ភ្នំពេញ: កីឡាករកម្ពុជា ២ នាក់ បានយកឈ្នះកំពូលជើងខ្លាំងរបស់កីឡាករថៃ តាមរយៈការផ្តួលឲ្យសន្លប់ក្នុង ទឹកទី ៤ ដូចគ្នា និងទទួលបានការគាំទ្រយ៉ាងខ្លាំងពីអ្នកទស្សនាផ្ទាល់ក្នុងកម្មវិធីប្រដាល់មិត្តភាពអន្តរជាតិ Wurkz រវាងកីឡាករកម្ពុជា និងថៃកាលពីល្ងាចថ្ងៃអាទិត្យរបស់សង្វៀនអាស៊ីអាគ្នេយ៍។
កីឡាករម៉ន សាម៉េត មកពីក្លិបកងចក្ររាជសីហ៍ បានចំណាយពេលវ៉ៃចេញគ្រប់ស្នៀត ដើម្បីបង្ខំឲ្យកីឡាករថៃ Yourt Savich រងការរាប់ពីអាជ្ញាកណ្តាល ៣ លើកក្នុងរយៈពេល ៣ ទឹក។
ជាមួយគ្នានេះ កីឡាករឯម ឡេងលី មកពីក្លិបថ្មគោលពោធិ៍សែនជ័យ បានផ្តួលកីឡាករជើងខ្លាំងថៃ Chai Sou ឲ្យចុះចាញ់ក្នុងទឹកទី ៤។ គម្រោងពីដំបូង កីឡាករជើងខ្លាំងថៃ Yourt Savich រូបនេះ ត្រូវជួបប្រកួតជាមួយកីឡាករពេជ្រ ម្ទេសខ្មាំង ប៉ុន្តែពេលមកប្រកួតជាក់ស្តែង ត្រូវដាក់ម៉ន សាម៉េត ជំនួសវិញ ខណៈកីឡាករទាំង ២ ហាក់ដូចជាស្រេកឃ្លានជ័យជម្នះដូចគ្នា។
សកម្មភាពប្រកួតគឺគ្មានពេលស្ទាបស្ទង់គ្នានៅឡើយ ដោយពួកគេបានចូលវាយសម្រុកយ៉ាងខ្លាំងតាំងពីទឹកទី ១ រហូតដល់ទឹកទី ៤ មុននឹងកីឡាករថៃ Yourt Savich សន្លប់ដេកស្តូកបាត់មាត់តែម្តង។
ចំណុចសំខាន់ដែលម៉ន សាម៉េត មានប្រៀបនោះ គឺការវាយកែងដែល នាំឲ្យអាជ្ញាកណ្តាលលោកណន រិទ្ធ រាប់កីឡាករថៃចំនួន ៨ ចំនួន ១ លើកនៅទឹកទី ២ និងទឹកទី ៣ រាប់ដល់ ៨ ចំនួន ២ លើក ហើយនៅទឹកទី ៤ ម៉ន សាម៉េត បានបន្ថែមកណ្តាប់ដៃ ដែលធ្វើឲ្យកីឡាករថៃ Yourt Savich រងការបញ្ឈប់ពីអាជ្ញាកណ្តាលតែម្តង។
សកម្មភាពប្រកួតនេះត្រូវបានអ្នកទស្សនាដ៏ច្រើនលើសលប់កោតសរសើរពីការប្រកួតគ្នាអស់ពីសមត្ថភាពដែលជក់ចិត្តបំផុត ហើយម៉ន សាម៉េត ត្រូវបានគេកត់សម្គាល់ថា ការហ្វឹកហាត់នៅប្រទេសថៃមួយរយៈ ធ្វើឲ្យគេមានសមត្ថភាពប្រកួតល្អជាងមុន។
ម៉ន សាម៉េត បាននិយាយថា៖ «ឥឡូវនេះមុខរបរបន្ថែមដើម្បីជីវភាពផ្នែកនេសាទត្រីត្រូវបានផ្អាក និងវិលមកប្រឹងប្រែងហ្វឹកហាត់ដើម្បីឡើងប្រកួតរកប្រាក់ចំណូលតែមួយមុខ។
ការប្រកួតនេះតឹងតែងណាស់ ពីព្រោះកីឡាករថៃនេះរឹងមាំណាស់ ហើយខ្ញុំវ៉ៃឲ្យអាជ្ញាកណ្តាលរាប់ចំនួន ៣ លើកនៅតែក្រោកមករួចលេងស្នៀតជង្គង់តបវិញបានយ៉ាងល្អ»។
សាម៉េត បានបន្តថា៖ «ក្រោយការហ្វឹកហាត់មួយរយៈនេះ ខ្ញុំមានកម្មវិធីប្រកួតច្រើនជាលក្ខណៈអន្តរជាតិ ដែលមានប្រាក់ចំណូលខ្ពស់ជាងប្រកួតជាមួយកីឡាករខ្មែរគ្នាឯង»។
ក្នុងទម្ងន់ ៥៧ គីឡូក្រាមនេះម៉ន សា-ម៉េត បានអួតថា៖ «ខ្មែរគ្នាឯងលំបាករកគូប្រកួតណាស់»។
ជាមួយគ្នានេះ មានការប្រកួតដ៏គួរឲ្យកោតសរសើរមួយទៀតនៅពេលកីឡាករឯម ឡេង លី បានយកឈ្នះជើងខ្លាំងថៃ Chai Sou ក្រោយពីការប្រកួត ៤ ទឹក ក្នុងទម្ងន់ ៧១ គីឡូក្រាម។ Chai Sou ធ្លាប់ឈ្នះ និងស្មើជាមួយឡុង សុភី និងស្មើជាមួយរឿង សោភ័ណ្ឌ ផងដែរ ហើយបើតាមការកត់សម្គាល់មក ការប្រកួតរបស់គេនៅកម្ពុជាកម្រចាញ់ណាស់ ដោយភាគច្រើនឈ្នះកីឡាករកម្ពុជា។
សម្រាប់ការប្រកួតលើកនេះ កីឡាករឯម ឡេងលី មានបទពិសោធខ្ចីនៅឡើយប៉ុន្តែទឹកចិត្តប្រកួតខ្ពស់ ដោយហ៊ានចូលវាយសម្រុកប្តូរបានល្អ។
ក្នុងការប្រកួតចំនួន ៣ ទឹកដំបូងឯម ឡេងលីមានប្រៀបបន្តិចបន្តួចដោយវាយចេញបានច្រើនហើយខណៈដែលកីឡាករថៃ Chai Sou ត្រូវបានគេមើលឃើញថា ហាក់មិនវាយសម្រុកខ្លាំងពុះកញ្ជ្រោលអស់ពីសមត្ថភាពនៅឡើយទេ។ ជាមួយគ្នានោះ លោកអាជ្ញាកណ្តាលបានព្រមានកីឡាករថៃផងដែរ ឲ្យប្រឹងប្រកួត ប៉ុន្តែបន្ទាប់មកឯម ឡេងលី ហាក់បីដូចបានចិត្ត ចូលទាត់សម្រុកបន្ថែមជើងក្រោមញឹកញាប់ ដែលបណ្តាលឲ្យជើងខ្លាំងថៃ Chai Sou ដួលចំនួន ២ លើក និងងើបលែងរួច ដោយសុំចុះចាញ់តែម្តងក្រោយអាជ្ញាកណ្តាលរាប់ដល់ ១០។
មានអ្នកទស្សនាមួយចំនួនមានការមន្ទិលឆ្ងល់ចំពោះការប្រកួតរបស់ Chai Sou ដែលហាក់ដូចជាចាញ់មិនទំនងសោះ ហើយការប្រកួតមុនៗ រូបគេមានកម្រិតល្អជាងប្រកួតលើកនេះឆ្ងាយណាស់។
ទោះជាយ៉ាងណា លោកថៃ អ៊ូ ប្រតិភូនាំកីឡាករថៃមកប្រកួត បាននិយាយថា៖ «ការប្រកួតរបស់កីឡាករមានថ្ងៃខ្លះក៏មិនបានល្អដែរ។ ធម្មតាការប្រកួតវាមានចាញ់ និងឈ្នះមានពេលខ្លះវ៉ៃល្អ ខ្លះមានបញ្ហាសុខភាពតិចតួច ឬហ្វឹកហាត់មិនបានល្អ ប៉ុន្តែអារឿងធ្វើពុតចាញ់ដៃគូនោះ គ្មានទេ»៕