.jpg)
កីឡាករម៉ន សាម៉េត (ឆ្វេង) ពេលប្រកួតជាមួយនឹងកីឡាករថៃ Vort Vandy កាលពីចុងសប្តាហ៍។ យឺន ពន្លក
ភ្នំពេញ: ការប្រកួតចាញ់របស់កីឡាករម៉ន សាម៉េត នៃក្លិបកងចក្ររាជសីហ៍ជាមួយកីឡាករថៃ Vort Vandy ក្នុងទម្ងន់ ៥៧ គីឡូក្រាមកាលពីថ្ងៃអាទិត្យកន្លងទៅ បានបង្កើតឲ្យមានការភ្ញាក់ផ្អើល និងចាប់អារម្មណ៍យ៉ាងខ្លាំង ខណៈដែលកីឡាករថៃរូបនេះ បានប្រើកណ្តាប់ដៃ ដើម្បីបញ្ចប់ការប្រកួតត្រឹមចុងទឹកទី ១ ឲ្យសាម៉េត ឲ្យសន្លប់បាត់មាត់ឈឹង។
ក្រោយពេលសន្លប់ ភ្នំពេញប៉ុស្តិ៍បានស្វែងជួបម៉ន សាម៉េត ដើម្បីបកស្រាយមន្ទិលរបស់អ្នកទស្សនា ដែលហាក់បីដូចមិនអស់ចិត្ត ស្របពេលដែលកន្លងមក កីឡាកររូបនេះមិនធ្លាប់សន្លប់យ៉ាងលឿនបែបនេះទាល់តែសោះ។ ម៉ន សាម៉េត បាននិយាយថា៖ «វាពិតជាមិនគួរឲ្យជឿពីព្រោះសមត្ថភាពកីឡាករថៃ Vort Vandy ក្នុងទម្ងន់ ៥៧ គីឡូក្រាមនេះមិនខ្លាំងប៉ុន្មានទេ។ តាមរយៈការទស្សនាវីដេអូឃ្លីបការប្រកួតរបស់គេ ខ្ញុំក៏បានគិតថា មិនអាចឈ្នះខ្ញុំបានដែរ»។
កីឡាកររូបនេះបានបកស្រាយបន្តថា៖ «ប៉ុន្តែការប្រកួតជាក់ស្តែង ការចាញ់យ៉ាងងាយរបស់ខ្ញុំគឺហៅថា ភ្លាត់ស្នៀត ប្រហែសតែបន្តិច ពោលគឺកណ្តាប់ដៃវាយចេញខ្លីយ៉ាងលឿនចូលថ្គាមក្បែរចង្កា បាននាំឲ្យខ្ញុំសន្លប់យ៉ាងលឿនបំផុតស្មានមិនដល់»។
ម៉ន សាម៉េត បានបញ្ជាក់ថា៖ «ក្នុងប្រវត្តិប្រកួតប្រដាល់ជិត ១០ ឆ្នាំ ខ្ញុំមិនដែលចាញ់សន្លប់ក្នុងទឹកទី ១ បែបនេះទេ។ តាមពិតខ្ញុំហ្វឹកហាត់បានល្អ ថែទាំសុខភាពបានល្អ និងត្រៀមប្រកួតល្អ ប៉ុន្តែការចាញ់ដោយកណ្តាប់ដៃយ៉ាងលឿននៅចុងទឹកនោះគឺជាការភ្លាត់ស្នៀត ឬអាចនិយាយថា ខ្ញុំប្រហែសបាត់ស្នៀតការពារដោយមានទំនុកចិត្តខ្លួនថា ការប្រកួតពេលនេះមិនអាចចាញ់បានទេគឺដូចពាក្យគ្រូបង្វឹកថា «ភ្លាត់ស្នៀតដោយមើលងាយដៃគូ»។
កីឡាករររូបនេះបានបន្ថែមថា៖ «ខ្ញុំចាត់ទុកការចាញ់នេះជាប្រវត្តិ និងជាថ្ងៃស៊យបំផុត ពីព្រោះក្រោយពេលសន្លប់ ខ្ញុំមកដល់ផ្ទះ កូនទទួលរងគ្រេចដៃបន្ថែមទៀតដែលជាបន្ទុកលំបាកមួយធំ»។
ទោះជាយ៉ាងណា ម៉ន សាម៉េត បានអះអាងថា ការប្រកួតលើកក្រោយៗមិនឲ្យកើតមានឡើងដូចនេះទៀតទេ។
តាមការអះអាងរបស់កីឡាករម៉ន សាម៉េត បច្ចុប្បន្ន រូបគេ គ្មានមុខរបរអ្វីបន្ថែមទៀត ឬនេសាទត្រីដូចលើកមុនៗទេ ពោលគឺហ្វឹកហាត់ និងឡើងប្រកួតយកប្រាក់ចឹញ្ចឹមជីវិតដោយមានប្រពន្ធ និងកូនចំនួន ២ ផងដែរ។
នៅក្នុងដំណាច់ឆ្នាំនេះ និងដើមឆ្នាំ២០១៩ ម៉ន សាម៉េត ជាប់កិច្ចសន្យាប្រកួតដណ្តើម ខ្សែក្រវាត់ចំនួន ២ គឺប្រកួតទីហ្វីនៅសង្វៀនប៉ុស្តិ៍លេខ ៥ និង ប្រកួតដណ្តើមខ្សែក្រវាត់ខារ៉ាបាវទម្ងន់ ៥៧ គីឡូក្រាមដូចគ្នានៅសង្វៀនអាស៊ីអាគ្នេយ៍។
បន្ថែមពីលើនេះ មានព្រឹត្តិការណ៍ផ្សេងៗទៀតដែលរូបគេត្រូវប្រកួតលក្ខណៈមិត្តភាពអន្តរជាតិនៅសង្វៀនដទៃជាច្រើនដែលសហព័ន្ធគុនខ្មែរ ក៏ដូចសមាគមកីឡាប្រដាល់ក្រសួងមហាផ្ទៃជួយរៀបចំឲ្យមានការប្រកួត ដើម្បីបានប្រាក់ចំណូលគ្រាន់ជួយជីវភាពគ្រួសារ៕
