ភ្នំពេញៈ ម្ចាស់ខ្សែក្រវាត់ ២ ស្ថាប័ន ម៉ន សាម៉េត ដែលធ្លាប់ចាញ់យ៉ាងជូរចត់ ក្រោមស្នៀតទាត់ និងជង្គង់របស់ អេលីត ចំរើន ចំនួន ២ លើកនោះបានប្តេជ្ញាចិត្តសងសឹកឱ្យបានវិញក្នុងការប្រកួតម៉ារ៉ាតុងដណ្តើមប្រាក់លាន (៣- ,៤លានរៀល) នៅសង្វៀនថោននាយប់ថ្ងៃអាទិត្យនេះ។
បើទោះបីជាការប្រកួតនេះតម្រូវឱ្យបេក្ខភាពទាំង ៤ នាក់ចាប់ឆ្នោតមុនការប្រកួត ប៉ុន្តែ សាម៉េត មិនចាត់ទុកសូត្រ វាសនា និង រឿម វណ្ណៈ ជាឧបសគ្គក្នុងការយកឈ្នះនោះទេ អ៊ីចឹងគេនឹងបានជួប អេលីត ចំរើន គឺបើមិននៅវគ្គជម្រុះ គឺវគ្គផ្តាច់ព្រ័ត្រ។ សាម៉េត បានប្រាប់ថា៖ «ការប្រកួតដណ្តើមប្រាក់លាននេះក៏ដូចគ្នាទៅនឹងការប្រកួតសងសឹកដែរ ហើយពេលនេះខ្ញុំត្រៀមល្អ ដើម្បីឈ្នះដែលមិនគិតថា អាចចាញ់ទៀតនោះឡើយ ព្រោះខ្ញុំបានសិក្សាស្វែងយល់ពីបច្ចេកទេស និង យុទ្ធវិធីប្រកួត ដើម្បីស្តារមុខមាត់ឡើងវិញឱ្យបាន»។
ម៉ន សាម៉េត និង អេលីត ចំរើន ធ្លាប់ជួបគ្នានៅសង្វៀនបាយ័នកាលពីឆ្នាំ ២០១៨ និងប៉ះគ្នាម្តងទៀតក្នុងវគ្គផ្តាច់ព្រ័ត្រនៅសង្វៀន One TV ឆ្នាំ ២០១៩ ហើយបានចាញ់ទាំង ២ លើក ប៉ុន្តែលើកនេះ សាម៉េត បញ្ជាក់ថា៖ «ការហ្វឹកហាត់ និងការថែទាំសុខភាពបានល្អប្រសើរជាងលើកមុនៗ ដើម្បីត្រៀមប្រកួតយកឈ្នះវិញឱ្យបានក្នុងទំនុកចិត្តខ្ពស់ ប៉ុន្តែបច្ចេកទេសវ៉ៃបែបណា ខ្ញុំសុំមិនទាន់ប្រាប់ទេ កុំឱ្យដៃគូដឹង ហើយការប្រកួតលើកនេះសំខាន់ សម្រាប់កេរ្តិ៍ឈ្មោះ កិត្តិយស និងប្រាក់ចំនួនច្រើន គឺខ្ញុំប្តេជ្ញាយកឈ្នះឱ្យបានក្នុងក្តីសង្ឃឹម ៧០ ភាគរយ»។
ចំណែកលោក ម៉ាង ម៉ន គ្រូបង្វឹក និងជាឪពុកបង្កើត សាម៉េត ប្រាប់ថា៖ «យើងបានសិក្សាពីល្បិចប្រកួត និងបានចាក់មើលវីដេអូប្រកួតកន្លងមក ដើម្បីកែចំណុចដែលមិនទាន់ល្អ និងព្យាយាមស្វែងរកចំណុចខ្សោយរបស់ដៃគូ ដើម្បីយកឈ្នះឱ្យបាន ព្រោះយើងជឿជាក់លើការហ្វឹកហាត់ និងត្រៀមបច្ចេកទេសវ៉ៃឱ្យល្អគឺប្តូរគ្រប់ស្នៀតឱ្យសន្លប់ចោល»។
ជាមួយគ្នានេះលោក ស៊ន អេលីត គ្រូបង្វឹក អេលីត ចំរើន និយាយថា៖ «ខាងខ្ញុំក៏ត្រៀមបានល្អទាំងការហ្វឹកហាត់ និងគោរពវិន័យ អ៊ីចឹងខ្ញុំមានទំនុកចិត្តថា យើងនៅតែបន្តឈ្នះ ប៉ុន្តែមិនមែនស្រួលទប់ទល់ទេ ព្រោះ សាម៉េត ចេញបានគ្រប់ស្នៀត និងមានល្បិចច្រើន។ ទោះយ៉ាងណាយើងខ្ពស់ជាង អ៊ីចឹងយើងធាក់ទប់ និងទាត់ឆ្ងាយ ហើយពេលចូលជិតឡើងជង្គង់ឱ្យបានមុន គឺធានាឈ្នះ ៩០ ភាគរយ ព្រោះតាំងពីឈ្នះខ្សែក្រវាត់ នៅ One TV មក ចំរើន មិនដែលចាញ់ទេ»។
ចំណែក សូត្រ វាសនា និង រឿម វណ្ណៈ ត្រូវគេវាយតម្លៃថាមានបច្ចេកទេស និងបទពិសោធទំនងខ្សោយជាង អេលីត ចំរើន និង ម៉ន សាម៉េត ប៉ុន្តែម្នាក់ក្នុងចំណោមអ្នកទាំង ២ ក៏អាចបានឡើងទៅវគ្គផ្តាច់ព្រ័ត្រដែរ បើសិន អេលីត ចំរើន និង ម៉ន សាម៉េត ចាប់ឆ្នោតប៉ះគ្នានៅវគ្គជម្រុះនោះ។
លោក សួន ប៊ុនសូត្រ ជាគ្រូបង្វឹកនិយាយថា៖ «២ នាក់នោះ គេខ្លាំងជាង ប៉ុន្តែមិនអាចមើលស្រាលកូនខ្ញុំនោះទេ ព្រោះឥឡូវវ៉ៃឡើងជាលំដាប់ ហើយកាលពីរសប្តាហ៍មុន សូត្រ វាសនា បានផ្តួល ឡុង ជិន ឱ្យសន្លប់ធំ ហេតុនេះខ្ញុំនៅមានសង្ឃឹមថា ១ ចានទឹក ១ ចានគោកទេ»។
ចំណែក រឿម វណ្ណៈ ដែលមានកម្រិតបច្ចេកទេសមិនទាន់ល្អដូចគេ និយាយថា៖ «ខ្ញុំហាត់បានល្អ និងធានាវ៉ៃអស់ពីសមត្ថភាព ប៉ុន្តែមិនហ៊ានថា ឈ្នះប៉ុន្មានភាគរយនោះទេ ព្រោះគេសុទ្ធតែខ្លាំងៗ។ ទោះជាយ៉ាងនេះ ខ្ញុំនៅតែសង្ឃឹមឈ្នះ ព្រោះប្រកួត ៣ ទឹកកម្លាំងនៅល្អ ហើយយើងមានឱកាសប្រើកែង ជង្គង់ ចូលគោលដៅក៏អាចផ្តួលដៃគូបានដូចគ្នា»៕