.jpg)
ម៉ន សាម៉េត បានទាត់ទៅលើថៃ Vany Chhai កាលពីថ្ងៃសៅរ៍។ ពន្លក
ភ្នំពេញៈ កីឡាករកម្ពុជា ម៉ន សាម៉េត បានប្រើពេល ២ នាទីក្នុងការផ្តួលជើងខ្លាំងរបស់ថៃសម្រាប់ការប្រកួតមិត្តភាពអន្តរជាតិអមវគ្គជម្រុះពានរង្វាន់ K- Cement Knock outseries ចំណែក គឿម សុវណ្ណឌឿត និង ខេម ចាន់ សុទ្ធតែបានឈ្នះលើគូប្រកួតនៅក្នុងការប្រកួតជម្រុះប្រចាំសប្តាហ៍នេះ ដើម្បីបន្តដំណើរឡើងទៅប្រកួតនៅវគ្គបន្ត។
មុនពេលប្រកួតដែលត្រូវធ្វើនៅលើសង្វៀនប៉ុស្តិ៍លេខ ៥ កាលពីថ្ងៃសៅរ៍នោះ ម៉ន សាម៉េត មានការបារម្ភខ្លាំងបំផុតដោយសារតែសមត្ថភាព និងប្រវត្តិប្រកួតរបស់ថៃ Vany Chhai ជាជើងឯករងល្បីល្បាញនៅប៉ុស្តិ៍លេខ ៧ ថៃហើយមានបទពិសោធលើសង្វៀនបានច្រើនដោយមានក្បាច់ជង្គង់ល្អបំផុត។
ប៉ុន្តែនៅពេលប្រកួតជាក់ស្តែង ម៉ន សាម៉េត ពិតជាធ្វើបានល្អដោយតាំងចិត្តប្រកួតបានរឹងមាំ មិនស្លុតស្មារតីឡើយ។ នៅទឹកទី ១ ពួកគេ វាយចេញមានការប្រុងប្រយ័ត្នដូចគ្នា ប៉ុន្តែចូលដល់ទឹកទី ២ សាម៉េត ហាក់បីដូចដឹងចំណុចខ្សោយដៃគូ គឺបានប្រើស្នៀតទាត់សម្រុកកាន់តែខ្លាំង។
ការទាត់ផ្ទួនៗរបស់ សាម៉េត បានធ្វើឲ្យ Vany Chhai ចាប់ផ្តើមឈឺជើង និងដួលញឹកញាប់នាំឲ្យអាជ្ញាកណ្តាល ហ៊ិន សៃហេង រាប់មួយលើក ហើយឃើញឱកាសល្អបែបនេះ សាម៉េត បានទាត់បន្ថែមជើងក្រោមធ្វើឲ្យ Vany Chhai ដួលងើបលែងរួច សុំចុះចាញ់តែម្តង។
ជាមួយជ័យជម្នះនេះ សាម៉េត បាននិយាយថា៖ «ជ័យជម្នះនេះគឺពិតជាមោទនភាពណាស់ ព្រោះពីដំបូងខ្ញុំមិនសង្ឃឹមឈ្នះដោយផ្តួលគេឲ្យសន្លប់នោះទេ ប៉ុន្តែនៅពេលប្រកួតជាក់ស្តែង ខ្ញុំបានមើលឃើញថា ជើងគេរាងឈឺ នៅពេលខ្ញុំទាត់ត្រូវ ហេតុនេះខ្ញុំសម្រុកទាត់ផ្ទួនៗតែម្តង»។
ទោះជាយ៉ាងណា ម៉ន សាម៉េត រងរបួសឈឺឆ្អឹងស្មងជើងក្រោយពេលទទួលបានជ័យជម្នះ។ ម៉ន សាម៉េត បានបន្តថា៖ «ជ័យជម្នះនេះខ្ញុំមិនអាចអួតបានទេ ព្រោះ Vany Chhai ចាញ់មិនអស់ចិត្ត ហើយបើបានជួបគ្នាលើកក្រោយ មិនហ៊ានធានាច្រើននោះទេ»។
ចំណែកលោក ថៃ អ៊ូ អ្នកនាំកីឡាករថៃមកប្រកួតបាននិយាយថា៖ «Vany Chhai វានិយាយថាមិនអស់ចិត្តសោះ ព្រោះពេលនោះឈឺជើងងើបមិនរួច ដោយគេទាត់ត្រូវផ្ទួនៗតែម្តងហេតុនេះ Vany Chhai ចង់មកប្រកួតសងសឹកម្តងទៀតនៅលើកក្រោយ»។
ចំណែកគូប្រកួតដណ្តើមពាន K Cement Knock out series ជម្រុះប្រចាំសប្តាហ៍ ជើងខ្លាំង អេលីត ប៊ុនសិទ្ធ បានចាញ់ពិន្ទុ គឿម សុវណ្ណឌឿត ក្នុងលក្ខណៈប្រផិតប្រផើយ ដោយការប្រកួតវាយសម្រុកគ្នាជក់ចិត្តបំផុត។ ជ័យជម្នះនេះនាំឲ្យជើងចាស់ទម្ងន់ស្រាល គឿម សុវណ្ណឌឿត បានឡើងទៅប្រកួតជម្រុះជុំទី ២ ក្នុងវគ្គជម្រុះ ១៦ នាក់ចុងក្រោយ។
ចំណែកជើងខ្លាំង ខេម ចាន់ បានចំណាយពេលតែ ២ ទឹក ដើម្បីបង្ខំឲ្យកីឡាករ សំណាង សុខនឿន សុំចុះចាញ់តែម្តង។ ប៉ុន្តែគ្រូបង្វឹកប្រដាល់គុនខ្មែរ សុំមិនបញ្ចេញឈ្មោះនិយាយថា៖ «ការប្រកួតក្នុងទម្ងន់ ៥៧ គីឡូក្រាមវគ្គជម្រុះតាមរូបមន្តនៅសង្វៀនប៉ុស្តិ៍លេខ ៥ នេះកីឡាករគ្មានសមត្ថភាពប្រហែលគ្នាទេ គឺឲ្យតែមានទម្ងន់ប៉ុនគ្នាដាក់ឲ្យប្រកួតដោយមិនគិតពីសមត្ថភាព បទពិសោធចាស់ ឬថ្មីទេ ហើយអ្នកប្រដាល់មួយចំនួនគ្រាន់តែឡើងប្រកួតបង្គ្រប់កិច្ច ដើម្បីយកលុយតម្លៃខ្លួនផ្នែកចាញ់ប៉ុណ្ណោះ ឯកីឡាករដែលឈ្នះគឺត្រូវគេមើលដឹងលទ្ធផលតាំងពីមុនប្រកួតម្ល៉េះ។
ចំណែកគូអន្តរជាតិកម្តៅសាច់ដុំទម្ងន់ ៤០ គ.ក្រ ជើងថ្មី ខាំ ចក្រព័ន្ធ បានឈ្នះថៃ Phit Arun ក្នុងការប្រកួតជក់ចិត្តបំផុត៕
