ភ្នំពេញៈ កីឡាករជើងចាស់ ម៉ន សាម៉េត បានផ្តល់ការខកចិត្តយ៉ាងធំមួយទៅឲ្យជើងថ្មី ធន់ អៀងឡៃ តាមរយៈការយកឈ្នះដោយតានតឹងក្នុងការប្រកួតផ្តាច់ព្រ័ត្រ ដើម្បីក្លាយជាម្ចាស់ពាន TV5 Boxing Knock Out Series (K Cement) អមជាមួយប្រាក់រង្វាន់ ៤០០០ ដុល្លារ ចំណែក បឺត សង្ឃឹម បានទាត់ឲ្យ គួន ប៊ុនហ៊ីម ខូចជើងសុំចុះចាញ់ត្រឹមទឹកទី ១ ដើម្បីទទួលបានចំណាត់ថ្នាក់លេខ ៣។
នៅមុនពេលប្រកួតទាំង ម៉ន សាម៉េត និង ធន់ អៀងឡៃ សុទ្ធតែបានអះអាងពីការតាំងចិត្តយកឈ្នះរៀងៗខ្លួន ប៉ុន្តែចំពោះការប្រកួតជាក់ស្តែងនៅសង្វៀនប៉ុស្តិ៍លេខ ៥ កាលពីយប់ថ្ងៃសៅរ៍កន្លងមកនេះ ម៉ន សាម៉េត ដែលមានបទពិសោធចាស់វស្សាបានវ៉ៃជាលក្ខណៈចាំត្រង និងវាយបកដោយបច្ចេកទេសច្រើនជាង ធន់ អៀងឡៃ ដែលប្រើប្រាស់កម្លាំងបោលសម្រុកភាគច្រើន។ ក្នុងការប្រកួតចំនួនតែ ៣ ទឹកគឺអ្នកទាំង ២ គ្មានចំណាយពេលស្ទាបស្ទង់ពីបច្ចេកទេស ឬយុទ្ធសាស្ត្រអ្វីទេ ប៉ុន្តែការវាយដកថយ និងវាយឆ្មក់របស់ ម៉ន សាម៉េត ត្រូវបានគេមើលឃើញថាទទួលបានពិន្ទុល្អ និងវាយចំគោលដៅល្អជាង ខណៈដែលដៃគូ ធន់ អៀងឡៃ សម្រុកចូលដោយប្រើក្បាច់ចម្រុះមិនច្បាស់លាស់។
ទោះជាយ៉ាងណានៅទឹកទី ១ ធន់ អៀងឡៃ មានប្រៀបនៅដើមទឹក តែនៅចុងទឹកជាឱកាសរបស់ ម៉ន សាម៉េត វិញ។ រីឯ ២ ទឹកចុងក្រោយបានបង្ហាញឲ្យឃើញថា ម៉ន សាម៉េត គ្រប់គ្រងសភាពការណ៍បានល្អដោយវាយចំគោលដៅធ្ងន់ៗពិសេសកណ្តាប់ដៃ និងបានឱបកាច់ផ្តួល ធន់ អៀងឡៃ បានញឹកញាប់។ សម្រាប់លទ្ធផល ២ ទឹកចុងក្រោយ ទោះបីជា ធន់ អៀងឡៃ ព្យាយាមវាយសម្រុកខ្លាំងយ៉ាងណាក៏មិនអាចមានប្រៀបដណ្តើមពិន្ទុបានពី ម៉ន សាម៉េត នោះឡើយ។
ចប់ការប្រកួតចំនួន ៣ ទឹកពេញចៅក្រមទាំង ៥ និងប្រធានវិនិច្ឆ័យបានផ្តល់ពិន្ទុឲ្យ ម៉ន សាម៉េត ឈ្នះជាឯកច្ឆន្ទ ៥-០។ សាម៉េត បានក្លាយជាម្ចាស់ពាន អមដោយទឹកប្រាក់ ៤០០០ ដុល្លារ ឯ ធន់ អៀងឡៃ បានលេខ ២ និងប្រាក់រង្វាន់ ២០០០ ដុល្លារ។ ចំណែក បឺត សង្ឃឹម បានផ្តួល គួន ប៊ុនហ៊ីម ត្រឹមទឹកទី ១ ដើម្បីបានលេខ ៣ និងប្រាក់រង្វាន់ ៧៥០ ដុល្លារ ហើយកីឡាករលេខ ៤ ប៊ុនហ៊ីម ទទួលបានប្រាក់រង្វាន់ ៥០០ ដុល្លារ។
ជាមួយនឹងការឈ្នះពាននេះ សាម៉េត បាននិយាយថា៖ «ខ្ញុំគិតថាការប្រកួតលំបាកឈ្នះ តែខ្ញុំមានយុទ្ធសាស្ត្រ ដើម្បីឈ្នះគឺដកថយ វ៉ៃយកឈ្នះត្រឹមពិន្ទុ មិនប្រឈមទៅនឹងការប្តូរគ្នាទេ»។ សាម៉េត បន្តថា៖ «នៅទឹកទី ១ ខ្ញុំមានការព្រួយបារម្ភ ប៉ុន្តែចូលដល់ទឹកទី ២ ខ្ញុំដឹងច្បាស់ថា ខ្ញុំនឹងឈ្នះ ព្រោះខ្ញុំមានក្បាច់ទប់ទល់គឺវាយកណ្តាប់ដៃ និងទាត់ឆ្ងាយ ហើយបើនៅកៀកឱបឡើងជង្គង់នោះ ខ្ញុំឱបខាងក្រោមដើម្បីកុំឲ្យគេប្រើក្បាច់ជង្គង់បានស្រួល»។
ចំណែក ធន់ អៀងឡៃ បានសម្តែងការមិនអស់ចិត្តដោយដើរចេញមិននិយាយអ្វីទាំងអស់ ប៉ុន្តែឪពុករបស់ អៀងឡៃ និយាយថា៖ «លទ្ធផលនេះពិតជាចាញ់គេមែន ព្រោះយើងដួលច្រើន ពិសេស ២ ទឹកចុងក្រោយគឺមិនឈ្នះគេទេ»។ លោកថា៖ «គ្រួសារខ្ញុំ មកគាំទ្រទាំងអស់គឺជាង ១០ នាក់ដោយជិះម៉ូតូមកពីខេត្តកំពង់ឆ្នាំងចំនួន ៣ គ្រឿង ហើយលទ្ធផលប៉ុណ្ណឹងគឺពេញចិត្ត ព្រោះនឹងមានឱកាសក្រោយៗទៀតមិនខាន»។
ជាមួយគ្នានេះលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរដែលអញ្ជើញជាអធិបតីក្នុងការប្រកួតផ្តាច់ព្រ័ត្រនោះបានថ្លែងថា៖ «ការប្រកួតបានល្អ កាត់សេចក្តីបានយុត្តិធម៌ល្អ ហើយមហាជនគាំទ្រច្រើន។ សង្វៀនប៉ុស្តិ៍លេខ ៥ ឥឡូវមានការរៀបចំល្អជាងមុន ហើយប៉ុន្មានសប្តាហ៍ទៀតនឹងបន្ថែមការប្រកួត ១ លើកទៀតនៅថ្ងៃអាទិត្យ»៕