.jpg)
ម៉ន សាម៉េត បានទាត់ទៅលើ Phun Savath ក្នុងការប្រកួតនៅលើសង្វៀន PNN កន្លងមក។ ស្រេង ម៉េងស្រ៊ុន
ភ្នំពេញៈ កីឡាករកម្ពុជា ម៉ន សាម៉េត នឹងត្រូវប្រកួតសងសឹកថៃ Phun Savath ក្នុងទម្ងន់ ៥៧ គ.ក្រ នៅលើសង្វៀន SEATV នាព្រឹកថ្ងៃអាទិត្យ ខាងមុខ ចំណែក ឌុម កែវដា ចង់ឈ្នះគូសត្រូវចាស់ Phayaklek ជាថ្មីម្តងទៀត ដើម្បីស្តារមុខមាត់ ចំពោះការចាញ់ ៥ លើកជាប់ៗគ្នាកន្លងមកនេះ។
ម៉ន សាម៉េត ធ្លាប់ជួបកីឡាករជើងចាស់ Phun Savath ៥លើកហើយ ហើយពួកគេបានឈ្នះ ២ និងចាញ់ ២ និងស្មើគ្នា ១ ដង ហើយលទ្ធផលនេះធ្វើឲ្យពួកគេ នៅតែមិនទាន់អស់ចិត្ត។
សាម៉េត បានប្រាប់ថា៖ «ជំនួបសងសឹកលើកនេះ ខ្ញុំគិតថា មានទំនុកចិត្តឈ្នះខ្ពស់ ព្រោះការហាត់ជាប្រចាំជួយឲ្យខ្ញុំថែរក្សាកម្លាំង និងបច្ចេកទេសបានល្អ ហើយម្យ៉ាងទៀត Phun Savath មួយរយៈនេះមិនខ្លាំងដូចមុនទេ។ តាមខ្ញុំសង្កេតមើលការប្រកួតរបស់គាត់ គឺចាប់ផ្តើមវាយធ្លាក់ចុះកម្លាំង បន្ទាប់ពីប្រកួតជាមួយ ពេជ្រ ម្ទេសខ្មាំង រងរបួសគ្រាំគ្រា និងមានបញ្ហាក្នុងឆ្អឹង»។
កីឡាករមានកម្ពស់ ១,៦៣ ម៉ែត្រ ធ្លាប់ប្រកួត ១៣៥ ដង ឈ្នះ១០០ ចាញ់ ៣០ ស្មើ ៥ ដង និងធ្លាប់ឈ្នះជើងឯកជាតិសឹងរាល់ឆ្នាំ សាម៉េត បានបន្ថែមថា៖ «ខ្ញុំមានទំនុកចិត្តឈ្នះ ៨០ ភាគរយលើ Phung Savath ដើម្បីស្តារមុខមាត់ និងភាពខ្លាំងរបស់ខ្ញុំវិញ»។
ចំណែកលោក ម៉ាង ម៉ន ដែលជាគ្រូបង្វឹក បាននិយាយថា៖ «មួយរយៈនេះ សាម៉េត ប្រឹងហាត់ស្តារកម្លាំង ដើម្បីប្រកួតយកប្រជាប្រិយឡើងវិញ ក្នុងកម្រិតគូអន្តរជាតិ។ ហេតុនេះខ្ញុំសង្ឃឹម និងទុកចិត្តថា អាម៉េត នឹងឈ្នះថៃ Phun Savath ១០០ ភាគរយ!»។
ចំណែកការវិលមកជួបគ្នារវាង ឌុម កែវដា និង Phayalek ជាគូសងសឹកគ្នាក្នុងចំណាប់អារម្មណ៍ និងជក់ចិត្តពីមហាជន។ កែវដា ធ្លាប់ឈ្នះ Phayalek ចំនួន ៣ លើកមកហើយ ប៉ុន្តែសុទ្ធតែតឹងតែង និងលំបាកលំបិន។
ឌុម កែវដា ធ្លាប់ប្រកួតបាន ៨៩ ដង ឈ្នះ ៦៩ ចាញ់ ១៧ និងស្មើ ៣ ដង ប៉ុន្តែការប្រកួតលក្ខណៈអន្តរជាតិជាមួយកីឡាករថៃ ៥ លើកចុងក្រោយនេះ កែវដា បានចាញ់ទាំង ៥ លើក ព្រោះកម្រិតវិជ្ជាគុន និងកម្លាំងពិតជាធ្លាក់ចុះ។
ឌុម កែវដា ប្រាប់ថា៖ «បន្ទាប់ពីខ្ញុំរងរបួសដៃ និងមានបញ្ហាឈឺក្នុងទ្រូង គឺការប្រកួតមិនសូវបានល្អទេ។ នៅក្នុងជំនួបសងសឹកជាមួយ Phayalek នេះពិតជាលំបាក និងតឹងតែងណាស់ ព្រោះគេល្អផ្នែកស្នៀតទាត់ និងជង្គង់។ ហេតុនេះបើសិនខ្ញុំប្រើស្នៀតកែង និងជង្គង់ អាចនឹងចាញ់គេ ព្រោះកម្លាំងខ្ញុំ ធ្លាក់ជាងមុនៗដែរ»។
កែវដា បន្ថែមថា៖ «ខ្ញុំមានក្តីព្រួយបារម្ភខ្លាំងណាស់ ខ្លាចចាញ់ធ្លាក់ប្រិយភាព ដោយបញ្ហាការប៉ះទង្គិចខ្លាំង នាំឲ្យឈឺត្រង់ចង្កេះ ហេតុនេះលំបាកក្នុងការចូលឱបប្រឹងឡើងជង្គង់។ ទោះជាយ៉ាងណា ខ្ញុំនឹងប្រឹងយកឈ្នះឲ្យបាន ដើម្បីស្តារមុខមាត់ឡើងវិញ បន្ទាប់ពីចាញ់ចំនួន ៥ ប្រកួតជាប់ៗគ្នាកន្លងមកនេះ»។
លោក ឈិន ក្វាន់ចៃ ជាគ្រូបង្វឹកនិយាយថា៖ «ខ្ញុំសង្ឃឹម និងទុកចិត្ត កែវដា ថានឹងឈ្នះព្រោះការហ្វឹកហាត់ និងឆន្ទៈរបស់គេពិតជាចង់ឈ្នះខ្លាំង ដើម្បីមានទីផ្សារប្រកួតច្រើនឡើងវិញ»។
ចំណែកលោក ថៃ អ៊ូ អ្នកនាំកីឡាករថៃមកប្រកួត បានប្រាប់ថា Phayalek ឥឡូវហាត់បានល្អ និងមានកម្លាំងត្រៀមប្រកួតល្អ។ លោកបន្តថា ការឈ្នះ ឬចាញ់ មិនទាន់ហ៊ានថាទេ ប៉ុន្តែនេះជាការប្រកួតស្វិតស្វាញ និងតឹងតែងគ្មានអ្នកណាស៊ីផុយនោះទេ៕
