសី បាននិយាយថា៖ «អ្នកទាំង ២ មានកម្រិតវិជ្ជាគុនប្រហាក់ប្រហែលគ្នា ហេតុនេះខ្ញុំមិនរំពឹងខ្ពស់ទេ គឺទស្សន៍ទាយមិនត្រូវឡើយ អ៊ីចឹងខ្ញុំមានសង្ឃឹមត្រឹម ៥០ ភាគរយដូចគ្នា ព្រោះវាអាស្រ័យទៅលើស្ថានភាពប្រកួតជាក់ស្តែងនៅលើសង្វៀន»។
ជាមួយគ្នានេះ លោក ញាន សុធី អ្នកជំនាញរៀបចំការប្រកួតប្រដាល់នៅប៉ុស្តិ៍លេខ ៥ បាននិយាយថា៖ «តាមរូបមន្តប្រកួត គឺការប្រកួតរវាង យ៉ន ពិសី និង សាន សំអុន នេះ នរណាឈ្នះនឹងត្រូវទៅប៉ះជាមួយកីឡាករ ឡុង ខេត្ត នៅវគ្គពាក់កណ្តាលផ្តាច់ព្រ័ត្រ ខណៈជើងខ្លាំង ធន់អៀនឡៃ ត្រៀមប៉ះជាមួយ រិន ដាវីត រួច ជាស្រេចទៅហើយ»។
ក្រៅពីគូប្រកួតដណ្តើមពានរង្វាន់នេះ ក៏មានការប្រកួតគូមិត្តភាពគួរឱ្យចាប់អារម្មណ៍ផងដែរ ដោយក្នុងនោះអ្នកប្រដាល់ ធន់ អៀនឡេង ត្រូវបានផ្គូផ្គងឱ្យប្រកួតជាមួយអ្នកប្រដាល់ នូវ សុខទី ក្នុងប្រភេទទម្ងន់ ៥៤ គីឡូក្រាម ចំណែកជើងចាស់ តក់ សោភ័ណ្ឌ ក្លិបអេភូថងកីឡា ដែលអាជីពប្រដាល់របស់គេលិចអណ្ដែតមិនទៀងទាត់នោះ បានវិលមកវិញ ដោយត្រូវជួបជាមួយអ្នកប្រដាល់កណ្ដាប់ដៃធ្ងន់ យ៉ុន ដារ័ត្ន របស់ក្លិបតាឡីដំរីមានរិទ្ធក្នុងប្រភេទទម្ងន់ ៦៩ គីឡូក្រាម ហើយគូនេះទំនងជា ដារ័ត្ន ស៊ីផុយ ព្រោះ តក់ សោភ័ណ្ឌ ឡើងប្រកួតទំនងគ្រាន់តែចង់បានលុយតម្លៃខ្លួនប៉ុណ្ណោះ៕
